ସୀତାରାମ ଅଗ୍ରୱାଲ
ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ବ୍ଲକରେ ନିର୍ବାଚନ ପରବର୍ତ୍ତୀ ହିଂସା ଦେଖିବାକୁ ମିଳିଛି। ବାଣପୁର ବ୍ଲକର ଭେଟେଶ୍ଵର ପଞ୍ଚାୟତରେ ଏକ ବଡ ଧରଣର ରାଜନୈତିକ ହିଂସା ଦେଖିବାକୁ ମିଳିଛି। ପଞ୍ଚାୟତର ସରପଞ୍ଚ ତଥା ଚଳିତ ନିର୍ବାଚନର ସରପଞ୍ଚ ପ୍ରାର୍ଥୀଙ୍କ ସ୍ଵାମୀଙ୍କୁ ମରଣାନ୍ତକ ଆକ୍ରମଣ ହୋଇଥିବା ଅଭିଯୋଗ ହୋଇଛି। ଉକ୍ତ ଆକ୍ରମଣରେ ସରପଞ୍ଚ ଜିତେନ୍ଦ୍ର ଭୋଳ ଆହତ ହୋଇଥିବା ବେଳେ ତାଙ୍କ କାରଟି କ୍ଷତିଗ୍ରସ୍ତ ହୋଇଥିବା ସୂଚନା ରହିଛି। ଫଳରେ ସରପଞ୍ଚଙ୍କ ସମର୍ଥିତ କର୍ମୀମାନେ ଉଗ୍ରରୂପ ନେଇଥିବା ଦେଖିବାକୁ ମିଳିଛି।
ସୂଚନା ଅନୁଯାୟୀ, ଗତକାଲି ବାଣପୁର ବ୍ଲକରେ ପଞ୍ଚାୟତ ନିର୍ବାଚନର ଦ୍ଵିତୀୟ ପର୍ଯ୍ୟାୟ ପାଇଁ ମତଦାନ ହୋଇଥିଲା। ଏହି ମତଦାନ ସଂପୂର୍ଣ୍ଣ ରୂପେ ଶାନ୍ତି ଶ୍ରୁଙ୍ଖଳା ଅନୁଷ୍ଠିତ ହୋଇଥିବା ବେଳେ ରାତ୍ରିରେ ଏକ ବଡ ଧରଣର ହିଂସା ଦେଖିବାକୁ ମିଳିଛି। ଏଥିରେ ବିଜେପି ଆଉ ବିଜେଡ଼ି ସମର୍ଥକଙ୍କ ମଧ୍ୟରେ ବିବାଦ ଦେଖାଯାଇଥିଲା। ସରପଞ୍ଚ ଜିତେନ୍ଦ୍ର ଭୋଳଙ୍କୁ ୩୦ ରୁ ୪୦ ଜଣ ଦୁର୍ବୃତ୍ତ ଆକ୍ରମଣ କରିଥିବା ଅଭିଯୋଗ ହୋଇଛି। ଜିତେନ୍ଦ୍ର କୌଣସି କାର୍ଯ୍ୟ ପାଇଁ ବାଣପୁର ବଜାରକୁ ଯାଉଥିବା ବେଳେ ତାଙ୍କୁ ସଙ୍ଘବଦ୍ଧ ଭାବେ ୩୦ ରୁ ୪୦ ଜଣ ଦୁର୍ବୃତ୍ତ ଆକ୍ରମଣ କରିଥିଲେ। ଆକ୍ରମଣ ସମୟରେ ସ୍ଥାନୀୟ ଲୋକ ତାଙ୍କୁ ଉଦ୍ଧାର କରିଥିବା ବେଳେ ତାଙ୍କ କାର ଭାଙ୍ଗିରୁଜି ଯାଇଥିବା ବେଳେ ସେ ଆହତ ହୋଇଥିଲେ। କିନ୍ତୁ ଏହି ଘଟଣା ପଞ୍ଚାୟତରେ ପ୍ରସାରିତ ହେବା ପରେ ହଜାରରୁ ଉର୍ଦ୍ଧ୍ଵ ସମର୍ଥକ ଆକ୍ରମଣରେ ସାମିଲ ଥିବା ଅଭିଯୁକ୍ତଙ୍କ ଘର ଏବଂ ଗାଡିକୁ ଭାଙ୍ଗି ଚୁରମାର