ଭୁବନେଶ୍ବର, ଗତ କରୋନା ବେଳେ ନବୀନ ପଟ୍ଟନାୟକ ଯେପରି ସଫଳ ପରିଚାଳନା କରିଥିଲେ ସେଥିପାଇଁ ଦେଶ ବିଦେଶରୁ ମିଲିଥିଲା ପ୍ରଶଂସା। ଏଥର ମଧ୍ୟ ସେହିପରି ଘଟଣା ପରିଲକ୍ଷିତ ହୋଇଛି। ଏଥର ହେଉଛି ଅକ୍ସିଜନ ବିତରଣକୁ ନେଇ। ଦେଶର ବିଭିନ୍ନ ରାଜ୍ୟରେ ଯେପରି କୋଭଡି ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି ସେଥିରେ ଅକ୍ସିଜେନ ବା ଅମ୍ଲଜାନର ଘୋର ଅଭାବ ମଧ୍ୟ ପରିଲକ୍ଷିତ ହୋଇଛି। ଏପରି ପରିସ୍ଥିତିରେ ଓଡିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସହଯୋଗର ହାତ ବଢାଇଛନ୍ତି। ଓଡିଶାରୁ ଉତ୍ପାଦନ ହେଉଥିବା ଆକ୍ସିଜେନ ବର୍ତ୍ତମାନ ସେ 8ଟି ରାଜ୍ୟକୁ ବିତରଣ କରିଛନ୍ତି। ସେହି ରାଜ୍ୟଗୁଡିକ ହେଲା ମହାରାଷ୍ଟ୍ର, ଦିଲ୍ଲୀ, ତେଲଙ୍ଗାନା, ଆନ୍ଧ୍ରପ୍ରଦେଶ, ମଧ୍ୟପ୍ରଦେଶ, ଉତ୍ତରପ୍ରଦେଶ, ହରିୟାନ ଏବଂ ବିହାର।
ଏହି ରାଜ୍ୟଗୁଡିକ ଅକ୍ସିଜେନ ମାଗିବା ପୂର୍ବରୁ ନବୀନ ତାଙ୍କ ପାଖକୁ ପଠାଇ ଦେଇଛନ୍ତି। ଫଳରେ ନବୀନଙ୍କ ଏପରି କାର୍ଯ୍ୟକୁ ଖୋଦ ଏହି ରାଜ୍ୟର ମୁଖ୍ୟମନ୍ତ୍ରୀମାନେ ମଧ୍ୟ ପ୍ରଶଂସା କରିଛନ୍ତି। ସେତିକି ନୁହେଁ ସାରା ଦେଶର ଲୋକେ ନବୀନଙ୍କ ଏପରି ବଦାନ୍ୟତାକୁ ବାଃ ବାଃ କରିଛନ୍ତି। ଏପରି କରିବାର କାରଣ ମଧ୍ୟ ରହିଛି। କାରଣ ହେଲା ବର୍ତ୍ତମାନ ମହାମାରୀ ସମୟରେ ନିଜ ରାଜ୍ୟକୁ ସମ୍ଭାଳିବା ସରକାରଙ୍କୁ କଷ୍ଟକର ହୋଇ ଯାଉଛି। ହେଲେ ନବୀନ ସେ ସବୁକୁ ଅନୁଧ୍ୟାନ କରି ବଳକା ଅକ୍ସିଜେନ ଅନ୍ୟ ରାଜ୍ୟକୁ ବିତରଣ କରିଛନ୍ତି। କୌଣସି କୁଣ୍ଠାବୋଧ କରି ନାହାଁନ୍ତି। ସେତିକି ନୁହେଁ ସେହି ଅକ୍ସିଜେନ ଗାଡିଗୁଡିକ କିପରି ଠିକରେ ଯାଇପାରିବ ସେଥିପାଇଁ ପୋଲିସର ମଧ୍ୟ ବ୍ୟବସ୍ଥା କରିଛନ୍ତି। ଏଥିସହିତ ଅକ୍ସିଜେନ ଠିକରେ ପହଞ୍ଚିଲା କି ନାହିଁ ତାହା ନିଶ୍ଚିତ କରିବା ପାଇଁ ଜଣେ ସରକାରୀ ଅଧିକାରୀଙ୍କୁ ମଧ୍ୟ ପଠାଯାଇଛି। ଯାହା କେହି ଭାବି ନ ଥିବେ ସେହି ସମୟରେ ନବୀନଙ୍କ ଏପରି ପଦକ୍ଷେପ ନିଅନ୍ତି। ଫଳରେ ସାରା ବିଶ୍ବରୁ ପ୍ରଂଶସାର ସୁଅ ଛୁଟିବାରେ ଲାଗିଛି।
