ପୁରୀ, ଶ୍ରୀମନ୍ଦିରର ସଠିକ୍ ପରିଚାଳନା ପାଇଁ ଆଠଟି ସବ କମିଟି ଗଠନ କରାଯିବ। ଆସନ୍ତା କିଛି ଦିନ ମଧ୍ୟରେ ଏହାର ବିବରଣୀ ପ୍ରଦାନ କରାଯିବ। ଆଜି ରାଜ୍ୟ ସରକାର ଗଠନ କରିଥିବା ନୂଆ ପରିଚାଳନା କମିଟ ବୈଠକରେ ଏହି ନିଷ୍ପତି ଗ୍ରହଣ କରାଯାଇଛି। ଗଜପତି ମହାରାଜା ଦିବ୍ୟସିଂହ ଦେବଙ୍କ ଅଧ୍ୟକ୍ଷତାରେ ଏହି କମିଟ ବୈଠକ ହୋଇଥିଲା। ଏଥିରେ ମୁଖ୍ୟ ଶାସନ ସଚିବ ସୁରେଶ ମହାପାତ୍ର, ମୁଖ୍ୟ ପ୍ରଶାସକ କିଷନ କୁମାର, ପୁରୀ କଲେକ୍ଟର ସମର୍ଥା ବର୍ମା, ଏସପି ବିଶାଲ ସିଂ ଏବଂ ଅନ୍ୟମାନେ ଉପସ୍ଥିତ ଥିଲେ।
ଏହି କମିଟ ଯେଉଁ ସବ କମିଟ ଗଠନ ପାଇଁ ପ୍ରସ୍ତାବ ଦେଇଛନ୍ତି ସେଗୁଡିକ ହେଲା ଅର୍ଥ, ନୀତିକାନ୍ତି, ରତ୍ନା ଭଣ୍ଡାର, ଅଭିଯୋଗ, ଜମିଜମା, ସେବାୟତ କଲ୍ୟାଣ, ଶ୍ରୀ ଜଗନ୍ନାଥ ଗବେଷଣା ଏବଂ ପ୍ରକାଶନ ଏବଂ ପେନସନ ଏବଂ ଅନ୍ୟାନ୍ୟ କମିଟି ଗଠନ ରହିଛି।
ଏହି କମିଟ ବୈଠକରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ କିଷନ କୁମାର ନିଆଯାଇଥିବା ବିଭିନ୍ନ ପଦକ୍ଷେପ ସଂପର୍କରେ ଅବଗତ କରାଇଥିଲେ। ସେଥିରେ ସେବାୟତଙ୍କ ପିଲାମାନଙ୍କୁ ଶିକ୍ଷା ଯୋଗାଇବା ପାଇଁ ଗୁରୁକୁଲ ପ୍ରକଳ୍ପ ଅଗ୍ରଗତି ସଂପର୍କରେ କହିଥିଲେ। ଏହି ଶିକ୍ଷାନୁଷ୍ଠାନ ପରିଚାଳନା ପାଇଁ ଶ୍ରୀମନ୍ଦିର ଆଦର୍ଶ ଗୁରୁକୁଳ ସୋସାଇଟି ଏବଂ ଶ୍ରୀମନ୍ଦିର ଗୁରୁକୁଳ ପାଣ୍ଠି ଗଠନ କରାଯିବ। ଗୁରୁକୁଳ ପ୍ରତିଷ୍ଠା ପାଇଁ ମାଟିତୋଟା ଠାରେ 17 ଏକର ଜମି ଚିହ୍ନଟ କରାଯାଇଛି, ଯେଉଁଥି ପାଇଁ ରାଜ୍ୟ ସରକାର 20 କୋଟି ଟଙ୍କା ପ୍ରଦାନ କରିବେ।
2022-23 ଶିକ୍ଷାବର୍ଷରୁ ଗୁରୁକୁଲରେ ଶିକ୍ଷାଦାନ ଆରମ୍ଭ ହେବ ବୋଲି ଶ୍ରୀମନ୍ଦିର ମୁଖ୍ୟ ପ୍ରଶାସକ କହିଛନ୍ତି। ଗଜପତି ମହାରାଜ ଏହି ଗୁରୁକୁଳ ସମାଜର ଅଧ୍ୟକ୍ଷ ହେବେ। ଏହା ଆସନ୍ତା 2022-2023 ଶିକ୍ଷାବର୍ଷ ସୁଦ୍ଧା କାର୍ଯ୍ୟ ଆରମ୍ଭ କରାଯିବ ବୋଲି କିଷନ କୁମାର କହିଛନ୍ତି।
ଓଡ଼ିଶା ସରକାର ପୁରୀର ଶ୍ରୀ ଜଗନ୍ନାଥ ମନ୍ଦିରର ସେବାୟତମାନଙ୍କୁ ଘର ଯୋଗାଇ ଦେବେ ବୋଲି ମୁଖ୍ୟ ପ୍ରଶାସକ କହିଛନ୍ତି। ଆଠ ଏକରରୁ ଅଧିକ ଜମି ପ୍ରଥମ ପର୍ଯ୍ୟାୟରେ ପ୍ରାୟ 400 ସେବାୟତ ପରିବାରକୁ ଯୋଗାଇ ଦିଆଯିବ। 600 ବର୍ଗଫୁଟ ପ୍ଲଟରେ ଘର ନିର୍ମାଣ ପାଇଁ ପ୍ରତ୍ୟେକ ପରିବାରକୁ 2 ଲକ୍ଷ ଟଙ୍କା ପ୍ରଦାନ କରାଯିବ। ଘରର ସମ୍ପ୍ରସାରଣ ପାଇଁ ସେମାନେ ଅଧିକ ଅର୍ଥ ବିନିଯୋଗ କରିପାରିବେ ବୋଲି କୁମାର କହିଛନ୍ତି।
କିଷନ କୁମାର ଆହୁରି ସୂଚନା ଦେଇଛନ୍ତି ଯେ ପୂର୍ବରୁ ବିକ୍ରି ହୋଇଥିବା ରଥର ଚକ ମାଗଣାରେ ଦିଆଯିବ। ଯେଉଁମାନଙ୍କୁ ଚକ ଦିଆଯିବ ସେହି ବ୍ୟକ୍ତି ବା ଅନୁଷ୍ଠାନ ଚୟନ ପାଇଁ ଏକ ଉପ-କମିଟି ମାନଦଣ୍ଡ ପ୍ରସ୍ତୁତ କରିବେ। ସେହି ଅନୁସାରେ ମାଗଣାରେ ରଥ ଚକ ପ୍ରଦାନ କରାଯିବ ବୋଲି ଏହି ବୈଠକରେ ନିଷ୍ପତି ହୋଇଛି।