କରିଦେଇଥିଲେ। ସୌଭାଗ୍ୟବଶତଃ ଅଭିଯୁକ୍ତଙ୍କ ପରିବାର ଲୋକେ ଘରେ ଉପସ୍ଥିତ ନଥିଲେ। ଅଧିକ କ୍ଷତି ହେବା ପୂର୍ବରୁ ବାଣପୁର ଥାନାଧିକାରୀ ରଶ୍ମି ରଞ୍ଜନ ସାହୁଙ୍କ ନେତୃତ୍ଵରେ ଶତାଧିକ ପୋଲିସ କର୍ମୀ ଘଟଣାସ୍ଥଳରେ ପହଞ୍ଚିଥିଲେ।
ସେପଟେ ଜିତେନ୍ଦ୍ରଙ୍କ ବଡ ଭାଇ ପ୍ରଦୀପ ଭୋଳ ଏବଂ ନିଲୁ ଭୋଳ ଏତଲା ଦେବା ପାଇଁ ଥାନାରେ ପହଞ୍ଚିଥିବା ବେଳେ ଶାସକ ଦଳର ଶତାଧିକ କର୍ମୀମାନେ ଥାନା ପରିସର ମଧ୍ୟରେ ତାଙ୍କୁ ଅତର୍କିତ ଆକ୍ରମଣ କରିଥିଲେ। ଏହା ଜାଣିବା ପରେ ଜିତେନ୍ଦ୍ରଙ୍କ ସମର୍ଥକ ମାନେ ଆହୁରି ଉଗ୍ର ରୂପ ଧାରଣ କରିଥିଲେ। ଉତ୍ତ୍ୟକ୍ତ ଲୋକେ ସେଠାରେ ସରପଞ୍ଚଙ୍କ ସପକ୍ଷରେ ସ୍ଲୋଗାନ ଦେବା ସହିତ ଆକ୍ରମଣକାରୀଙ୍କ ଉପରେ କାର୍ଯ୍ୟାନୁଷ୍ଠାନ ଦାବି କରିବା ସହ ତୁରନ୍ତ ପ୍ରଦୀପ ଆଉ ନିଲୁଙ୍କୁ ସେମାନଙ୍କ ନିକଟରୁ ଫେରାଇ ଆଣିବା ପାଇଁ ପୋଲିସ ନିକଟରେ ଦାବି କରିଥିଲେ। ପରବର୍ତ୍ତୀ ସମୟରେ ପୋଲିସ ସେମାନଙ୍କୁ ଗୁରୁତର ଅବସ୍ଥାରେ ଉଦ୍ଧାର କରିବା ସହ ଉଭୟଙ୍କୁ ଆଣି ଜିତେନ୍ଦ୍ରଙ୍କ ଜିମା ଦେଇଥିଲା।
ବର୍ତ୍ତମାନ ସୂଚନା ଅନୁଯାୟୀ, ଉଭୟ ପକ୍ଷରୁ ଏକାଧିକ ଏତଲା ଥାନାରେ ରୁଜ୍ଜୁ କରାଯାଇଛି। ପୋଲିସ ଏହା ଉପରେ ତଦନ୍ତ ଆରମ୍ଭ କରିଦେଇଛି।
ସେହିଭଳି ଭାବେ ଅନ୍ୟ ଏକ ଘଟଣାରେ ଆଉ ଜଣେ ବିଜେପି କର୍ମୀଙ୍କୁ ଥାନା ପରିସରରେ ଶାସକ ଦଳର ସମାନ ଗୋଷ୍ଠୀ ଅତର୍କିତ ଆକ୍ରମଣ କରିଥିବା ଅଭିଯୋଗ ହୋଇଛି। ଖବର ମୁତାବକ ତୁମୁରାପୁଟ ପଞ୍ଚାୟତ ନାରଣଦେଇପୁର ଗ୍ରାମରେ ବିଜେପି ସମର୍ଥିତ ୱାର୍ଡମେମ୍ବର ପ୍ରାର୍ଥୀଙ୍କୁ ବିଜେଡି ସମର୍ଥିତ ୱାର୍ଡ ମେମ୍ବର ପ୍ରାର୍ଥୀ ଏବଂ କର୍ମୀ ମାନେ ଗତକାଲି ରାତିରେ ଆକ୍ରମଣ କରିଥିଲେ।
