ଭୁବନେଶ୍ବର: ଅଶ୍ୱିନ ମାସର ଶୁକ୍ଲ ପକ୍ଷ ପୂର୍ଣ୍ଣିମାକୁ କୁମାର ପୂର୍ଣ୍ଣିମା ବା ଶରଦ ପୂର୍ଣ୍ଣିମା ବା ରାସ ପୂର୍ଣ୍ଣିମା କୁହାଯାଏ। ଜ୍ୟୋତିଷ ଶାସ୍ତ୍ରରେ ବିଶ୍ବାସ ରହିଛି ଯେ କେବଳ ଏହି ପୂର୍ଣ୍ଣିମାରେ ଚନ୍ଦ୍ର ଷୋଳ କଳାରେ ପରିପୂର୍ଣ୍ଣ ହୁଅନ୍ତି। ଚଳିତ ବର୍ଷ ଶରଦ ପୂର୍ଣ୍ଣିମା ବା କୁମାର ପୂର୍ଣ୍ଣିମା ଆସନ୍ତକାଲି ରବିବାର, ଅକ୍ଟୋବର ୯ ତାରିଖରେ ପଡୁଛି। କୁମାର ପୂର୍ଣ୍ଣିମା ଅଶ୍ୱିନ ମାସରେ ପଡୁଥିବାରୁ ଏହାକୁ ଅଶ୍ୱିନ ପୂର୍ଣ୍ଣିମା ମଧ୍ୟ କୁହାଯାଏ ।
ଅଶ୍ୱିନ୍ ଶୁକ୍ଲ ପକ୍ଷର ପୂର୍ଣ୍ଣିମା ଅର୍ଥାତ୍ କୁମାର ପୂର୍ଣ୍ଣିମା ଅକ୍ଟୋବର ୯ ତାରିଖ ରବିବାର ଦିନ ଭୋର ୩:୪୧ ରୁ ଆରମ୍ଭ ହେବ। ପୂର୍ଣ୍ଣିମା ତିଥି ପରଦିନ ଅକ୍ଟୋବର ୧୦ ସୋମବାର ଦିନ ୨:୨୫ ରେ ଶେଷ ହେବ।
ଶାସ୍ତ୍ର ଅନୁଯାୟୀ, କୁମାର ପୂର୍ଣ୍ଣିମାରେ ଦେବୀ ଲକ୍ଷ୍ମୀ ତାଙ୍କ ବାହାନ ପେଚା ଉପରେ ପୃଥିବୀ ଭ୍ରମଣ କରି ତାଙ୍କ ଭକ୍ତମାନଙ୍କ ଦୁଃଖ ଦୂର କରିଥାନ୍ତି। ସେଥିପାଇଁ କୁମାର ପୂର୍ଣ୍ଣିମା ଦିନ ଗଜଲକ୍ଷ୍ମୀ ପୂଜା ମଧ୍ୟ କରାଯାଇଥାଏ।
ଏହି ଦିନରେ କେବଳ ଷୋହଳ କଳା ସହ ଚନ୍ଦ୍ର ଉଜ୍ଜ୍ୱଳ ହେବା ସହିତ ଏହାର କିରଣରେ କିଛି ଆରୋଗ୍ୟ ଗୁଣ ରହିଛି ଯାହା ଶରୀର ଏବଂ ଆତ୍ମାକୁ ପୋଷଣ କରିଥାଏ । ଏହା ମଧ୍ୟ ବିଶ୍ୱାସ କରାଯାଏ ଯେ କୁମାର ପୂର୍ଣ୍ଣିମା ଦିନ ଚନ୍ଦ୍ର କିରଣ ଅମୃତ ସମାନ ହୋଇଥାଏ। ତେଣୁ, ଏହି ଦିନ ଗାଈ କ୍ଷୀରରୁ ପ୍ରସ୍ତୁତ ଚାଉଳ ଖିରି ତିଆରି କରାଯାଏ ରାତିସାରା ଚନ୍ଦ୍ର ଆଲୋକରେ ରଖାଯାଇଥାଏ। ସକାଳେ, ଏହି ଖୀର ଖାଇ ପରିବାର ସଦସ୍ୟଙ୍କ ମଧ୍ୟରେ ପ୍ରସାଦ ଭାବରେ ବଣ୍ଟନ କରାଯାଏ।