ନବୀନ ଦିଲ୍ଲୀର ଶୋଚନୀୟ ଅବସ୍ଥାକୁ ଅନୁଧ୍ୟାନ କରି ପ୍ରଥମେ ସେ 40 ଟନ୍ ଅକ୍ସିଜେନ ପ୍ରେରଣ କରିଛନ୍ତି। ସେ ଗାଡି ପହଞ୍ଚିବା ପରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରୱାଲା ନବୀନଙ୍କୁ ଧନ୍ୟବାଦ ଦେଇଥିଲେ। ସେତିକି ନୁହେଁ ନବୀନ ଦିଲ୍ଲୀକୁ ଆଉ 100 ଟନ ଅକ୍ସିଜେନ ଦେବା ପାଇଁ ପ୍ରସ୍ତୁତ ଅଛନ୍ତି। ହେଲେ ଦିଲ୍ଲୀ ସରକାର ବିମାନ କିମ୍ବା ଟ୍ୟାଙ୍କର ଯୋଗାଡ କରିପାରୁ ନ ଥିବାରୁ ତାହା ପଠାଇବାରେ ବିଳମ୍ବ ହୋଇଛି। ଏହାପରେ ପରେ ବିହାର, ତେଲଙ୍ଗାନା, ମହାରାଷ୍ଟ୍ର, ମଧ୍ୟପ୍ରଦେଶ ଏବଂ ଆନ୍ଧପ୍ରଦେଶକୁ 40 ଟନ ଲେଖାଏଁ ଅକ୍ସିଜେନ ପ୍ରେରଣ କରିଛନ୍ତି। ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ମଧ୍ୟ ନିଜ ଟୁଇଟି ଜରିଆରେ ନବୀନ ପଟ୍ଟନାୟକଙ୍କର ଏପରି କାର୍ଯ୍ୟକୁ ପ୍ରଂଶସା କରିଛନ୍ତି। ତିନିଦିନ ମଧ୍ୟରେ ମୋଟ 29ଟି ଟ୍ୟାଙ୍କରରେ 510 ମେଟ୍ରିକଟନ ଅକ୍ସିଜେନ ପଠାଯାଇଛି।
ବର୍ତ୍ତମାନ ଓଡିଶାରୁ ଘରୋଇ କଂପାନୀଗୁଡିକ ଅକ୍ସିଜେନ ଉତ୍ପାଦନ କରୁଛନ୍ତି। ସେଗୁଡିକ ମଧ୍ୟରେ ରହିଛି ଅନୁଗୁଳର ଜେଏସପିଏଲ, ଢେଙ୍କାନାଳର ଟାଟା ଭୂଷଣ ଷ୍ଟିଲ, କଳିଙ୍ଗନଗରର ଟାଟା ଷ୍ଟିଲ ଏବଂ ରାଉରକେଲାର ଜେଏସଏଲ। ଏସବୁ କଂପାନୀରୁ ଯେତେ ପରିମାଣର ଅକ୍ସିଜେନ ଉତ୍ପାଦନ ହେଉଛି ତାହା ଓଡିଶା ପାଇଁ ଯଥେଷ୍ଠ ବଳକା ରହୁଛି। ଏପରିକି କୌଣସି ଅପ୍ରିତିକର ପରିସ୍ଥିତି ମୁକାବିଲା ପାଇଁ କୌଣସି ଅସୁବିଧା ହେବ ନାହିଁ ବୋଲି ଆକଳନ ମଧ୍ୟ କରାଯାଇଛି। କାରଣ ଏସବୁ କଂପାନୀ ଯେପରି ଧାରାବାହିକ ଭାବେ ଅକ୍ସିଜେନ ଉତ୍ପାଦନ କରୁଛନ୍ତି ସେଥିରେ ସେହି ପରିସ୍ଥିତିକୁ ସାମନା କରିହେବ। ସେଥିପାଇଁ ନବୀନ ଆହୁରି ଅକ୍ସିଜେନ ପଠାଇବା ପାଇଁ ମଧ୍ୟ ରାଜି ଅଛନ୍ତି। ଏପରି ବିପଦ ସମୟରେ ନବୀନ ଅନ୍ୟ ମୁଖ୍ୟମନ୍ତ୍ରୀଙ୍କ ସହିତ ଛିଡା ହେଲେ, ତାହା ହିଁ ମହନୀୟତାର ପରିଚୟ ଦେଇଛି।