ନୂଆଦିଲ୍ଲୀ: ଧିରେ ଧିରେ ଦେଶକୁ କରୋନାର ନୂଆ ଓମିକ୍ରନ ଭାରିଆଣ୍ଟ ପ୍ରସାର ଲାଭ କରିବାରେ ଲାଗିଛି। ଏହା ଏତେ ଦ୍ରୁତ ଗତିରେ ମାଡି ଚାଲିଛି ଯେ, ତାହାକୁ ନିୟନ୍ତ୍ରଣ କରିବା କାଠିକର ପାଠ। ସେଥିପାଇଁ ସମସ୍ତ ରାଜ୍ୟ ସରକାର ୱାର ରୁମ ପ୍ରସ୍ତୁତ କରି ରଖିବାକୁ କେନ୍ଦ୍ର ସରକାର ନିର୍ଦ୍ଦେଶ ଦେଇଛନ୍ତି। ସ୍ବାସ୍ଥ୍ୟ ବିଭାଗର ସଚିବ ଏ ନେଇ ରାଜ୍ୟଗୁଡିକୁ ଚିଠି ଲେଖି ଅବଗତ କରାଇଛନ୍ତି।
ସେ ଉଲ୍ଲେଖ କରିଛନ୍ତି ଯେ, ପୁଣି ଥରେ ଡାକ୍ତରଖାନା ପ୍ରସ୍ତୁତ କରି ରଖିବାକୁ ପଡିବ। ଏଥିସହିତ ଯଦି କୌଣସି ସ୍ଥାନରୁ ଅଧିକ ସଂଖ୍ୟକ ପଜେଟିଭ ଚିହ୍ନଟ ହେଲେ ତେବେ ସେ ସ୍ଥାନକୁ କଣ୍ଟେନମେଣ୍ଟ ଜୋନ ଘୋଷଣା କର। ସେହିପରି ପ୍ରଥମ ଲହର ବେଳେ ଯେପରି ବେଡ, ଅକ୍ସିଜେନ, ମେଡିକାଲ କର୍ମଚାରୀଙ୍କୁ ସଜାଗ ରଖାଯାଇଥିଲା ତାହା ମଧ୍ୟ କର। ଏହି ଚିଠି ପାଇବା ପରେ ବିଭିନ୍ନ ରାଜ୍ୟ ତରଫରୁ ବର୍ତ୍ତମାନ ତତ୍ପରତା ପ୍ରକାଶ ପାଇଛି।
କେନ୍ଦ୍ର ସରକାର କହିଛନ୍ତି ଯେ, ଅତି କମରେ ଯେଉଁଠି 10 ପ୍ରତିଶତ କରୋନା ପଜେଟିଭ ବାହାରିଲେ ତାହାକୁ ତୀକ୍ଷ୍ଣ ନଜରରେ ରଖ। ପୂର୍ବରୁ ନାଇଟ କର୍ଫ୍ୟୁକୁ ମଧ୍ୟ ଲାଗୁ କରାଯାଇପାରେ ବୋଲି କୁହାଯାଇଛି। ସେହିପରି ବିଭିନ୍ନ ଉତ୍ସବ, ବିବାହ, ବ୍ରତ, ମୃତ କାର୍ଯ୍ୟରେ ଯେପରି ଅଧିକ ଭିଡ ନ ହେବ ସେଥି ପ୍ରତି ଦୃଷ୍ଟି ଦେବାକୁ ମଧ୍ୟ କୁହାଯାଇଛି।
ଅନ୍ୟପକ୍ଷରେ କରୋନା ଟେଷ୍ଟିଂ ଏବଂ ଟିକାକରଣ ପାଇଁ ଗୁରୁତ୍ବ ଦେବାକୁ ମଧ୍ୟ କେନ୍ଦ୍ର ଗୃହ ସଚିବ ଚିଠିରେ ଉଲ୍ଲେଖ କରିଛନ୍ତି। ଅନେକ ରାଜ୍ୟରେ ଟିକାକରଣ ଯେପରି ସଫଳତା ହାସଲ କରିବା କଥା ତାହା ହୋଇ ନାହିଁ। ସେଥିପାଇଁ ଟିକାକରଣକୁ ଜୋରଦାର କରିବାକୁ ନିର୍ଦ୍ଦେଶ ଦିଆଯାଇଛି।
ଗବେଷକମାନେ ଚେତାବନୀ ଦେଇଛନ୍ତି ଯେ, ଦେଶରେ ଓମିକ୍ରନ ଫେବୃୟାରୀ ମାସରେ ଶୀର୍ଷକୁ ଛୁଇଁବ। ଏପରିକି ଦୈନିକ ସଂକ୍ରାମଣ ଦେଢ ଲକ୍ଷ ଟପିବ ବୋଲି ଅନୁମାନ କରାଯାଇଛି। ଏହି ଭାରିଏଣ୍ଟ ପୂର୍ବ ଅପେକ୍ଷା ତିନିଗୁଣା ସଂକ୍ରମଣ ଲକ୍ଷଣ ରହିଥିବାରୁ ଏହି ଆଶଙ୍କା ପ୍ରକାଶ ପାଇଛି। ସେଥିପାଇଁ ଏବେଠାରୁ ଏହା ବିରୋଧରେ ପ୍ରସ୍ତୁତି ନ କଲେ ପରବର୍ତ୍ତି ସମୟରେ ସ୍ଥିତି ଅସମ୍ଭାଳ ହେବ ବୋଲି ଚେତାବନୀ ଦିଆଯାଇଛି।
ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ ଅନୁଯାୟୀ ଦେଶରେ ଏ ପର୍ଯ୍ୟନ୍ତ କରୋନା ଭାଇରସର ଓମିକ୍ରନ୍ ଭାରିଆଣ୍ଟର 213 ଟି ମାମଲା ଚିହ୍ନଟ ହୋଇଛି। ମହାରାଷ୍ଟ୍ରରେ ମଙ୍ଗଳବାର ଦିନ ଓମିକ୍ରନ୍ ଭାରିଆଣ୍ଟର 11 ଟି ନୂତନ ସଂକ୍ରମଣ ଚିହ୍ନଟ ହୋଇଛି। ଫଳରେ ସେହି ରାଜ୍ୟରେ ଏହି ଆକ୍ରାନ୍ତଙ୍କ ସଂଖ୍ୟାକୁ 54 କୁ ବୃଦ୍ଧି ପାଇଛି। ଦିଲ୍ଲୀରେ ଓମିକ୍ରନ୍ ମାମଲା 57 କୁ ବୃଦ୍ଧି ପାଇଛି।