ଭୁବନେଶ୍ବର, ଭୁବନେଶ୍ବରର ପ୍ରଦର୍ଶନୀ ପଡିଆରେ ଚାଲିଥିବା ହସ୍ତଶିଳ୍ପ ପ୍ରଦର୍ଶନୀରେ ଧିରେଧିରେ ଲୋକଙ୍କ ଭିଡ ଜମିବାରେ ଲାଗିଛି। ପାଗ ଖରାପ ସତ୍ବେ ପ୍ରତ୍ୟେକ ଦିନ ବହୁ ଲୋକ ଏହି ପ୍ରଦର୍ଶନୀକୁ ଆସୁଥିବାର ପରିଲକ୍ଷିତ ହୋଇଛି। ରାଜ୍ୟ ହସ୍ତ ଓ କୁଟୀର ଶିଳ୍ପ ବିଭାଗ ଦ୍ବାରା ଆୟୋଜିତ ଏହି ପ୍ରଦର୍ଶନୀ ଗତ ମାର୍ଚ୍ଚ 2 ତାରିଖରୁ ଆରମ୍ଭ ହୋଇଛି। ମୁଖ୍ୟତଃ ରାଜ୍ୟର ହସ୍ତଶିଳ୍ପ କାରୀଗରଙ୍କୁ ଏକ ବଜାର ସୃଷ୍ଟି କରିବା ପାଇଁ ଏହି ପ୍ରଦର୍ଶନୀର ଆୟୋଜନ କରାଯାଇଛି।
ପ୍ରତିବର୍ଷ ଆୟୋଜିତ ହେଉଥିବା ଏହି ପ୍ରଦର୍ଶନୀରେ ଚଳିତ ବର୍ଷ 110ଟି ଷ୍ଟଲରେ ବିଭିନ୍ନ ସାମଗ୍ରୀ ପ୍ରଦର୍ଶିତ କରାଯାଇଛି। ଏଥିରେ ରାଜ୍ୟର ପ୍ରାୟ 22 ଟି ଜିଲ୍ଲାର କାରୀଗରମାନେ ସେମାନଙ୍କ ହସ୍ତକଳା ପ୍ରଦର୍ଶିତ କରିଛନ୍ତି। ମୁଖ୍ୟତଃ ଏହି ପ୍ରଦର୍ଶନୀରେ ବିଭିିନ୍ନ ସାମଗ୍ରୀ କିପରି ନିର୍ମାଣ ହୁଏ ତାହର କୌଶଳ କାରୀଗରମାନେ ଦର୍ଶକଙ୍କୁ ଦେଖାଉଛନ୍ତି। ଫଳରେ ସେହି ଷ୍ଟଲରେ ଭିଡ ଅଧିକ ପରିଲକ୍ଷିତ ହୋଇଛି। ଏଥିରେ ଧାନ ତିଆରି ହସ୍ତକଳା, ଜନଜାତି ଅଳଙ୍କାର, ପଥର ଖୋଦେଇ, କାଠ ଖୋଦେଇ ପ୍ରଭୃତି ସାମଗ୍ରୀର ନିର୍ମାଣ କୌଶଳ ପ୍ରଦର୍ଶିତ କରାଯାଉଛି।
ଏଥିସହିତ ଏହି ପ୍ରଦର୍ଶନୀରେ ରଂଗବେରଂଗର ଲାଖ ଚୁଡି, ପିତ୍ତଳ ଘରସଜା, ହାତତିଆରି ଅଳଙ୍କାର, ତାରକାସୀ କାମର ବିଭିନ୍ନ ଜିନିଷ ପ୍ରଦର୍ଶୀତ କରାଯାଇଛି। ଏହି ପ୍ରଦର୍ଶନୀ ପ୍ରତିଦିନ ଅପରାହ୍ନ 2ଟାରୁ ରାତି 9ଟା ପର୍ଯ୍ୟନ୍ତ ଖୋଲା ରହୁଛି। ଆସନ୍ତା 8 ତାରିଖରେ ଏହି ପ୍ରଦର୍ଶନୀ ଶେଷ ହେବ।