ଉତ୍ତରପ୍ରଦେଶ : ଦୁଷ୍କର୍ମ ପରି ଘଟଣା ଆମ ଦେଶରୁ ଥମିବାର ନାଁ ନେଉନାହିଁ । ଆଇନ କଡାକଡି ହେଲେ ମଧ୍ୟ ଅପରାଧୀମାନେ ଏଭଳି ପାପ କାର୍ଯ୍ୟରୁ ନିବୃତ୍ତ ରହୁନାହାନ୍ତି । ଆଜିର ସମୟରେ ନିଜ ପରିଚିତ ଲୋକଙ୍କ ପାଖରେ ମଧ୍ୟ ଝିଅଟିଏ ସୁରକ୍ଷିତ ରହୁଥିବାର ମନେ ହେଉନାହିଁ। ଉତ୍ତରପ୍ରଦେଶରେ ନିଜ ସମ୍ପର୍କୀୟମାନଙ୍କ ଦ୍ବାରା ଦୁଇ ନାବାଳିକା ଗଣଦୁଷ୍କର୍ମ ହୋଇଥିବାର ଖବର ମିଳିଛି ।
ଉତ୍ତରପ୍ରଦେଶର ମଉ ଜିଲ୍ଲାରେ ଦୁଇ ନାବାଳିକାଙ୍କୁ ବାରମ୍ବାର ଦୁଷ୍କର୍ମ ଅଭିଯୋଗରେ ଦୁଇ ଜଣଙ୍କୁ ଗିରଫ କରାଯାଇଛି । ଦୁଇ ନାବାଳିକାଙ୍କ ବୟସ ଯଥାକ୍ରମେ 9 ଓ 10 ବର୍ଷ । 22 ବର୍ଷୀୟ ଅଭିଯୁକ୍ତ ମଣ୍ଟୁ ଓ ତାଙ୍କ ସାଙ୍ଗ ଅମିତ୍ ଦୁହେଁ ନାବାଳିକାଙ୍କ ଏଭଳି ହୀନ କାମ କରୁଥିବାର ପୀଡ଼ିତାଙ୍କ ପରିବାର କହିଛନ୍ତି । ଅଭିଯୁକ୍ତ ଦ୍ବୟଙ୍କ ମଧ୍ୟରୁ ଜଣେ ପୀଡ଼ିତାଙ୍କ ସମ୍ପର୍କୀୟ ବୋଲି ଜଣାପଡିଛି । ପୁଲୀସ୍ ଅଧୀକ୍ଷକ ଦୁଇ ପୀଡ଼ିତାଙ୍କ ମେଡ଼ିକାଲ୍ ଚେକ୍ ପାଇଁ ହସ୍ପିଟାଲ୍ ପଠାଇଛନ୍ତି ।
ମିଳିଥିବା ସୂଚନା ଅନୁସାରେ ଦୁଇ ଅଭିଯୁକ୍ତ ପୀଡ଼ିତାଦ୍ବୟଙ୍କୁ କିଛି ଦିନ ଧରି ଦୁଷ୍କର୍ମ କରି ଚାଲିଥିଲେ । ଏହି ସମ୍ପର୍କରେ କାହାକୁ କିଛି କହିଲେ ଜୀବନରୁ ମାରିଦେବାର ଧମକ ମଧ୍ୟ ଦେଇଥିବାର ପୀଡ଼ିତା ଦ୍ବୟ ସ୍ବୀକାର କରିଛନ୍ତି । ପୀଡ଼ିତାଙ୍କ ବଡ ଭଉଣୀଙ୍କୁ ପୀଡ଼ିତା ଦ୍ବୟ ଏ ସମ୍ପର୍କରେ ସୂଚନା ଦେଇଥିବାବେଳେ ମାମଲାଟି ସାମ୍ନାକୁ ଆସିଥିଲା । ଅଭିଯୁକ୍ତଙ୍କ ବିରୋଧରେ ଧାରା 376ଡି (ଗଣଦୁଷ୍କର୍ମ) ଓ ପୋକ୍ସୋ ଅଧିନିୟମ ଅନ୍ତର୍ଗତ ଧାରା ଅନୁଯାୟୀ ମାମଲା ରୁଜୁ କରାଯାଇ ଜେଲ୍କୁ ପଠାଯାଇଛି ।
