ମୁମ୍ବାଇ, ପଶ୍ଚିମବଂଗ ନିର୍ବାଚନରେ ପ୍ରତିଦ୍ବନ୍ଦିତା କରିବ ମହାରଷ୍ଟ୍ର ସରକାରରେ ଥିବା ଶିବସେନା ଦଳ। ଆଜି ଏ ନେଇ ଦଳର ବରିଷ୍ଠ ନେତା ତଥା ସାଂସଦ ସଂଜୟ ରାଉତ ସୂଚନା ଦେଇଛନ୍ତି। ସେ କହିଛନ୍ତି ଯେ, ପଶ୍ଚିମବଂଗରେ ନିର୍ବାଚନ ଲଢିବା ପାଇଁ ବହୁ ଆଗରୁ ପ୍ରସ୍ତୁତି ଚାଲିଥିଲା। ହେଲେ ତାହା ଠିକରେ ରୂପରେଖ ନେଇପାରି ନ ଥିଲା। ବର୍ତ୍ତମାନ ଦଳର ମୁଖ୍ୟ ଉଦ୍ଧବ ଠାକରେ ରାଜି ହେବା ପରେ ଆମେ ପଶ୍ଚିମବଂଗରେ ପ୍ରାର୍ଥୀ ଠିଆ କରାଇବୁ।
ଏହାକୁ ନେଇ ଉଭୟ ମହାରାଷ୍ଟ୍ର ଏବଂ ପଶ୍ଚିମବଂଗ ରାଜନୀତିରେ ହଇଚଇ ସୃଷ୍ଟି ହୋଇଛି। ବିଶେଷ କରି ଟିଏମସି ନେତ୍ରୀ ତଥା ମୁଖ୍ୟମନ୍ତ୍ରୀ ମମତା ବାନାର୍ଜି ଚିନ୍ତାରେ ପଡି ଯାଇଛନ୍ତି।ଜୟ ହିନ୍ଦ ଜୟ ବଙ୍ଗଳା କହି ସଂଜୟ କହିଛନ୍ତି ଯେ, ଖୁବ ଶିଘ୍ର ଆମେ କୋଲକାତାରେ ପହଁଞ୍ଚିବୁ।
ଶିବସେନାର ଏପରି ଘୋଷଣା ପରେ ବର୍ତ୍ତମାନ ରାଜନୈତିକ ମହଲରେ ଅଙ୍କ କଷା ଆରମ୍ଭ ହୋଇଯାଇଛି। କାରଣ ପୂର୍ବରୁ ଏଆଇଏମଆଇଏମ ମଧ୍ୟ ପଶ୍ଚିମବଂଗରେ ପ୍ରାର୍ଥୀ ଦେବ ବୋଲି ଘୋଷଣା କରିଛି। ଫଳରେ ଏହି ସମୀକରଣ ବିଜେପି ନା ଟିଏମସି କାହାକୁ ସୁହାଇବ ତାହା ଜଣାପଡି ନାହିଁ।
ମହାରାଷ୍ଟ୍ରରେ ଶିବ ସେନା କଂଗ୍ରେସ ଏବଂ ଏନସିପି ସହିତ ମିଳିତ ଭାବେ ସରକାର ଗଠନ କରିଛନ୍ତି। ବିଜେପିକୁ କଡା ଟକ୍କର ଦେଇ ଏହି ମେଣ୍ଟ ସରକାରକୁ ଆସିଛି। ବର୍ତ୍ତମାନ ପଶ୍ଚିମ ବଂଗରେ ଦଳର ଆଭିମୁଖ୍ୟ କଣ ରହିବ ତାହା ସ୍ପଟ ହୋଇ ନାହିଁ। ହେଲେ ଏହା ନିଶ୍ଚିତ ଯେ, ଶିବ ସେନା ନିଶ୍ଚିତ ଭାବେ ବିଜେପି ବିରୋଧରେ ଲଢେଇ ଜାରି ରଖିବ।
ତେବେ ଶିବ ସେନା କଂଗ୍ରେସ ସହିତ ପଶ୍ଚିମ ବଂଗରେ ମେଣ୍ଟ କରିବ କି ନାହିଁ ତାହା ମଧ୍ୟ ସ୍ପଷ୍ଟ ହୋଇ ନାହିଁ। ପଶ୍ଚିମ ବଂଗର ରାଜନୈତିକ ସମୀକ୍ଷକଙ୍କ ମତରେ ଶିବ ସେନା ପଶ୍ଚିମ ବଂଗରେ ତାହା ଭିତ୍ତିଭୂମି ନାହିଁ। ହେଲେ ବିଜେପିକୁ ପରାସ୍ତ କରିବା ପାଇଁ ହୁଏତ ଶିବସେନା ଟିଏମସି ସହିତ ମେଣ୍ଟ କରିପାରେ ବୋଲି ଅନୁମାନ କରାଯାଉଛି।
ପଶ୍ଚିମବଂଗ ସରକାରଙ୍କ କାର୍ଯ୍ୟକାଳ ଆସନ୍ତା ମେ 27 ତାରିଖରେ ଶେଷ ହେଉଛି। 294 ଆସନ ପାଇଁ ଏପ୍ରିଲ ମେ ରେ ନିର୍ବାଚନ ହେବ ବୋଲି ଜଣାପଡିଛି।