ଯାଜପୁର: ରାଜ୍ୟରେ ବେଆଇନ ମଦ କାରବାର ଉପରେ ଅବକାରୀ ବିଭାଗର ଅଭିଯାନ ଜୋରଦାର ହୋଇଛି। ଯାଜପୁର ଜିଲ୍ଲା ସୁକିନ୍ଦା ଥାନା ଅଧୀନ ମଙ୍ଗରାଜପୁର ଗ୍ରାମରେ ମିଳିତ ଚଢ଼ାଉ କରି ଅବକାରୀ ବିଭାଗ ବିପୁଳ ପରିମାଣର ବେଆଇନ ଦେଶୀ ମଦ ଓ ମଦ ପ୍ରସ୍ତୁତି ସାମଗ୍ରୀ ଜବତ କରିଛି। ଚଢ଼ାଉ ସମୟରେ ପ୍ରାୟ ୮୧୦ ଲିଟର ବେଆଇନ ଦେଶୀ ମଦ ଜବତ ହୋଇଥିବା ବେଳେ ୭୨୦୦ କେଜି ଗୁଡ଼ ମହୁଲ ପୋଚ ନଷ୍ଟ କରାଯାଇଛି।
ଯାଜପୁର ଜିଲ୍ଲା ଅବକାରୀ ଅଧୀକ୍ଷକ ଅଜୟ କୁମାର ବେହେରାଙ୍କ ନିର୍ଦ୍ଦେଶକ୍ରମେ ଏହି ଚଢ଼ାଉ କରାଯାଇଥିଲା। ଜିଲ୍ଲା ମୋବାଇଲ ସ୍କ୍ୱାଡ୍ର ଅବକାରୀ ନିରୀକ୍ଷକ କେଶବ ଚନ୍ଦ୍ର ଦାସଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଟିମ୍ ମଙ୍ଗରାଜପୁର ଗ୍ରାମର ବିଭିନ୍ନ ସ୍ଥାନରେ ଚଢ଼ାଉ କରିଥିଲା। ଏହି ମିଳିତ ଅଭିଯାନରେ ଜିଲ୍ଲା ମୋବାଇଲ ସ୍କ୍ୱାଡ୍, ଡୋଲିପୁର ଅବକାରୀ ଥାନା ଏବଂ ସୁକିନ୍ଦା ଅବକାରୀ ଥାନାର କର୍ମଚାରୀମାନେ ସାମିଲ ହୋଇଥିଲେ।
ଚଢ଼ାଉ ବେଳେ ଘଟଣାସ୍ଥଳରୁ ପ୍ରାୟ ୮୧୦ ଲିଟର ବେଆଇନ ଦେଶୀ ମଦ ଜବତ କରାଯାଇଥିଲା। ଏଥିସହ ମଦ ପ୍ରସ୍ତୁତି ପାଇଁ ବ୍ୟବହାର ହେଉଥିବା ବିପୁଳ ପରିମାଣର ମହୁଲ ପୋଚ ମଧ୍ୟ ଠାବ କରାଯାଇଥିଲା। ଅବକାରୀ ଟିମ୍ ପ୍ରାୟ ୭୨୦୦ କେଜି ଗୁଡ଼ ମହୁଲ ପୋଚ ଜବତ କରିବା ସହ ଘଟଣାସ୍ଥଳରେ ତାହାକୁ ନଷ୍ଟ କରିଦେଇଥିଲା। ଏହି ପୋଚରୁ ବେଆଇନ ଦେଶୀ ମଦ ପ୍ରସ୍ତୁତ କରାଯାଉଥିବା ଅବକାରୀ ବିଭାଗ ପକ୍ଷରୁ କୁହାଯାଇଛି।
ମଙ୍ଗରାଜପୁରରେ ହୋଇଥିବା ଏହି ଚଢ଼ାଉ ଅବକାରୀ ବିଭାଗର ବେଆଇନ ମଦ ବିରୋଧୀ ଅଭିଯାନର ଅଂଶ ବୋଲି ଜଣାପଡ଼ିଛି। ଗ୍ରାମାଞ୍ଚଳରେ ଲୁଚାଛପାରେ ଚାଲୁଥିବା ଦେଶୀ ମଦ ପ୍ରସ୍ତୁତି ଓ କାରବାର ଉପରେ ନଜର ରଖାଯାଉଥିବା ବିଭାଗ ପକ୍ଷରୁ କୁହାଯାଇଛି।
ଅବକାରୀ ବିଭାଗର ସୂଚନା ଅନୁସାରେ, ବେଆଇନ ମଦ କାରବାର ବିରୋଧରେ ଆଗକୁ ମଧ୍ୟ ଚଢ଼ାଉ ଓ କାର୍ଯ୍ୟାନୁଷ୍ଠାନ ଜାରି ରହିବ। ବେଆଇନ ଭାବେ ମଦ ପ୍ରସ୍ତୁତି କିମ୍ବା ବିକ୍ରିରେ ଜଡ଼ିତ ଥିବା ବ୍ୟକ୍ତିଙ୍କ ବିରୋଧରେ ଆଇନ ଅନୁଯାୟୀ ପଦକ୍ଷେପ ନିଆଯିବ ବୋଲି ବିଭାଗ ପକ୍ଷରୁ କୁହାଯାଇଛି।