ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଆସ୍କା ଥାନା ଅର୍ନ୍ତଗତ ଖଣ୍ଡଦେଉଳି ପଞ୍ଚାୟତ ସମାଇଗୁଡା ଗ୍ରାମରେ ଏକ ବିଭତ୍ସ ହତ୍ୟାକାଣ୍ଡ ମାମଲା ସାମ୍ନାକୁ ଆସିଛି। ସାନ ଭାଇ ଓ ତାଙ୍କ ପରିବାରର ଆକ୍ରମଣରେ ବଡ଼ ଭାଇ ରାଜୁ ପାତ୍ର ଓ ଭାଉଜ ମଲା ପାତ୍ର ନିହତ ହୋଇଛନ୍ତି।
ଘଟଣାରୁ ପ୍ରକାଶ ଯେ, ଜଙ୍ଗଲ ଜମିରେ ଚାଷ କରିବାକୁ ନେଇ ସାନ ଭାଇ ଭୁବୁନି ପାତ୍ର ଓ ବଡ଼ ଭାଇ ରାଜୁ ପାତ୍ରଙ୍କ ସହ ବହୁ ଆଗରୁ ମନୋମାଳିନ୍ୟ ଥିଲା। ଗତକାଲି ରାଜୁ ପାତ୍ର ଓ ପତ୍ନୀ ମଲା ଜମିରେ ଚାଷ କରୁଥିବାବେଳେ ହଠାତ ଭୁବୁନି ଏକ କଟୁରୀ ଧରି ରାଜୁକୁ ଆକ୍ରମଣ କରିବାରୁ ଭାଉଜ ଅଟକାଇଥିଲେ। ରାଗରେ ଜର୍ଜରିତ ଭୁବୁନି ଭାଉଜକୁ ଆକ୍ରମଣ କରି ଜବରଦସ୍ତ ପାଟିରେ ବିଷ ପିଆଇଥିଲା। ଆହତ ଅବସ୍ଥାରେ ଭାଇ ଛଡ଼ାଇବାକୁ ଆସିବା ବେଳକୁ ଭୁବୁନିର ସ୍ତ୍ରୀ ରଞ୍ଜିତା ଓ ତାଙ୍କ ପୁଅ ମଧ୍ୟ ବିଲ ଭିତରେ ଗୋଡ଼ାଇ ଗୋଡ଼ାଇ ରାଜୁର ତଣ୍ଟିକୁ କଟୁରୀରେ କାଟି ହତ୍ୟା କରିଥିଲେ।
ଅନ୍ୟ ପଟେ ଭାଉଜର ବେକରେ ଛୁରୀରେ କାଟୁଥିବା ବେଳେ ରାଜୁର ପୁଅଙ୍କ ଚିତ୍କାର ଶୁଣି ନିକଟରେ ଉପସ୍ଥିତ କିଛି ଲୋକ ପହଞ୍ଚିଯିବାରୁ ଭୁବୁନି ତାର ସ୍ତ୍ରୀ ଓ ପୁଅ ଘଟଣାସ୍ଥଳରୁ ଚାଲି ଯାଇଥିଲେ। ନିହତ ରାଜୁର ଭାଇ ଠାରୁ ଖବର ପାଇ ଆସ୍କା ପୋଲିସ ଉପଖଣ୍ଡ ଅଧିକାରୀ, କୋଟିନଡା ଥାନା ଅଧିକାରୀ ଓ ଆସ୍କା ଥାନା ଅଧିକାରୀ ଅନ୍ୟାନ୍ୟ କର୍ମଚାରୀ ମାନେ ଘଟଣାସ୍ଥଳକୁ ଯାଇ ରାଜୁର ଶବ ଓ ଗୁରୁତର ମଲାକୁ ଆସ୍କା ଡାକ୍ତରଖାନାକୁ ନେଇଥିଲେ। ଗୁରୁତର ମଲା ବାଟରେ ହିଁ ମୃତ୍ୟୁ ବରଣ କରିଥିଲେ।
ପୋଲିସ ଉଭୟଙ୍କ ମୃତ ଦେହ କୁ ବ୍ୟବଚ୍ଛେଦ ପାଇଁ ବ୍ରହ୍ମପୁର ବଡ ଡାକ୍ତରଖାନାକୁ ପଠାଇ ଘଟଣା ର ତଦନ୍ତ ଆରମ୍ଭ କରିଛି।
