ସମୀକ୍ଷା ବ୍ଯୁରୋ
ସଭିକା ଖୁନ ହୈ ସାମିଲ ୟହାଁ କି ମିଟ୍ଟି ମେ
କିସିକେ ବାପ କା ହିନ୍ଦୁସ୍ତାନ ଥୋଡି ହୈ॥
ଭାରତ ବା ହିନ୍ଦୁସ୍ତାନ କୌଣସି ଜାତି କି ଧର୍ମର ନୁହେଁ, ଏ ମାଟି ପ୍ରତ୍ଯେକ ଭାରତୀୟର। ସମକାଳୀନ ଉର୍ଦ୍ଦୁ କବିତାକୁ ଲୋକପ୍ରିୟତାର ଶିଖରରେ ପହଞ୍ଚାଇଥିବା ଓ ଲୋକ ଜୀବନର ସ୍ଵରକୁ ନିଜ କବିତାରେ ଅଧିକ ପ୍ରଖର କରିଥିବା ମହାନ କବି ରାହତ ଇନ୍ଦୋରୀ ଆଜି ମୃତ୍ୟୁ ବରଣ କରିଛନ୍ତି। ଗତ କାଲି ରାହତ ଇନ୍ଦୋରୀ କରୋନା ଆକ୍ରାନ୍ତ ହୋଇଥିବାର ଖବର ଆସିଥିଲା। ଭାରତୀୟ ଉର୍ଦ୍ଦୁ କବିତାରେ ସେ ଥିଲେ ସର୍ବାଧିକ ଜନପ୍ରିୟ ଲୋକକବି। ତାଙ୍କ କବିତାରେ ଭାରତୀୟ ଜୀବନର ଅନନ୍ୟ ଚିତ୍ର ଓ ଚରିତ୍ର ଭରି ରହିଥିଲା।
ଲୋକପ୍ରିୟ ଗଜଲ୍ ଲେଖକ ଭାବରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଥିବା ରାହତ ଇନ୍ଦୋରୀ ୧୪ରୁ ଅଧିକ ବଲିଉଡ୍ ଫିଲ୍ମ ପାଇଁ ଗୀତ ଲେଖିଛନ୍ତି। ଏହା ସହିତ ସେ ୭ ଟି ପୁସ୍ତକ ମଧ୍ୟ ରଚନା କରିଛନ୍ତି । ଗତକାଲି କରୋନା ଲକ୍ଷଣ ଦେଖା ଦେବାରୁ ତାଙ୍କୁ ଇନ୍ଦୋର ସ୍ଥିତ ଅରବିନ୍ଦ ହସ୍ପିଟାଲରେ ଭର୍ତ୍ତି କରାଯାଇଥିଲା । ମୃତ୍ୟୁ ବେଳକୁ ତାଙ୍କୁ ୭୦ ବର୍ଷ ହୋଇଥିଲା। ୧୯୫୦ ମସିହା ଜାନୁଆରୀ ୧ ତାରିଖରେ ରାହତ୍ ଇନ୍ଦୋରୀ ଇନ୍ଦୋର୍ଠାରେ ଜନ୍ମଗ୍ରହଣ କରିଥିଲେ । ତାଙ୍କ ପୈତୃକ ନାମ ରାହତ୍ କ୍ୟୁରେସି ଥିବାବେଳେ ପରବର୍ତ୍ତୀ ସମୟରେ ସେ ରାହତ୍ ଇନ୍ଦୋରୀ ନାମରେ ପରିଚିତି ହାସଲ କରିଥିଲେ । ଭୋପାଳ ସ୍ଥିତ ବର୍କତଉଲ୍ଲା ବିଶ୍ୱବିଦ୍ୟାଳୟରୁ ଉର୍ଦ୍ଦୁରେ ସ୍ନାତକୋତ୍ତର ଶିକ୍ଷା ହାସଲ କରିଥବାବେଳେ ୧୯୭୫ରେ ରାଜା ଭୋଜ ବିଶ୍ୱ ବିଦ୍ୟାଳୟରୁ ଉର୍ଦ୍ଦୁରେ ପିଏଚଡି ଡିଗ୍ରୀ ହାସଲ କରିଥିଲେ ।
ତାଙ୍କର ବହୁ ପ୍ରସିଦ୍ଧ କବିତାର ଧାଡି ଭାରତୀୟ ଜନମାନସରେ ପ୍ରଚୁର ଛାପ ଛାଡି ଯାଇଛି। ତାଙ୍କ ଜାତୀୟତାବୋଧ, ଏକତାର ସ୍ଵର ଓ ମାନବିକତାର ତୀବ୍ର ଆବେଦନ ରହିଥିଲା। କ୍ଷମତା ପ୍ରତି ତୀବ୍ର କଟାକ୍ଷ ତାଙ୍କ କବିତାର ଆଉ ଏକ ବିଶେଷ ଲକ୍ଷଣ। ସୀମା ବିବାଦକୁ ନେଇ ତାଙ୍କର ତୀବ୍ର କଟାକ୍ଷ –
ସରହଦୋ ପର ବହୁତ ତନାବ ହୈ କ୍ଯା
ପତା ତୋ କରୋ କୋଇ ଚୂନାବ ହୈ କ୍ଯା।
ମୁନ୍ନାଭାଇ ଏମବିବିଏସ, ମିଶନ କାଶ୍ମୀର ଭଳି ସିନେମାର ଲୋକପ୍ରିୟ ଗୀତିକାର ଭାବରେ ତାଙ୍କର ଆଉ ଏକ ପରିଚୟ ରହିଥିଲା। ରାହତ ଇନ୍ଦୋରୀଙ୍କ ବିୟୋଗରେ ଭାରତୀୟ କବିତା ନିଜ ସମୟର ସବୁଠୁ ଲୋକପ୍ରିୟ ସ୍ବରଟିକୁ ଆଜି ହରାଇ ଦେଇଛି।