ନୂଆଦିଲ୍ଲୀ: ଉଭୟ ଡୋଜ ଟୀକା ନେଇଥିବା ବ୍ୟକ୍ତିଙ୍କୁ ରାଜପଥରେ ଆୟୋଜିତ ହେବାକୁ ଥିବା ଗଣତନ୍ତ୍ର ଦିବସ ଉତ୍ସବରେ ଅଂଶଗ୍ରହଣ କରିବାକୁ ଅନୁମତି ମିଳିବ। ୧୫ ବର୍ଷରୁ କମ୍ ବୟସର ପିଲାମାନଙ୍କୁ ଏହି କାର୍ଯ୍ୟକ୍ରମରେ ଯୋଗଦେବାକୁ ଅନୁମତି ନାହିଁ। ଏନେଇ ଦିଲ୍ଲୀ ପୋଲିସ ଏକ ନିର୍ଦ୍ଦେଶନାମା ଜାରି କରିଛି। ଜାନୁଆରୀ ୨୬ ତାରିଖରେ ରାଜପଥରେ ଆୟୋଜିତ କାର୍ଯ୍ୟକ୍ରମରେ ଲୋକଙ୍କୁ ମାସ୍କ ପିନ୍ଧିବା, ପରସ୍ପରଠାରୁ ଦୂରତା ରଖିବା ସହିତ ସମସ୍ତ କୋଭିଡ ସମ୍ବନ୍ଧୀୟ ପ୍ରୋଟୋକଲ ଅନୁସରଣ କରିବାକୁ ପଡିବ ବୋଲି ପୋଲିସ କହିଛି।
ଦିଲ୍ଲୀ ପୋଲିସ ନିର୍ଦ୍ଦେଶାବଳୀରେ କହିଛି ଯେ ପରିଦର୍ଶକମାନେ ବସିବା ପାଇଁ ବିଭାଗଗୁଡ଼ିକ ସକାଳ ୭ ଟାରେ ଖୋଲାଯିବ ଏବଂ ସେମାନେ ସେହି ଅନୁଯାୟୀ ପହଞ୍ଚିବେ। ପାର୍କିଂ ସ୍ଥାନ ସୀମିତ ରହିଛି। ତେଣୁ ପରିଦର୍ଶକମାନଙ୍କୁ କାର୍ ପୁଲ୍ କରିବାକୁ କିମ୍ବା ଟ୍ୟାକ୍ସି ବ୍ୟବହାର କରିବାକୁ ପରାମର୍ଶ ଦିଆଯାଇଛି। ବୈଧ ପରିଚୟ ପତ୍ର ଆଣିବାକୁ ଏବଂ ସୁରକ୍ଷା ଯାଞ୍ଚରେ ସହଯୋଗ କରିବାକୁ ପୋଲିସ ଲୋକଙ୍କୁ ମଧ୍ୟ ଅନୁରୋଧ କରିଛି। ପ୍ରତ୍ୟେକ ପାର୍କିଂ ଅଞ୍ଚଳରେ ରିମୋଟ ନିୟନ୍ତ୍ରିତ କାର ଲକର ଚାବି ଜମା କରିବା ପାଇଁ ଏକ ବ୍ୟବସ୍ଥା ଅଛି ବୋଲି ପୋଲିସ ଟ୍ୱିଟ କରି ଜଣାଇଛି।
ଦିଲ୍ଲୀ ପୋଲିସ କମିଶନର ରାକେଶ ଅସ୍ଥାନା ରବିବାର ଦିନ କହିଛନ୍ତି ଯେ, ଗଣତନ୍ତ୍ର ଦିବସ ଅବସରରେ ରାଜଧାନୀରେ ସୁରକ୍ଷା ପାଇଁ ୨୭ ହଜାରରୁ ଅଧିକ ପୋଲିସ କର୍ମଚାରୀ ନିୟୋଜିତ ହୋଇଛନ୍ତି ଏବଂ ଆତଙ୍କବାଦ ବିରୋଧୀ ବ୍ୟବସ୍ଥାକୁ ଆହୁରି ମଜବୁତ କରାଯାଇଛି।
ସେ କହିଛନ୍ତି ଯେ, ଡେପୁଟି କମିଶନର ଅଫ୍ ପୋଲିସ୍ (ଡିସିପି), ଆସିଷ୍ଟାଣ୍ଟ କମିଶନର୍ ପୋଲିସ୍ (ଏସିପି) ଏବଂ ଇନ୍ସପେକ୍ଟର, ସବ୍-ଇନ୍ସପେକ୍ଟର ରାଙ୍କ ଅଧିକାରୀଙ୍କୁ ସୁରକ୍ଷା ଦାୟିତ୍ଵ ଦିଆଯାଇଛି। ଅସ୍ଥାନା କହିଛନ୍ତି ଯେ, ସଶସ୍ତ୍ର ପୋଲିସ୍ ଫୋର୍ସ ଏବଂ କମାଣ୍ଡୋ, ସେଣ୍ଟ୍ରାଲ୍ ଆର୍ମଡ୍ ପୋଲିସ୍ ଫୋର୍ସର ଅଧିକାରୀ ଏବଂ ଯବାନଙ୍କୁ ମଧ୍ୟ ନିୟୋଜିତ କରାଯାଇଛି।
ଗଣତନ୍ତ୍ର ଦିବସରେ ସୁରକ୍ଷା ବ୍ୟବସ୍ଥା ବିଷୟରେ ଗଣମାଧ୍ୟମ ସହ କଥାବାର୍ତ୍ତା କରି ଆସ୍ଥାନା କହିଛନ୍ତି ଯେ, ପ୍ୟାରେଡକୁ ଜଗିବା ପାଇଁ ଦିଲ୍ଲୀ ପୋଲିସର ୨୭ ହଜାର ୭୨୩ କର୍ମଚାରୀ, ୭୧ ଡିସିପି, ୨୧୩ ଏସିପି ଏବଂ ୭୫୩ ଇନ୍ସପେକ୍ଟରଙ୍କୁ ନିୟୋଜିତ କରାଯାଇଛି। ସେମାନଙ୍କୁ ସାହାଯ୍ୟ କରିବା ପାଇଁ କେନ୍ଦ୍ରୀୟ ସଶସ୍ତ୍ର ପୋଲିସ ଫୋର୍ସ (CAPF) ର ୬୫ ଟି କମ୍ପାନୀ ନିୟୋଜିତ ହୋଇଛନ୍ତି। ସେ କହିଛନ୍ତି ଯେ ଗତ ଦୁଇ ମାସ ମଧ୍ୟରେ ଅନ୍ୟ ସୁରକ୍ଷା ଏଜେନ୍ସି ସହ ସମନ୍ୱୟ ରକ୍ଷା କରି ଦିଲ୍ଲୀ ପୋଲିସ ଆତଙ୍କବାଦ ବିରୋଧୀ ପଦକ୍ଷେପକୁ ଆହୁରି ମଜବୁତ କରିଛି।