ତେବେ ଏହାକୁ ନେଇ ଉଭୟ ଗୋଷ୍ଠୀ ପକ୍ଷରୁ ଥାନାରେ ଅଭିଯୋଗ ହୋଇଥିବା ବେଳେ ଉକ୍ତ ସମୟରେ ବାଣପୁର ବିଜେପି ନଗର ମଣ୍ଡଳ ସମ୍ପାଦକ ସୁକାନ୍ତ ସାହୁ ଥାନାରେ ଉପସ୍ଥିତି ଥିଲେ। ଠିକ ସେତିକିବେଳେ ବିଜେଡି କର୍ମୀମାନେ ତାଙ୍କୁ ଅତର୍କିତ ଆକ୍ରମଣ କରିଥିଲେ। ଜୀବନ ବଞ୍ଚାଇବା ପାଇଁ ସୁକାନ୍ତ ପୋଲିସ କ୍ୱାର୍ଟରରେ ପସିଯାଇଥିଲେ। କିନ୍ତୁ ଏହି ଆକ୍ରମଣ ସମୟରେ ଭିଡିଓ ଉତ୍ତୋଳନ କରୁଥିବା ଜଣେ କାର୍ଯ୍ୟରତ ସାମ୍ବାଦିକ ସନ୍ତୋଷ ମହାନ୍ତିଙ୍କୁ ମଧ୍ୟ ବିଜେଡି କର୍ମୀମାନେ ଆକ୍ରମଣ କରିଥିବା ଖବର ରହିଛି।
ଏହି ପରିପ୍ରେକ୍ଷୀରେ ସାମ୍ବାଦିକ ଜଣକ ମଧ୍ୟ ଏ ନେଇ ଥାନାରେ ଏକ ଲିଖିତ ଅଭିଯୋଗ କରିଛନ୍ତି। ଚିଲିକାର ସମସ୍ତ ସାମ୍ବାଦିକମାନେ ଏହାକୁ କଡା ନିନ୍ଦା କରିବା ସହ ଅଭିଯୁକ୍ତମାନଙ୍କୁ ତୁରନ୍ତ ଗିରଫ କରିବାପାଇଁ ଦାବି କରିଛନ୍ତି। ପରବର୍ତ୍ତୀ ସମୟରେ ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବ ଥାନାରେ ଆସି ତାଙ୍କ କର୍ମୀଙ୍କ ଘର ଭାଙ୍ଗିଥିବା ଏବଂ ଆକ୍ରମଣ କରିଥିବା ଅଭିଯୁକ୍ତଙ୍କୁ ଗିରଫ କରିବା ପାଇଁ ଦାବି କରିଥିଲେ।
ତେବେ ଏନେଇ ତୀବ୍ର ପ୍ରତିକ୍ରିୟା ରଖିଛନ୍ତି ରାଜ୍ୟ ବିଜେପି ସାଧାରଣ ସମ୍ପାଦକ ପୃଥ୍ଵୀରାଜ ହରିଚନ୍ଦନ। ବିଜୁ ଜନତା ଦଳ ଚିଲିକାରେ ହାରିବ ବୋଲି ଜାଣିସାରିଥିବାରୁ ଏପରି କାଣ୍ଡ କରିଥବାର କହିଛନ୍ତି। ଏହାସହିତ ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ଉପସ୍ଥିତିରେ ଥାନା ମଧ୍ୟରେ ବିରୋଧୀ ଦଳର କାର୍ଯ୍ଯକର୍ତ୍ତା ଏବଂ ସାମ୍ବାଦିକଙ୍କୁ ଆକ୍ରମଣ ଘଟଣା ଏକ ଦୁର୍ଭାଗ୍ୟଜନକ ବୋଲି ସେ ଅଭିଯୋଗ କରିଛନ୍ତି। ବିଜେପି ଏ ନେଇ ଖୁବଶୀଘ୍ର ଡ଼ିଜିପିଙ୍କୁ ଭେଟିବ ବୋଲି କହିଛନ୍ତି ଶ୍ରୀ ହରିଚନ୍ଦନ।