ନୂଆଦିଲ୍ଲୀ: ଉତ୍ତରପ୍ରଦେଶ ବିଧାନସଭା ନିର୍ବାଚନ ପାଇଁ 125 ଜଣିଆ ପ୍ରାର୍ଥୀଙ୍କ ତାଲିକା ଗୁରୁବାର ଦିନ କଂଗ୍ରେସ ପ୍ରକାଶ କରିଛି। ଏହି ତାଲିକାରେ 40 ପ୍ରତିଶତ ମହିଳା ଅଛନ୍ତି। ତେବେ ବହୁ ଚର୍ଚ୍ଚିତ ଉନ୍ନାଓ ଗଣବଳାତ୍କାର ମାମଲାରେ ପୀଡିତାଙ୍କ ମାଙ୍କୁ ମଧ୍ୟ କଂଗ୍ରେସ ଟିକେଟ୍ ଦେଇଛି।
ଉନ୍ନାଓ ଗଣବଳାତ୍କାର ମାମଲାର ଶିକାର ହୋଇଥିବା ପିଡିତାଙ୍କ ମା’ ଆଶା ସିଂଙ୍କୁ କଂଗ୍ରେସ ମନୋନୀତ କରିଛି। ଏହି ମାମଲାରେ କଂଗ୍ରେସ ଏବଂ ପ୍ରିୟଙ୍କା ଗାନ୍ଧୀ ନ୍ୟାୟ ପାଇଁ ଦାବି ଉଠାଇ ଉତ୍ତର ପ୍ରଦେଶର ବିଜେପି ସରକାରଙ୍କୁ ଟାର୍ଗେଟ କରିଥିଲେ। ଉନ୍ନାଓରୁ ଆଶା ସିଂଙ୍କୁ ଟିକେଟ ଦେବାବେଳେ ପୂର୍ବତନ କଂଗ୍ରେସ ସଭାପତି ରାହୁଲ ଗାନ୍ଧୀ ଟୁଇଟ୍ କରି କହିଛନ୍ତି ଯେ ଉନ୍ନାଓରେ ଯାହାର ଝିଅକୁ ଅନ୍ୟାୟ କରାଯାଇଥିଲା, ସେ ବର୍ତ୍ତମାନ ନ୍ୟାୟ ପ୍ରଦାନର ମୁଖ୍ୟ ହେବେ – ସେ ଲଢିବେ ଆଉ ଜିତିବେ।
ବିଶେଷ କଥା ହେଉଛି ଏହି ପ୍ରାର୍ଥୀଙ୍କ ତାଲିକାରେ ଉନ୍ନାଓ ପୀଡିତାର ମା ଆଶା ସିଂଙ୍କ ପରି ବିଜେପି ସରକାର ଦ୍ବାରା ନିର୍ଯ୍ୟାତିତା ବହୁ ମହିଳାଙ୍କୁ ଟିକେଟ ଦିଆଯାଇଛି। ଏହି ପ୍ରାର୍ଥୀମାନଙ୍କ ମଧ୍ୟରେ ଜଣେ ମହିଳା ହେଉଛନ୍ତି ପୁନମ୍ ପାଣ୍ଡେ। ସେ ଆଶା ଭଉଣୀମାନଙ୍କ ଶୋଷଣ ବିରୋଧରେ ସ୍ୱର ଉତ୍ତୋଳନ କରିଥିଲେ। ଆଉ ଜଣେ ମହିଳା ସାଦାଫ ଜାଫର ଅଛନ୍ତି, ଯିଏ ବିଜେପି ଦେଶର ଏକତାକୁ ଭାଙ୍ଗି ଦେଇଥିବା CAA ବିରୋଧରେ କଡ଼ା ସଂଘର୍ଷ କରିଥିଲେ। ଉତ୍ତରପ୍ରଦେଶର ପଞ୍ଚାୟତ ନିର୍ବାଚନରେ ବିଜେପି ଗୁଣ୍ଡା ଦ୍ୱାରା ନିର୍ଯାତିତ ହୋଇଥିବା ଆଉ ଜଣେ ମହିଳା ହେଉଛନ୍ତି ରିତୁ ସିଂ। ଏମାନଙ୍କୁ କଂଗ୍ରେସ ଟିକେଟ ଦେଇଛି।
