ନୟାଗଡ/ରଣପୁର: ରଣପୁର ଥାନା ଗୋପାଳ ପୁର ପଟା ଶଙ୍ଖ ନିକଟ ଖଜୁରୀ ଖାଲ ନାଳରେ ଯୁବକଙ୍କ ଏକ ମୃତଦେହ ଉଦ୍ଧାର ହୋଇଛି। ସନ୍ଦେହ ଜନକ ଅବସ୍ଥାରେ ଉଦ୍ଧାର ମୃତଦେହକୁ ଉଦ୍ଧାର କରାଯାଇଥିବା ବେଳେ ମୃତକଙ୍କ ପରିଚୟ ମିଳିପାରିଛି। ମୃତକ ଜଣଙ୍କ ଗୋପାଳ ପୁର ଗ୍ରାମର ରାମ ଚନ୍ଦ୍ର ମହାରଣା (୨୫ ବର୍ଷ) ବୋଲି ଜଣାପଡିଛି।
ସୂଚନା ଅନୁଯାୟୀ, ସ୍ଥାନୀୟ ଅଞ୍ଚଳର କିଛି ଲୋକ ବିଲକୁ କାମ କରିବାକୁ ଯାଉଥିବା ବେଳେ ନାଳରେ ଯୁବକଙ୍କର ଶବ ମୁହଁ ମାଡି ହୋଇ ପଡିରହିଥିବା ଦେଖିବାକୁ ପାଇଥିଲେ। ଏ ନେଇ ବିଲରେ କାମ କରିବାକୁ ଯାଇଥିବା ଚାଷୀ ମାନେ ତୁରନ୍ତ ପୋଲିସ୍ କୁ ଖବର ଦେଇଥିଲେ। ତେଣୁ ସ୍ଥାନୀୟ ଅଗ୍ନିଶମ ବାହିନୀ ସହ ରଣପୁର ପୋଲିସ୍ ଘଟଣା ସ୍ଥଳରେ ପହଂଚି ଶବକୁ ଉଦ୍ଧାର କରିଥିଲେ।
ପରେ ଘଟଣା ସ୍ଥଳରେ ମୃତ ଯୁବକଙ୍କ ପରିବାର ଲୋକେ ପହଂଚି ଶବକୁ ଚିହ୍ନଟ କରିବା ପରେ ପୋଲିସ୍ ଶବ ଜବତ କରି ବ୍ୟବଚ୍ଛେଦ ପାଇଁ ରଣପୁର ପଠାଇ ଦେଇଛି। ଏ ନେଇ ରଣପୁର ଥାନାରେ ଏକ ଅପମୃତ୍ୟୁ ମାମଲା ରୁଜୁ କରି ପୋଲିସ ତଦନ୍ତ ଆରମ୍ଭ କରିଛି। ତେବେ ମୃତ ଯୁବକ ଜଣକ ଘରେ ନ ରହି ସଦାବେଳେ ବାହାରେ ବୁଲା ବୁଲି କରୁଥିବା ସ୍ଥାନୀୟ ଲୋକେ କହିଛନ୍ତି। ବ୍ୟବଚ୍ଛେଦ ପରେ ପ୍ରକୃତ କାରଣ ଜଣା ପଡିବ ବୋଲି କୁହାଯାଉଛି।