ନୂଆଦିଲ୍ଲୀ: ତାମିଲନାଡୁରେ ଏକ ବଡ଼ ନିଯୁକ୍ତି ଠକେଇର ପର୍ଦ୍ଦାଫାସ ହୋଇଛି। ପ୍ରବର୍ତ୍ତନ ନିର୍ଦ୍ଦେଶାଳୟ (ED) ରାଜ୍ୟ ପୋଲିସକୁ ଏକ ବିସ୍ତୃତ ରିପୋର୍ଟ ପଠାଇଛି, ଯେଉଁଥିରେ ପୌର ପ୍ରଶାସନ ଏବଂ ଜଳ ଯୋଗାଣ ବିଭାଗ (MAWS)ରେ ୨,୫୩୮ ପଦବୀ ପାଇଁ ନିଯୁକ୍ତିରେ ବ୍ୟାପକ ଦୁର୍ନୀତି ହୋଇଥିବା ଅଭିଯୋଗ କରାଯାଇଛି। ସଂସ୍ଥା ଅନୁଯାୟୀ, ଏହି ପଦବୀ ପାଇଁ ପ୍ରତ୍ୟେକ ପ୍ରାର୍ଥୀଙ୍କଠାରୁ ୨୫ ରୁ ୩୫ ଲକ୍ଷ ଟଙ୍କା ପର୍ଯ୍ୟନ୍ତ ଲାଞ୍ଚ ନିଆଯାଇଛି। ଟ୍ରୁ ଭାଲ୍ୟୁ ହୋମ୍ସ (TVH) ନାମକ ଏକ କମ୍ପାନୀ ସହିତ ଜଡିତ ମନି ଲଣ୍ଡରିଂ ତଦନ୍ତ ସମୟରେ ED ଏହା ପର୍ଦ୍ଦାଫାସ କରିଛି। ଏହି କମ୍ପାନୀ ରାଜ୍ୟ MAWS ମନ୍ତ୍ରୀ କେ.ଏନ୍. ନେହେରୁଙ୍କ ଭାଇ ଏନ. ରବିଚନ୍ଦ୍ରନଙ୍କ ସହ ଜଡିତ ବୋଲି ଅଭିଯୋଗ ହୋଇଛି।
ED କହିଛି ଯେ, ଏହି ନିଯୁକ୍ତି ଅଗଷ୍ଟ ୨୦୨୫ ରେ ହୋଇଥିଲା ଏବଂ ମୁଖ୍ୟମନ୍ତ୍ରୀ ଏମ.କେ. ଷ୍ଟାଲିନ ନିଜେ ଅଗଷ୍ଟ ୬ ତାରିଖରେ ନିଯୁକ୍ତି ପତ୍ର ବଣ୍ଟନ କରିଥିଲେ। ସୂଚନା ଅନୁଯାୟୀ, ନିଯୁକ୍ତି ପ୍ରକ୍ରିୟାରେ କେବଳ ଆର୍ଥିକ ଅନିୟମିତତା ହୋଇନଥିଲା, ବରଂ ଆନ୍ନା ବିଶ୍ୱବିଦ୍ୟାଳୟ ଦ୍ୱାରା ପରିଚାଳିତ ପରୀକ୍ଷାରେ ମଧ୍ୟ ଜାଲିଆତି ହୋଇଥିଲା।
ଏଜେନ୍ସି ଦାବି କରିଛି ଯେ, କିଛି “ରାଜନୈତିକ ପ୍ରଭାବଶାଳୀ ବ୍ୟକ୍ତି” ପରୀକ୍ଷା ଫଳାଫଳରେ ହସ୍ତକ୍ଷେପ କରିଥିଲେ ଏବଂ ଅତି କମରେ ୧୫୦ ଜଣ ପ୍ରାର୍ଥୀଙ୍କୁ ଜାଲିଆତି କରି ପାସ୍ କରିଥିଲେ। ଏହି ପ୍ରାର୍ଥୀମାନଙ୍କୁ ପରେ ସରକାରୀ ପଦବୀରେ ନିଯୁକ୍ତି ଦିଆଯାଇଥିଲା। ED ତାମିଲନାଡୁ ପୋଲିସ ମୁଖ୍ୟଙ୍କୁ ୨୩୨ ପୃଷ୍ଠାର ଏକ ରିପୋର୍ଟ (ଡୋଜିୟର) ଦାଖଲ କରିଛି, ଯେଉଁଥିରେ କିଏ ଲାଞ୍ଚ ପାଇଲା, କିଏ ଟଙ୍କା ପଠାଇଲା, କେଉଁ ପ୍ରାର୍ଥୀମାନେ ଲାଭବାନ ହେଲେ ଏବଂ ପରୀକ୍ଷା ପ୍ରକ୍ରିୟାରେ କେଉଁଠି ହେରଫେର ହୋଇଥିଲା ତାହା ବିସ୍ତୃତ ଭାବରେ ଉଲ୍ଲେଖ କରାଯାଇଛି।
ରିପୋର୍ଟରେ ୧୫୦ ପ୍ରାର୍ଥୀଙ୍କ ନାମ ଏବଂ ସେମାନଙ୍କର ସନ୍ଦେହଜନକ ଯୋଗ୍ୟତାର ସମ୍ପୂର୍ଣ୍ଣ ବର୍ଣ୍ଣନା ଅନ୍ତର୍ଭୁକ୍ତ। ED PMLA ର ଧାରା ୬୬(୨) ଅଧୀନରେ ଏହି ଚିଠି ପଠାଇଛି ଏବଂ ପୋଲିସକୁ ଏହି ମାମଲାର ଫୌଜଦାରୀ ତଦନ୍ତ ଆରମ୍ଭ କରିବାକୁ କହିଛି। ନିଯୁକ୍ତି ପ୍ରକ୍ରିୟା ଜାନୁଆରୀ ୨୦୨୪ ରେ ଆରମ୍ଭ ହୋଇଥିଲା ଏବଂ ପ୍ରାୟ ୧.୧୨ ଲକ୍ଷ ପ୍ରାର୍ଥୀ ଆବେଦନ କରିଥିଲେ। ପଦବୀଗୁଡ଼ିକରେ ସହାୟକ ଇଞ୍ଜିନିୟର, କନିଷ୍ଠ ଇଞ୍ଜିନିୟର, ନଗର ଯୋଜନା ଅଧିକାରୀ ଏବଂ ସାନିଟାରୀ ଇନ୍ସପେକ୍ଟର ଥିଲେ। ଯଦି ED ର ଅଭିଯୋଗ ପ୍ରମାଣିତ ହୁଏ, ତେବେ ମାମଲାଟି ତାମିଲନାଡୁ ଇତିହାସର ସବୁଠାରୁ ବଡ଼ “ନ୍ଯୁକ୍ତି ପାଇଁ ଟଙ୍କା” ଠକେଇ ମଧ୍ୟରୁ ଗୋଟିଏ ହୋଇପାରେ ଏବଂ ରାଜ୍ୟରେ ଏକ ବଡ଼ ରାଜନୈତିକ ଝଡ଼ ସୃଷ୍ଟି କରିପାରେ।