ବାଣପୁର: ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଣପୁର ଏନଏସି କାର୍ଯ୍ୟନିର୍ବାହୀ ଅଧିକାରୀ ନିଗମାନନ୍ଦ ନନ୍ଦଙ୍କୁ ହାଇକୋର୍ଟ ନୋଟିସ ଜାରି କରିଛନ୍ତି। ତାଙ୍କ ବିରୁଦ୍ଧରେ ହାଇକୋର୍ଟରେ ଅଦାଲତ ଅବମାନନା ମାମଲା ରୁଜୁ ହୋଇଛି। ମାନ୍ୟବର ଓଡିଶା ଉଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶ ପାଳନ କରିନଥିବାରୁ ତାଙ୍କ ବିରୁଦ୍ଧରେ ଆବେଦନକାରୀ ଆଇନଜୀବୀ ସୀତାରାମ ଅଗ୍ରୱାଲ ଅଦାଲତ ଅବମାନନା ମାମଲା ରୁଜୁ କରିଛନ୍ତି। ଉକ୍ତ ଅଦାଲତ ଅବମାନନା ମାମଲାକୁ ବିଚାର କରି ଏନଏସି କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ନନ୍ଦଙ୍କୁ ଉଚ୍ଚ ନ୍ୟାୟାଳୟ ନୋଟିସ ଜାରି କରିଛନ୍ତି।
ସୂଚନା ଥାଉକି ବାଣପୁର ଏନଏସି ଅନ୍ତର୍ଗତ ୧୦ ନମ୍ବର ୱାର୍ଡରେ ଏନଏସି କର୍ତ୍ତୃପକ୍ଷଙ୍କ ଦ୍ୱାରା ୨୦୨୩ ମସିହାରେ ଡ୍ରେନେଜ ବ୍ୟବସ୍ଥା ନକରି ବେଆଇନ ଭାବେ ପେଭର ବ୍ଲକ ରୋଡ ନିର୍ମାଣ କରାଯାଇଥିଲା। ଫଳରେ ଆବେଦନକାରୀ ଆଇନଜୀବୀ ଶ୍ରୀ ଅଗ୍ରୱାଲଙ୍କ ଘରେ ବର୍ଷା ଜଳ ପ୍ରବେଶ କରୁଛି। ଏହାକୁ ବିରୋଧ କରି ଆଇନଜୀବୀ ଶ୍ରୀ ଅଗ୍ରୱାଲ ମାନ୍ୟବର ଉଚ୍ଚ ନ୍ୟାୟାଳୟରେ ଏକ ରିଟ ପିଟିସନ ଦାୟର କରିଥିଲେ। ତିନି ମାସ ମଧ୍ୟରେ ସମସ୍ୟାର ସମାଧାନ ପାଇଁ ଉଚ୍ଚ ନ୍ୟାୟାଳୟ ତତ୍କାଳୀନ ବାଣପୁର ଏନଏସି କାର୍ଯ୍ୟନିର୍ବାହୀ ଅଧିକାରୀଣିଙ୍କୁ ନିର୍ଦ୍ଦେଶ ଦେଇଥିଲେ।
ଉକ୍ତ ନିର୍ଦ୍ଦେଶ ପରେ ଏପ୍ରିଲ ୨ ତାରିଖ ୨୦୨୪ ରେ ତତ୍କାଳୀନ ଏନଏସି କାର୍ଯ୍ୟନିର୍ବାହୀ ଅଧିକାରୀଣି ଅଦାଲତ ନିର୍ଦ୍ଦେଶର ଏକ ଅନୁପାଳନ ପତ୍ର ଆବେଦନକାରୀଙ୍କୁ ପଠାଇଥିଲେ, ଯେଉଁଥିରେ ଉକ୍ତ ସମସ୍ୟାର ଏକମାତ୍ର ସମାଧାନ ୧୦ ନମ୍ବର ୱାର୍ଡରେ ଡ୍ରେନ ନିର୍ମାଣ ବୋଲି ଉଲ୍ଲେଖ କରିଥିଲେ। ତେବେ ଉକ୍ତ ୱାର୍ଡକୁ ସଂଲଗ୍ନ ମୁଖ୍ୟ ଡ୍ରେନ ପୂର୍ତ୍ତ ବିଭାଗ ଦ୍ୱାରା ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହେଲାପରେ ତୁରନ୍ତ ସେଠାରେ ଏନଏସି ପକ୍ଷରୁ ଡ୍ରେନ ନିର୍ମାଣ କରାଯିବ।
