କେଦାର ମିଶ୍ର
ପ୍ରଥମ ଦୁଇଟି ପର୍ଯ୍ୟାୟ ନିର୍ବାଚନରେ ବିଜୁ ଜନତା ଦଳ ୨୦୧୪ ତୁଳନାରେ ଅଧିକ ଭଲ ଫଳ ପାଇବା ବୋଲି ଆଶା କରା ଯାଉଛି। ବିଭିନ୍ନ ଗୁଇନ୍ଦା ସୂତ୍ର ଓ କ୍ଷେତ୍ର ଅଧ୍ୟୟନରୁ ଯାହା ଜଣାପଡୁଛି, କେବଳ ବଲାଙ୍ଗୀର ଲୋକସଭା ଆସନକୁ ବାଦ ଦେଲେ ବାକି ସବୁ କ୍ଷେତ୍ରରେ ବିଜେଡ଼ିର ପଲା ଭାରି ରହିଥିବାର ସୂଚନା ମିଳୁଛି। ପ୍ରଥମଥର ଲାଗି ଓଡିଶାରେ ଭୋଟରଙ୍କ ମୁହଁରୁ “ରାଜ୍ୟରେ ଶଙ୍ଖ ଓ କେନ୍ଦ୍ରରେ ଫୁଲ’’ ର କଥା ଶୁଣି କେହି କେହି ଏହା ବିଜେପି ପାଇଁ ଲାଭଜନକ ହେବ ବୋଲି ବିଶ୍ଵାସ କରୁଛନ୍ତି। କିନ୍ତୁ ସମାନ୍ତରାଳ ବିଧାନସଭା ଓ ଲୋକସଭା ନିର୍ବାଚନରେ ଏ ପ୍ରକାର ଭୋଟ ବିଭାଜନ ଅତି ବେଶୀରେ ୧୦% ରୁ ଅଧିକ ହୁଏ ନାହିଁ। ଗୋଟିଏ ଚିହ୍ନ ଓ ଗୋଟିଏ ନେତା ର ଧାରା ଠୁ ଦୁଇ ଚିହ୍ନ ଓ ଦୁଇ ନେତାଙ୍କ ଆଡକୁ ସଚେତନ ଭାବରେ ଯାଇ ପାରିବାର ରାଜନୈତିକ ପରିପକ୍ଵତା ଆମର ଏଯାଏ ଆସିନାହିଁ। ତେବେ ବିଭିନ୍ନ ସୂତ୍ରର ଆଧାରରେ ପ୍ରଥମ ୯ ଟି ଲୋକସଭା ଓ ୬୩ ଟି ବିଧାନସଭା ଆସନରୁ ଦୁଇ ଭାଗରୁ ଅଧିକ ବିଜେଡି ଖାତାକୁ ଯାଇସାରିଛି। ଆହୁରି ଏକ ଚମକପ୍ରଦ ସତ୍ୟ ହେଉଛି, କଂଗ୍ରେସ ଦଳ ସବୁଠୁ ଖରାପ ପ୍ରଚାର କରିଥିଲେ ମଧ୍ୟ ବିଧାନସଭାରେ ଆଜି ମଧ୍ୟ ଏହା ବିଜେଡି ତଳକୁ ଦ୍ଵିତୀୟ ସ୍ଥାନରେ ରହିଛି। ପ୍ରଥମ ଦୁଇଟି ପର୍ୟାୟରେ ବିଜେପିର ବିଧାନସଭା ପ୍ରଦର୍ଶନ ଆଦୌ ଆଶାଜନକ ଲାଗୁନାହିଁ।
