ନୂଆଦିଲ୍ଲୀ: ମୁମ୍ବାଇ ପୋଲିସ ଦ୍ୱାରା ହାସ୍ୟ ଅଭିନେତା କପିଲ ଶର୍ମାଙ୍କ ସୁରକ୍ଷା ବୃଦ୍ଧି କରାଯାଇଛି। କାନାଡାରେ ହାସ୍ୟ ଅଭିନେତାଙ୍କ କ୍ୟାପ୍ସ କାଫେରେ ଦୁଇଥର ଗୁଳି ଚଳାଇବା ମାମଲା ପରେ ପୋଲିସ ଏହି ପଦକ୍ଷେପ ନେଇଛି। ନିକଟରେ ଲରେନ୍ସ ବିଷ୍ନୋଇ ଗ୍ୟାଙ୍ଗ ମଧ୍ୟ କପିଲଙ୍କୁ ହତ୍ୟା ଧମକ ଦେଇଥିଲା। ଏସବୁକୁ ଆଖି ଆଗରେ ରଖି ପୋଲିସ ହାସ୍ୟ ଅଭିନେତାଙ୍କ ସୁରକ୍ଷା ବୃଦ୍ଧି କରିବାକୁ ନିଷ୍ପତ୍ତି ନେଇଛି।
ସୂତ୍ର ଅନୁସାରେ କପିଲ ଶର୍ମାଙ୍କ ସୁରକ୍ଷା କେଉଁ ବର୍ଗରେ ବୃଦ୍ଧି କରାଯାଇଛି ତାହା ସେମାନେ ପ୍ରକାଶ କରିପାରିବେ ନାହିଁ। କପିଲ ଶର୍ମାଙ୍କୁ ଯେପରି କୌଣସି ପ୍ରକାରର କ୍ଷତି ନହୁଏ, ତାହା ପୋଲିସ ସୁନିଶ୍ଚିତ କରୁଛି।
କାନାଡାରେ କପିଲ ଶର୍ମାଙ୍କ କ୍ୟାପ୍ସ କାଫେରେ ଗୋଟିଏ ମାସରୁ କମ୍ ସମୟ ମଧ୍ୟରେ ଦୁଇଥର ଗୁଳିଚାଳନା କରାଯାଇଥିଲା। ପୂର୍ବରୁ ୧୦ ଜୁଲାଇରେ କପିଲ ଶର୍ମାଙ୍କ ରେଷ୍ଟୁରାଣ୍ଟକୁ ଟାର୍ଗେଟ କରାଯାଇଥିଲା। ଗୁଳିକାଣ୍ଡରେ କାଫେ ବହୁତ କ୍ଷତି ହୋଇଥିଲା। ବବର ଖାଲସା ଇଣ୍ଟରନ୍ୟାସନାଲ (BKI) କର୍ମୀ ହରଜିତ ସିଂହ ଲାଡି ଏହି ଆକ୍ରମଣ କରିଥିବା ସ୍ଵୀକାର କରିଥିଲେ। ଏହା ପରେ, ଅଗଷ୍ଟ ୭ ତାରିଖରେ କପିଲ ଶର୍ମାଙ୍କ କ୍ୟାଫେରେ ମଧ୍ୟ ଗୁଳିଚାଳନା କରାଯାଇଥିଲା। ଗ୍ୟାଙ୍ଗଷ୍ଟର ଗୋଲ୍ଡୀ ଢିଲୋ ଏହି ଆକ୍ରମଣର ଦାୟିତ୍ୱ ନେଇଥିଲେ।
ବିଷ୍ଣୋଇ ଗ୍ୟାଙ୍ଗ କପିଲ ଶର୍ମାଙ୍କୁ ଧମକ ଦେଇଥିଲା:
କପିଲ ଶର୍ମାଙ୍କ ରେଷ୍ଟୁରାଣ୍ଟରେ ଗୁଳିକାଣ୍ଡ ପରେ ଲରେନ୍ସ ଗ୍ରୁପର ଗ୍ୟାଙ୍ଗଷ୍ଟର ହ୍ୟାରି ବକ୍ସରଙ୍କ ଅଡିଓ ସାମ୍ନାକୁ ଆସିଥିଲା। ଏଥିରେ ହ୍ୟାରି ବକ୍ସର କହିଥିଲେ ଯେ, ‘ଦି ଗ୍ରେଟ୍ ଇଣ୍ଡିଆନ୍ କପିଲ ଶୋ ସିଜନ୍ ୩’ର ଉଦଘାଟନୀ କାର୍ଯ୍ୟକ୍ରମରେ ସଲମାନ ଖାନଙ୍କୁ ନିମନ୍ତ୍ରଣ କରିବା କାରଣରୁ କାଫେରେ ଗୁଳି ଚାଳନା କରାଯାଇଥିଲା। ଅଡିଓରେ କୁହାଯାଇଥିଲା ଯେ, ଯିଏ ସଲମାନ ଖାନଙ୍କ ସହିତ କାମ କରିବ ତାଙ୍କୁ ହତ୍ୟା କରାଯିବ। ଏହି ଅଡିଓରେ ଏହା ମଧ୍ୟ କୁହାଯାଇଥିଲା ଯେ, ଏବେ କୌଣସି ନିର୍ଦ୍ଦେଶକ, ପ୍ରଯୋଜକ କିମ୍ବା ଅଭିନେତାଙ୍କୁ ଚେତାବନୀ ଦିଆଯିବ ନାହିଁ, ବରଂ ସିଧାସଳଖ ଗୁଳି କରାଯିବ। ତଥାପି ଏହି ଅଡିଓ ଏପର୍ଯ୍ୟନ୍ତ ନିଶ୍ଚିତ ହୋଇନାହିଁ।