ଉକ୍ତ ବିଷୟ ଉଚ୍ଚ ନ୍ୟାୟାଳୟରେ ସତ୍ୟପାଠ ଜରିଆରେ ତତ୍କାଳୀନ ଏନଏସି କାର୍ଯ୍ୟନିର୍ବାହୀ ଅଧିକାରୀଣି ଜବାବ ଦାଖଲ କରିଥିଲେ। ତେବେ ଚଳିତ ବର୍ଷ ମଇ ମାସ ସୁଦ୍ଧା ପୂର୍ତ୍ତ ବିଭାଗ ପକ୍ଷରୁ ବାଣପୁର ଏନଏସି ୧୦ ନମ୍ବର ୱାର୍ଡ (ତଳସାହି ଛକ) ସଂଲଗ୍ନ ମୁଖ୍ୟ ରାସ୍ତାରେ ଡ୍ରେନ ନିର୍ମାଣ କାର୍ଯ୍ୟ ଶେଷ ହୋଇଥିଲେ ମଧ୍ୟ ବାଣପୁର ଏନଏସି କାର୍ଯ୍ୟନିର୍ବାହୀ ଅଧିକାରୀ ଜାଣିଶୁଣି ୧୦ ନମ୍ବର ୱାର୍ଡରେ ଡ୍ରେନ ନିର୍ମାଣ କାର୍ଯ୍ୟ କରିନାହାନ୍ତି ଯାହାଫଳରେ ଆଇନଜୀବୀ ଶ୍ରୀ ଅଗ୍ରୱାଲ ପୁନର୍ବାର ଏହି ପ୍ରସଙ୍ଗକୁ ନେଇ ଉଚ୍ଚ ନ୍ୟାୟାଳୟରେ ଆଉ ଏକ ରିଟ ପିଟିସନ (ସଂଖ୍ୟା ୧୫୭୧୧/୨୦୨୫) ଦାୟର କରିଥିଲେ।
ଉକ୍ତ ମାମଲାର ଶୁଣାଣି କରି ମାନ୍ୟବର ଉଚ୍ଚ ନ୍ୟାୟାଳୟ ଜୁନ ୧୭ ତାରିଖରେ ବାଣପୁର ଏନଏସି ଅନ୍ତର୍ଗତ ୧୦ ନମ୍ବର ୱାର୍ଡରେ ଦୁଇ ସପ୍ତାହ ମଧ୍ୟରେ ଡ୍ରେନ ନିର୍ମାଣ ପାଇଁ ନିଷ୍ପତ୍ତି ବାଣପୁର ତହସିଲଦାରଙ୍କ ଯୁଗ୍ମ ତଦନ୍ତ ରିପୋର୍ଟ ଆଧାରରେ ନେବାକୁ ଏନଏସି କାର୍ଯ୍ୟନିର୍ବାହୀ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ। ତେବେ ଇତି ମଧ୍ୟରେ ଏକ ମାସରୁ ଉର୍ଦ୍ଧ ସମୟ ବିତିଯାଇଥିଲେ ସୁଦ୍ଧା ଏନଏସି କାର୍ଯ୍ୟନିର୍ବାହୀ ଅଧିକାରୀ ନିଗମାନନ୍ଦ ନନ୍ଦ ମାନ୍ୟବର ଉଚ୍ଚ ନ୍ୟାୟାଳୟଙ୍କ ଆଦେଶକୁ ପାଳନ ନକରି ଏବଂ ଅଦାଲତ ଅବମାନନା ମାମଲାରୁ ବର୍ତ୍ତିବା ପାଇଁ ଆବେଦନକାରୀ ଆଇନଜୀବୀ ଶ୍ରୀ ଅଗ୍ରୱାଲଙ୍କୁ କିଛି ମିଥ୍ୟା ଓ ବିଭ୍ରାନ୍ତିକର ତଥ୍ୟ ଥିବା ଏକ ନିଷ୍ପତ୍ତି ପତ୍ର ପ୍ରଦାନ କରିଥିଲେ।
ତେଣୁ ଆବେଦନକାରୀ ତାଙ୍କ ବିରୁଦ୍ଧରେ ଉଚ୍ଚ ନ୍ୟାୟାଳୟରେ ଏକ ଅଦାଲତ ଅବମାନନା ମାମଲା (ସଂଖ୍ୟା ୩୧୮୪/୨୦୨୫) ଦାୟର କରିଥିଲେ। ତେବେ ଉକ୍ତ ମାମଲାକୁ ବିଚାର କରି ମାନ୍ୟବର ଉଚ୍ଚ ନ୍ୟାୟାଳୟ ଏଥିରେ ଅସନ୍ତୋଷ ପ୍ରକାଶ କରିବା ସହ ବାଣପୁର ଏନଏସି କାର୍ଯ୍ୟନିର୍ବାହୀ ଅଧିକାରୀ ନିଗମାନନ୍ଦ ନନ୍ଦଙ୍କୁ ନୋଟିସ ଜାରି କରିଛନ୍ତି। ଆବେଦନକାରୀଙ୍କୁ ପକ୍ଷରୁ ଉକ୍ତ ମାମଲାକୁ ବରିଷ୍ଠ ଆଇନଜୀବୀ ଜୟଦେବ ବେହେରା ଏବଂ ସନ୍ଦୀପ କୁମାର ମହାପାତ୍ର ପରିଚାଳନା କରୁଛନ୍ତି।