କଂଗ୍ରେସ ବିଧାନସଭା ଦଳର ନେତା ତଥା ବରିଷ୍ଠ ନେତା ପ୍ରମୋଦ ତିୱାରୀଙ୍କ ଝିଅ ଆରାଧନା ମିଶ୍ରଙ୍କୁ ନିଜ ଆସନ ପ୍ରତାପଗଡରୁ ଟିକେଟ କରୁଛନ୍ତି। ଲୁଇସ୍ ଫାରୁଖାବାଦରୁ, ନୋଏଡାରୁ ପଙ୍ଖୁଡି ପାଠକ, ଆହ୍ଲାବାଦ-ଦକ୍ଷିଣରୁ ଅଲ୍ପନା ନିଶାଦ, ଶାହାଜାହାନପୁରରୁ ପୁନମ ପାଣ୍ଡେ ଏବଂ ଲକ୍ଷ୍ମୌ ସେଣ୍ଟ୍ରାଲରୁ ସାଦାଫ ଜାଫର ଲଢେଇ କରୁଛନ୍ତି।
ପୁନମ ପାଣ୍ଡେ ଜଣେ ଆଶା କର୍ମୀ। ଗତ ବର୍ଷ ପୁନମ୍, ଅନ୍ୟ ଆଶା କର୍ମଚାରୀଙ୍କ ସହ ପାରିଶ୍ରମିକ ବୃଦ୍ଧି ଦାବି କରି ଲକ୍ଷ୍ମୌରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ବାସଭବନ ଅଭିମୁଖେ ଯାଉଥିବାବେଳେ ପୋଲିସ ତାଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଥିଲା। ଏହା ପରେ ଘଟଣାର ଏକ ଭିଡିଓ ଭାଇରାଲ ହୋଇଥିଲା। ପରେ ପୁନମ୍ ଅନ୍ୟ ଆଶା କର୍ମଚାରୀଙ୍କ ସହିତ ପ୍ରିୟଙ୍କା ଗାନ୍ଧୀଙ୍କୁ ଭେଟିଥିଲେ। କଂଗ୍ରେସ ବର୍ତ୍ତମାନ ତାଙ୍କୁ ଶାହାଜାହାନପୁର ନିର୍ବାଚନମଣ୍ଡଳୀରୁ ପ୍ରତିଦ୍ବନ୍ଦିତା କରିବାକୁ ଟିକେଟ ଦେଇଛି।
ଏଥି ସହିତ ସାଦାଫ ଜାଫରଙ୍କୁ ଡିସେମ୍ବର 19, 2019 ରେ ଲକ୍ଷ୍ମୌରେ CAA-NRC ବିରୋଧରେ ଫେସବୁକ୍ ଲାଇଭ୍ କରୁଥିବା ସମୟରେ ଗିରଫ କରାଯାଇଥିଲା | ହତ୍ୟା ଉଦ୍ୟମ, ଦଙ୍ଗା, ଅପରାଧିକ ଷଡଯନ୍ତ୍ର, ସରକାରୀ କର୍ମଚାରୀଙ୍କ ଉପରେ ଆକ୍ରମଣ ଅଭିଯୋଗରେ ତାଙ୍କୁ ଗିରଫ କରାଯାଇଥିଲା। କଂଗ୍ରେସ ଏପରି ଟିକେଟ ବଣ୍ଟନକୁ ନେଇ ଜାତୀୟ ରାଜନୀତିରେ ବେଶ ଚର୍ଚ୍ଚା ଚାଲିଛି।