ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗତ ଦୁଇ ଦିନ ତଳେ ଦେଶକୁ ସମ୍ବୋଧିତ କରିଥିଲେ। ଏଥିରେ ୧୫-୧୮ ବର୍ଷର ପିଲାମାନଙ୍କୁ ଟୀକାକରଣରେ ସାମିଲ କରିବା ପାଇଁ ପ୍ରଧାନମନ୍ତ୍ରୀ ଘୋଷଣା କରିଥିଲେ। ଏହା ସହିତ ପିଏମ ମୋଦୀ ମଧ୍ୟ ବୃଦ୍ଧଙ୍କ ସମେତ ଫ୍ରଣ୍ଟ ଲାଇନ କର୍ମଚାରୀଙ୍କୁ ବୁଷ୍ଟର ଡୋଜ ଦେବାକୁ ଘୋଷଣା କରିଥିଲେ। କିନ୍ତୁ ଯେଉଁମାନେ ୬୦ ବର୍ଷରୁ ଅଧିକ ବୟସ୍କ, ଯେଉଁମାନେ ଅନ୍ୟ ଗୁରୁତର ରୋଗରେ ପୀଡିତ, ସେମାନେ ବୁଷ୍ଟର୍ ଡୋଜ୍ ନେଇପାରିବ ବୋଲି ପ୍ରଧାନମନ୍ତ୍ରୀ କହିଥିଲେ।
କୋୱିନ୍ ସଂଚାଳନର ମୁଖ୍ୟ ତଥା ଜାତୀୟ ସ୍ୱାସ୍ଥ୍ୟ ପ୍ରାଧିକରଣର ସିଇଓ ଡକ୍ଟର ଆର.ଏସ୍ ଶର୍ମା କହିଛନ୍ତି ଯେ, ବୁଷ୍ଟର୍ ଡୋଜ ପାଇଁ ୬୦ ବର୍ଷରୁ ଅଧିକ ଲୋକଙ୍କୁ ଏକ କୋ-ମୋର୍ବିଡିଟି ସାର୍ଟିଫିକେଟ୍ ଦେଖାଇବାକୁ ପଡିବ। ପୂର୍ବ ଟୀକାକରଣ ପ୍ରକ୍ରିୟାରେ କୌଣସି ପରିବର୍ତ୍ତନ ହେବ ନାହିଁ ବୋଲି ସେ କହିଛନ୍ତି। ଅନ୍ୟ ପଟେ, ଅଧିକ ସୂଚନା ପାଇଁ କୋୱିନ୍-ଆପ୍ ବ୍ୟବହାର କରାଯାଇପାରିବ।
ଡାକ୍ତର ଆହୁରି ମଧ୍ୟ କହିଛନ୍ତି ଯେ, ୬୦ ବର୍ଷ ବୟସ୍କ ବ୍ୟକ୍ତି ଯେଉଁମାନେ ଉଭୟ ଡୋଜ ନେଇଛନ୍ତି, ସେମାନେ କୋ-ମୋର୍ବିଡିଟି ସାର୍ଟିଫିକେଟ୍ ନେଇ ତୃତୀୟ ଡୋଜ୍ ଅର୍ଥାତ୍ ବୁଷ୍ଟର୍ ଡୋଜ୍ ପାଇପାରିବେ। ମଧୁମେହ, କିଡନୀ ରୋଗ, ହୃଦ୍ ରୋଗ, ଷ୍ଟେମ୍ ସେଲ୍ ଟ୍ରାନ୍ସପ୍ଲାଣ୍ଟ, କର୍କଟ ଭଳି ପ୍ରାୟ ୨୨ ଟି ରୋଗରେ ପୀଡିତ ଥିବା ବ୍ୟକ୍ତିମାନେ ଡାକ୍ତରଙ୍କ ଠାରୁ ପ୍ରମାଣପତ୍ର ଦେଖାଇ ବୁଷ୍ଟର ଡୋଜ ନେଇପାରିବେ।
