ଭୁବନେଶ୍ବର, କେନ୍ଦ୍ର ସରକାର ଗତ ସାତ ତାରିଖରେ ମନ୍ତ୍ରୀ ମଣ୍ଡଳ ଅଦଳବଦଳ ସହିତ ସଂପ୍ରସାର ମଧ୍ୟ କରିଛନ୍ତି। ଏଥିରେ ଯେଉଁମାନେ ଦକ୍ଷତା ପ୍ରତିପାଦନ କରାଇ ନାହିଁନ୍ତି ସେମାନଙ୍କୁ ମନ୍ତ୍ରୀ ମଣ୍ଡଳରୁ ଛୁଟି ପ୍ରଦାନ କରିଦେଇଛନ୍ତି। ସେଥିରେ ଓଡିଶାର ସାଂସଦ ପ୍ରତାପ ଷଡଙ୍ଗୀ ହେଉଛନ୍ତି ଜଣେ। ଏଥିରେ ମୋଦି ଯୁବ ନେତୃତ୍ୟକୁ ପ୍ରାଧାନ୍ୟ ଦେଇଛନ୍ତି।
ସେହି ଆଧାରରେ ବର୍ତ୍ତମାନ ଓଡିଶାର ମନ୍ତ୍ରୀମଣ୍ଡଳର ରୂପରେଖ ମଧ୍ୟ ପରିବର୍ତ୍ତନ ହେବ। ଏଥର ଯେଉଁମାନେ ଅଯୋଗ୍ୟ ମନ୍ତ୍ରୀ ସେମାନଙ୍କୁ ମନ୍ତ୍ରମଣ୍ଡଳରୁ ଛୁଟି ଦିଆଯିବ। ତେବେ ଏହି ଆଯୋଗ୍ୟ ମନ୍ତ୍ରୀମାନେ କିଏ ସେ ନେଇ ତାଲିକା ପ୍ରସ୍ତୁତ କରୁଛନ୍ତି ଖୋଦ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏନେଇ କିଛିମାସ ତଳେ ନବୀନ ମନ୍ତ୍ରୀମାନଙ୍କର ପରୀକ୍ଷା ନେଇଥିଲେ। ସେହି ଆଧାରରେ କିଏ ପାଶ୍ , କିଏ ଫେଲ ହେବ ମାର୍କିଂ କରାଯାଉଛି।
ଦଳର ଜଣେ ବରିଷ୍ଠ ନେତାଙ୍କ କହିବା ଅନୁସାରେ ବର୍ତ୍ତମାନ ନବୀନ କେତେ ଜଣ ଅଯୋଗ୍ୟ ତାଲିକା କରିଛନ୍ତି ତାହା କହିବା ମୁସ୍କୁଲି। ହେଲେ ବର୍ତ୍ତମାନ ସାତ ଜଣ ମନ୍ତ୍ରୀଙ୍କ ସଂପର୍କରେ ବାରମ୍ବାର ତଦାରଖ କରାଯାଉଛି। କାରଣ ସେମାନଙ୍କର ପ୍ରଦର୍ଶନ ଭଲ ନାହିଁ। ଏହି ମନ୍ତ୍ରୀମାନେ ହେଲେ ପଦ୍ମିନୀ ଦିଆନ, ପ୍ରେମାନନ୍ଦ ନାୟକ, ରଘୁନନ୍ଦନ ଦାସ, ପ୍ରଫୁଲ୍ଲ କୁମାର ମଲ୍ଲିକ, ଜଗନ୍ନାଥ ସାରକା, ସୁଦାମ ମାରାଣ୍ଡି, ଜ୍ୟୋତି ପାଣିଗ୍ରାହୀଙ୍କ ପ୍ରତି ସବୁଠାରୁ ବେଶୀ ବିପଦ ରହିଛି।
ଏମାନଙ୍କୁ କୌଣସି ନା କୌଣସି ପରିସ୍ଥିତିରେ ମନ୍ତ୍ରୀ କରାଯାଇଥିଲା। ହେଲେ ପରବର୍ତ୍ତି ସମୟରେ ଏହି ପଦର ଗୁରୁତ୍ବ କଣ ତାହା ଏମାନେ ଉପଲବଧି କରିପାରୁ ନାହାଁନ୍ତି। ଫଳରେ ଏମାନେ ମନ୍ତ୍ରୀ ମଣ୍ଡଳରୁ ବିଦା ହେବା ସମ୍ଭାବନା ଅଧିକ ଅଛି ବୋଲି କୁହାଯାଇଛି। ତେବେ ନୂଆ ମନ୍ତ୍ରୀ ମଣ୍ଡଳରେ ଏମାନଙ୍କ ବଦଳରେ ଉଭୟ ଯୁବ ଓ ବରିଷ୍ଠ ବିଧାୟକଙ୍କୁ ମନ୍ତ୍ରୀ ପଦ ଦିଆଯିବ ବୋଲି ଏହି ନେତା ଜଣଙ୍କ କହିଛନ୍ତି।
ତେବେ ତିନିଠାକୁର ଶ୍ରୀମନ୍ଦିରରେ ପ୍ରବେଶ କରିବା ପରେ ରାଜ୍ୟ ମନ୍ତ୍ରୀ ମଣ୍ଡଳ ଅଦଳବଦଳ ପକ୍ରିୟା କରାଯିବ ବୋଲି ଜଣାପଡିଛି।