ଏବେ ବିଜେଡି ଲାଗି ଅସଲ ଅଗ୍ନି ପରୀକ୍ଷା ତୃତୀୟ ପର୍ଯ୍ୟାୟରୁ ଆରମ୍ଭ ହେବାକୁ ଯାଉଛି। ଭାରତୀୟ ଜନତା ପାର୍ଟି ଏବେ ଉପକୂଳ ଓଡିଶାରେ ଏକ ବଡ ଶକ୍ତି ଭାବରେ ଉଭା ହୋଇଛି। ପ୍ରଥମଥର ଲାଗି ଭୁବନେଶ୍ୱର, ପୁରୀ, କଟକ, ଢେଙ୍କାନାଳ,ସମ୍ବଲପୁର ଓ କେନ୍ଦୁଝର ଆସନରେ ବିଜେଡ଼ିର ମୁଖ୍ୟ ମୁକାବିଲା କଂଗ୍ରେସ ବଦଳରେ ବିଜେପି ସହିତ ହେବ। ବିଜେପିର ସବୁଠୁ ଭଲ ସଂଗଠନ ଥିବା ପଶ୍ଚିମ ଓଡିଶାରେ ଦଳ ନିଜର ପ୍ରାର୍ଥୀ ଚୟନ ଓ ଦୁର୍ବଳ ରଣନୀତି କାରଣରୁ ହାରୁଥିବା ବେଳେ ଉପକୂଳ ଓଡିଶାରେ ଏହାର ସାଙ୍ଗଠନିକ ଶକ୍ତି ବୃଦ୍ଧି ପାଉଛି।
ପୁରୀ ଆସନରେ ବିଜେଡ଼ିର ପିନାକୀ ମିଶ୍ର, ବିଜେପିର ସଂବିତ ପାତ୍ର ଓ କଂଗ୍ରେସର ସତ୍ୟପ୍ରକାଶ ନାୟକଙ୍କ ଭିତରେ ତ୍ରିମୂଖୀ ଲଢେଇ ହେଉଥିଲେ ହେଁ, ବସ୍ତୁତଃ ଏଠାରେ କଂଗ୍ରେସ ଏକ ପ୍ରକାର ଅଦୃଶ୍ୟ ମାନେ ହେଉଛି। ବ୍ରହ୍ମଗିରି ଆସନରେ ଲୁଲୁ ମହାପାତ୍ରଙ୍କ ପରିବାର ବିଜେପିକୁ ଆସିବା ପରେ ସେଠିକାର କଂଗ୍ରେସ ସଂଗଠନ ଏବେ ଗେରୁଆ ହୋଇ ଯାଇଛି। ପୂର୍ବରୁ ରଣପୁର ଓ ଚିଲିକାରେ ବିଜେପିର ଭଲ ପ୍ରଦର୍ଶନ ରହିଥିଲା। ଏଥିରେ ବ୍ରହ୍ମଗିରି ଓ ସତ୍ୟବାଦୀ ଏଥର ସାମିଲ ହେବାକୁ ଯାଉଛି। ଏପରିକି ପିପିଲି ଆସନରେ ମଧ୍ୟ ବିଜେପି ବିଜେଡ଼ିର ମୁଖ୍ୟ ପ୍ରତିଦ୍ବନ୍ଦ୍ବୀ ରହିଛି। ସେ ଦୃଷ୍ଟିରୁ ବିଜେଡ଼ିକୁ ପୁରୀ ଆସନରେ ପ୍ରଥମଥର ଲାଗି କଡା ମୁକାବିଲାର ସମ୍ମୁଖୀନ ହେବାକୁ ପଡିବ।
କଟକ ଆସନରେ ବିଜେଡ଼ିର ଭର୍ତ୍ତୃହରି ମହତାବ, ବିଜେପିର ପ୍ରକାଶ ମିଶ୍ର ଓ କଂଗ୍ରେସର ପଂଚାନନ କାନୁନଗୋଙ୍କ ମଧ୍ୟରେ ଲଢେଇ ହେଉଛି। ତେବେ ପୁରୁଖା କଂଗ୍ରେସ ନେତା ପଂଚାନନ କାନୁନଗୋଙ୍କ ସପକ୍ଷରେ ପ୍ରଚାର ଲାଗି କଂଗ୍ରେସ ଦଳ ସେମିତି ବିଶେଷ କିଛି ଉଦ୍ୟମ କଲା ଭଳି ଦିଶୁନାହିଁ। କଟକରେ ଦୃଶ୍ୟପଟ ବଡ ବିଚିତ୍ର। ଖଣ୍ଡପଡାରେ ସବୁକିଛି ଶାଗୁଆ ଦେଖା ଯାଉଥିବା ବେଳେ ବଡମ୍ବାରେ ସବୁକିଛି ଗୈରିକ ଦେଖାଯାଉଛି। ସେହିପରି ବାରବାଟୀ କଟକରେ କଂଗ୍ରେସ ପ୍ରାର୍ଥୀ ମହମ୍ମଦ ମୋକିମଙ୍କ ସପକ୍ଷରେ ଜନମତ ବାରି ହୋଇପଡୁଛି। ବାକି ଚାରୋଟି ଆସନ- କଟକ ସଦର, ଚୌଦ୍ବାର କଟକ, ବାଙ୍କି ଓ ଆଠଗଡରେ ସ୍ଥିତି ବିଜେଡି ପାଇଁ ଅନୁକୂଳ ରହିଛି। ତେବେ ସବୁ ଅଞ୍ଚଳରେ ବିଜେଡ଼ିର ଲୋକସଭା ସଦସ୍ୟ ଭର୍ତ୍ତୃହରି ମହତାବଙ୍କ ବିରୋଧରେ କ୍ରୋଧ ଓ ଆକ୍ରୋଶ ର ସ୍ଵର ସ୍ପଷ୍ଟ ବାରି ହୋଇ ପଡୁଛି। ଅପର ପକ୍ଷରେ ବିଜେପି ପ୍ରାର୍ଥୀ ପ୍ରକାଶ ମିଶ୍ରଙ୍କ ପାଇଁ ଲୋକଙ୍କ ମନରେ ଆଗ୍ରହ ରହିଛି। ଏହି ଆଗ୍ରହ ଭୋଟରେ ରୂପାନ୍ତରିତ ହୋଇ ପାରିବ କି ନା, ତାହାରି ଉପରେ ସବୁକିଛି ନିର୍ଭର କରୁଛି।
ଭୁବନେଶ୍ବରରେ ବିଜେପି ପ୍ରାର୍ଥୀ ଅପରାଜିତା ଷଡଙ୍ଗୀଙ୍କ ପାଇଁ ସ୍ଥିତି ଅନୁକୂଳ ମାନେ ହେଉଥିଲେ ମଧ୍ୟ, ତାଙ୍କ ପାଇଁ ସବୁଠୁ ବଡ ମୁଣ୍ଡ ବିନ୍ଧା ହେଉଛି, ବିଜେପି ଭିତରେ ରହିଥିବା ଗୋଷ୍ଠୀ କନ୍ଦଳ। ବିଜେପିର ଏକ ପ୍ରଭାବଶାଳୀ ଗୋଷ୍ଠୀ ଅପରାଜିତାଙ୍କ ପରାଜୟ ଲାଗି ଗୋପନ ଷଡଯନ୍ତ୍ର ରଚନା କରୁଛନ୍ତି। ଏଠାରେ ବିଜେଡି ପ୍ରାର୍ଥୀ ଅରୂପ ପଟ୍ଟନାୟକ ବିଶେଷ ଲୋକ ସମ୍ପର୍କ ରଖିନାହାନ୍ତି। କେବଳ ନବୀନ ପଟ୍ଟନାୟକଙ୍କ ନାଁରେ ସେ ଯଦି ତରିଯିବେ, ହୁଏତ ତାହା ଏକ ଆଶ୍ଚର୍ୟ କାହାଣୀ ହେବ। ଅପରାଜିତାଙ୍କର ଆଉ ଏକ ଲାଭ ହେଉଛି ସେ ଭୁବନେଶ୍ଵର ମହାନଗର ନିଗମ ର ମୁଖ୍ୟ କାର୍ୟ ନିର୍ବାହୀ ଓ ଖୁର୍ଦ୍ଧା ଜିଲାପାଳ ଭାବରେ ନିଜ ନିର୍ବାଚନ ମଣ୍ଡଳିରେ ବେଶ ପରିଚିତ। ଅରୂପ ପଟ୍ଟନାୟକ କିନ୍ତୁ ଏବେବି ଅପରିଚିତ ବା ଅଳ୍ପ ପରିଚିତ। ଏଠି ବିଜେଡି ବିଧାୟକମାନଙ୍କ କାନ୍ଧରେ ସବାର ହୋଇ ବିଜେଡି ପ୍ରାର୍ଥୀଙ୍କ ଭାଗ୍ୟ ରହିଛି।
