ବୌଦ୍ଧ: ବୌଦ୍ଧ ଜିଲ୍ଲା କଣ୍ଟାମାଳ ଥାନା ଅନ୍ତର୍ଗତ ଲମ୍ବସରି ପଞ୍ଚାୟତ ସାନଝାରମୁଣ୍ଡା ମେଟାକାନି ଛକ ନିକଟରେ ଆଜି ଏକ ସାଂଘାତିକ ଗୁଳିକାଣ୍ଡ ଘଟିଯାଇଛି। ସାମାନ୍ୟ ବଚସାକୁ କେନ୍ଦ୍ର କରି ଜଣେ ଯୁବକଙ୍କୁ ନିର୍ମମ ଭାବେ ଗୁଳିମାଡ଼ କରାଯାଇଛି। ଏହି ଆକ୍ରମଣରେ ମାମୁ ଗୁରୁତର ଆହତ ହୋଇଥିବା ବେଳେ ଘଟଣାସ୍ଥଳରେ ଉପସ୍ଥିତ ଭଣଜା ଆଖି ଆଗରେ ସମଗ୍ର ସାଂଘାତିକ ଦୃଶ୍ୟ ଦେଖି ସ୍ତବ୍ଧ ହୋଇଯାଇଛନ୍ତି। ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ତୀବ୍ର ଆତଙ୍କ ଓ ଅସନ୍ତୋଷର ପରିବେଶ ସୃଷ୍ଟି ହୋଇଛି।
ସୂଚନା ଅନୁଯାୟୀ, ମାମୁ ଓ ଭଣଜା ଉଭୟ ଏକ ବାଇକ୍ ଯୋଗେ ଔଷଧ କିଣିବା ପାଇଁ ବାହାରିଥିଲେ। ସେମାନେ ସାନଝାରମୁଣ୍ଡା ମେଟାକାନି ଛକ ନିକଟରେ ପହଞ୍ଚିଥିବା ସମୟରେ କୌଣସି କାରଣକୁ ନେଇ ସ୍ଥାନୀୟ କିଛି ଲୋକଙ୍କ ସହ ସେମାନଙ୍କର ସାମାନ୍ୟ ବଚସା ଓ ପାଟିତୁଣ୍ଡ ହୋଇଥିଲା। ତେବେ ଏହି ସାମାନ୍ୟ ସିଲେଇ କଥା ଦେଖୁ ଦେଖୁ ଉଗ୍ର ରୂପ ନେଇଥିଲା। ବଚସା ଚାଲିଥିବା ବେଳେ ହଠାତ୍ ଅଭିଯୁକ୍ତ ଜଣକ ଉତ୍ତ୍ୟକ୍ତ ହୋଇ ଏକ ଆଗ୍ନେୟାସ୍ତ୍ର ବାହାର କରି ମାମୁଙ୍କ ଉପରକୁ ଗୁଳିଚାଳନା କରିଥିଲେ।
ଭଣଜାଙ୍କ ଆଖି ଆଗରେ ହିଁ ଗୁଳି ବାଜିବା ପରେ ମାମୁ ରକ୍ତଜୁଡ଼ୁବୁଡ଼ୁ ଅବସ୍ଥାରେ ତଳେ ପଡ଼ିଯାଇଥିଲେ। ଗୁଳିମାଡ଼ ପରେ ଅଭିଯୁକ୍ତ ଜଣକ ସେଠାରୁ ଚମ୍ପଟ ମାରିଥିଲା। ସ୍ଥାନୀୟ ଲୋକେ ଓ ଭଣଜା ତୁରନ୍ତ ଆହତଙ୍କୁ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତ୍ତି କରିଥିଲେ। ସେଠାରେ ତାଙ୍କର ଚିକିତ୍ସା ଜାରି ରହିଛି ଏବଂ ତାଙ୍କ ଅବସ୍ଥା ଗୁରୁତର ଥିବା ଜଣାପଡ଼ିଛି।
ଏହି ଘଟଣା ସମ୍ପର୍କରେ ଖବର ପାଇବା ପରେ ସ୍ଥାନୀୟ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। କେଉଁ କାରଣରୁ ଏହି ବଚସା ହୋଇଥିଲା ଏବଂ ଗୁଳିଚାଳନା ପଛରେ କେଉଁ ସଶସ୍ତ୍ର ଅପରାଧୀ ସାମିଲ ଅଛନ୍ତି, ସେ ନେଇ ପୁଲିସ ବିଭିନ୍ନ କୋଣରୁ ତଦନ୍ତ ଚଳାଇଛି। ପୁଲିସ ପ୍ରତ୍ୟକ୍ଷଦର୍ଶୀ ଭଣଜା ଓ ସ୍ଥାନୀୟ ଲୋକଙ୍କ ବୟାନ ରେକର୍ଡ କରିବା ସହ ଅଭିଯୁକ୍ତକୁ ତୁରନ୍ତ ଗିରଫ କରିବା ପାଇଁ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି।