ହାଇଦ୍ରାବାଦ: ତେଲେଙ୍ଗାନାର ସଙ୍ଗାରେଡି ଜିଲ୍ଲାରେ ଏକ ହୃଦୟ ବିଦାରକ ଘଟଣା ଘଟିଛି। ବିଷାକ୍ତ ଖାଦ୍ୟ ଖାଇବା କାରଣରୁ ସେଠାରେ ତିନି ପିଲାଙ୍କର ମୃତ୍ୟୁ ହୋଇଛି। ମୃତକଙ୍କ ନାମ ସାଇକ୍ରିଷ୍ଣା (୧୨ ବର୍ଷ), ମଧୁପ୍ରିୟା (୧୦ ବର୍ଷ) ଏବଂ ଗୌତମ (ଆଠ ବର୍ଷ) ବୋଲି ଜଣାପଡିଛି। ତାଙ୍କ ପିତାମାତାଙ୍କ ନାମ ଚେନ୍ନାୟା ଏବଂ ରଜିତା। ସେମାନଙ୍କ ମା’ ରଜିତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ଏହି ଘଟଣା ସଙ୍ଗାରେଡି ଜିଲ୍ଲାର ଅମିନପୁର ପୌରପାଳିକାର ରାଘବେନ୍ଦ୍ର ନଗର କଲୋନୀରେ ଘଟିଛି। ପ୍ରାଥମିକ ଅନୁସନ୍ଧାନ ପରେ ପାରିବାରିକ କଳହ ଯୋଗୁଁ ପୋଲିସ ଏହାକୁ ଖାଦ୍ୟରେ ବିଷ ମିଶାଯାଇଥିବା ବୋଲି ସନ୍ଦେହ କରିଛି। ଏହି ଘଟଣାର କାରଣ ପୋଲିସ ଜାଣିବାକୁ ଚେଷ୍ଟା କରୁଛି।