ସମ୍ବଲପୁର ଲୋକସଭା ଆସନ ପାଇଁ, କୁଚିଣ୍ଡା ଓ ଦେବଗଡରେ ବିଜେପି ଲୋକସଭା ପ୍ରାର୍ଥୀଙ୍କ ଲାଗି ଜନମତ ପ୍ରବଳ ଲାଗୁଥିବା ବେଳେ ଛେଣ୍ଡିପଦା ଓ ଆଠମଲ୍ଲିକରେ ବିଜେଡ଼ିର ସ୍ଥିତି ବେଶ ଟାଣ ରହିଛି। ସମ୍ବଲପୁର ଓ ରେଙ୍ଗାଲିରେ କଡା ମୁକାବିଲା ରହିଛି, କିନ୍ତୁ ରେଢାଖୋଲରେ କଂଗ୍ରେସର ପଲା ଭାରି ଲାଗୁଛି। ଏ ପ୍ରକାର ଗୋଳିଆମିଶା ପରିସ୍ଥିତିରେ ଫଳ ଯେ କାହା ସପକ୍ଷରେ ଯିବ ତାହାର ଆକଳନ ସହଜ ନୁହେଁ।
ଢେଙ୍କାନାଳ ଆସନରେ ବିଜେଡି ପ୍ରାର୍ଥୀ ମହେଶ ସାହୁ ଓ ବିଜେପି ପ୍ରାର୍ଥୀ ରୁଦ୍ର ପାଣି ଏକଦା ପରସ୍ପରର ବେଶ ଅନ୍ତରଙ୍ଗ ଥିଲେ।କଂଗ୍ରେସ ପ୍ରାର୍ଥୀ କାମାକ୍ଷା ପ୍ରସାଦ ସିଂ ଦେଓଙ୍କର ନିଜସ୍ଵ ପତିଆରା ରହିଛି। ତେବେ ବିଧାନସଭା ଆସନ ଗୁଡିକରେ ବିଜେଡିର ପ୍ରଭାବ ରହିଥିବାରୁ ଏହା ହୁଏତ ବିଜେଡିକୁ ସୁହାଇପାରେ। କେନ୍ଦୁଝର ଆସନର ସ୍ଥିତି ପରଖିବାକୁ ଆମେ ପହଞ୍ଚି ପାରିନାହୁଁ। ତେଣୁ ସେ ବିଷୟରେ ମତାମତ ଦେବା ଠିକ ହେବନାହିଁ।
ଏହି ୬ ଟି ଲୋକସଭା ଆସନ ଓ ୪୨ ଟି ବିଧାନସଭା ଆସନ ବିଜେଡି ଲାଗିଏକ ପ୍ରକାର ଅଗ୍ନି ପରୀକ୍ଷା ହୋଇଥିବାବେଳେ, ବିଜେପି ଲାଗି ମଧ୍ୟ ଏହା ନୂଆ ଆହ୍ଵାନ। ଉପକୂଳ ଓଡିଶାରେ ବିଜେପି ର ପ୍ରଦର୍ଶନ ଉପରେ ଏହି ଦଳର ଭବିଷ୍ୟତ ନିର୍ଭର କରୁଛି।
(ମୋବାଇଲରେ ଫଟାଫଟ ଖବର ଜାଣିବା ପାଇଁ ଡାଉନଲୋଡ କରନ୍ତୁ SANKHIPTA ଆପ, ଏହାପରେ ସ୍କ୍ରିନର ତଳୁ ଉପରକୁ ଘଷି ଘଷି ପଢିଚାଲନ୍ତୁ ଖବର ପରେ ଖବର )