ରଞ୍ଜିତ୍ ପଣ୍ଡା
କୁଜଙ୍ଗ: କୁଜଙ୍ଗ ବ୍ଲକ୍ ପଙ୍କପାଳ ଅଂଚଳ ଏବେ ଚୋରା ମଦ ବ୍ୟବସାୟୀଙ୍କ କବଳରେ । ଏହି ଅଂଚଳରେ ଗତ କିଛି ଦିନ ତଳେ କେତକ ବ୍ରାଉନ୍ସୁଗାର ଚୋରା ବ୍ୟବସାୟୀଙ୍କୁ ପୁଲିସ ଠାବ କରିଥିବା ବେଳେ ଏବେ ଚୋରା ମଦ ଯୋଗୁ ଅଂଚଳବାସୀ ଅସ୍ତବ୍ୟସ୍ତ ହୋଇପଡିଛନ୍ତି । ଏହି ବିଷୟରେ ବହୁ ବାର କୁଜଙ୍ଗ ପୁଲିସ ଓ ଅବକାରୀ ବିଭାଗକୁ ଅବଗତ କରାଯାଇଥିବା ବେଳେ ଆଜି ରାତି ଆଠଟାରେ କୁଜଙ୍ଗ ପୁଲିସ ଚୋରା ବେପାରୀଙ୍କ ସହ ବିପୁଳ ମଦ ଜବତ କରି ବଡ ଧରଣର ସଫଳତା ପାଇଛି । କୌଣସି ଏକ ସୂତ୍ରରୁ କୁଜଙ୍ଗ ପୁଲିସ ଗୁପ୍ତ ସୂଚନା ପାଇ କଟକ-ପାରାଦ୍ୱୀପ ରାସ୍ତାରେ ପେଟ୍ରୋଲିଂ କରୁଥିବା ବେଳେ ଏକ ବାଇକ୍ ଯୋଗେ ଦୁଇ ଚୋରା ବ୍ୟବସାୟୀ କୁଜଙ୍ଗ ଅଂଚଳରୁ ମଦ ନେଇ ପଙ୍କପାଳ ଅଭିମୁଖେ ଯାଉଥିବା ବେଳେ କାବୁ କରିନେଇଥିଲେ । କୁଜଙ୍ଗ ଥାନା ଅଧିକାରୀ ଦିଲିପ୍ କୁମାର ସାହୁ ଓ ସବ୍ ଇନସ୍ପ୍ଟେର ଶୁଭ୍ରଜିତ୍ ଦାଶ ପୂର୍ବରୁ ନିଜର ପଞ୍ଝା ବସାଇଥିଲେ । ବଡପାଳ ଛକ ନିକଟରୁ ସେ ଚୋରା ବ୍ୟବସାୟୀ ମନୋଜ ଓ ତାର ସମ୍ପର୍କୀୟ ସୁବ୍ରତ ଦାସକୁ କାବୁ କରିନେବା ସହ ତାଙ୍କ ଠଟାରୁ ପ୍ରାୟ ୬୯ଟି ଦେଶୀ ମଦ ବୋତଲ ଓ ୨୭ଟି ବିଦେଶୀ ମଦ ଜବତ କରିଥିଲେ ।
ଏହି ଦୁଇ ଅଭିଯୁକ୍ତଙ୍କୁ କୁଜଙ୍ଗ ପୁଲିସ୍ ଥାନାରେ ଅଟକ ରଖିବା ସହ ଚୋରା ମଦ ବେପାର ସମ୍ପର୍କରେ ତଦନ୍ତ କରୁଛି । ପ୍ରକାଶଯେ ପଙ୍କପାଳରେ ଏକ ବିଦେଶୀ ମଦ ଦୋକାନ ଥିବା ବେଳେ ଏହାର ଏକ କର୍ମଚାରୀଙ୍କୁ ଅତି ନର୍ମମ ଭାବେ ହତ୍ୟା କରାଯାଇଥିଲା । ଫଳରେ ଉତ୍ତ୍ୟକ୍ତ ଲୋକ ଏହି ମଦ ଦୋକାନ ପୋଡିବା ସହ ଏଠାରୁ ଏହି ଦୋକାନ ଉଚ୍ଛେଦ କରିବାକୁ ସମର୍ଥ ହୋଇଥିଲେ । ମାତ୍ର ମଦ ଦେକାନ ବନ୍ଦ ହୋଇଥିବା ବେଳେ ଏବେ ଏହି ଅଂଚଳ ଧଳା ପାଉଡର ଓ ଚୋରା ମଦ ବେପାରୀଙ୍କ କବ୍ଚାରେ ରହିଥିବା ସୂଚନା ମିଳିଛି । ଏହି ଅଭିଯୁକ୍ତଙ୍କ ମଧ୍ୟରୁ କେତକ ପୂର୍ବରୁ ମଧ୍ୟ ଗିରଫ ହୋଇ ଜାମିନରେ ମୁକୁଳି ତାଙ୍କ ପସରା ମେଲାଇ ଆତଙ୍କରାଜ ଚଳାଇଥିଲେ ।