ନୂଆଦିଲ୍ଲୀ: ଶାସକ ଭାରତୀୟ ଜନତା ପାର୍ଟି (ବିଜେପି) ବିରୋଧରେ ଏକଜୁଟ ହେବାକୁ ବିରୋଧୀ ଦଳକୁ ଆହ୍ଵାନ ଦେବାର କିଛି ଦିନ ପରେ ତେଲେଙ୍ଗାନାର ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ଆଜି ମୁମ୍ବାଇ ଅଭିମୁଖେ ଯାଇଛନ୍ତି। ଯେଉଁଠାରେ ସେ ତାଙ୍କର ମହାରାଷ୍ଟ୍ର ପ୍ରତିପକ୍ଷ ଉଦ୍ଧବ ଠାକରେ ଏବଂ ରାଷ୍ଟ୍ରବାଦୀ କଂଗ୍ରେସ ପାର୍ଟି (ଏନସିପି) ମୁଖ୍ୟ ଶରଦ ପାୱାରଙ୍କୁ ଭେଟିବେ।
ତେଲେଙ୍ଗାନା ରାଷ୍ଟ୍ରିୟ ସମିତି (ଟିଆରଏସ) ଅନୁଯାୟୀ ଶିବସେନା ସୁପ୍ରିମୋ ଉଦ୍ଧବ ଠାକରେ ତେଲେଙ୍ଗାନା ମୁଖ୍ୟମନ୍ତ୍ରୀ ଏବଂ ତାଙ୍କ ଦଳକୁ ରାତ୍ରୀ ଭୋଜନ ପାଇଁ ନିମନ୍ତ୍ରଣ କରିଛନ୍ତି। ଏହି ସଭାଗୁଡ଼ିକରେ ଜାତୀୟ ରାଜନୈତିକ ପ୍ରସଙ୍ଗ ଉପରେ ଆଲୋଚନା କରାଯିବ ବୋଲି ଦଳ କହିଛି।
କେ ଚନ୍ଦ୍ରଶେଖର ରାଓ ଏହା ପୂର୍ବରୁ ବିଜେପିକୁ ଟାର୍ଗେଟ କରି କହିଥିଲେ ଯେ, ବିଜେପିକୁ ଦେଶର କ୍ଷମତାରୁ ବାହାର କରି ଦିଆଯାଉ ନଚେତ୍ ଦେଶ ନଷ୍ଟ ହୋଇଯିବ। ଏଥିସହ ରାଜନୈତିକ ଶକ୍ତି ଏକାଠି ହୋଇ ବିଜେପିକୁ କ୍ଷମତାରୁ ହଟାଇବା ପାଇଁ ସେ ଆହ୍ଵାନ କରିଥିଲେ।
ବିଜେପି ବିରୋଧରେ ବିଭିନ୍ନ ବିରୋଧୀ ଦଳକୁ ଏକାଠି କରିବା ପାଇଁ ପ୍ରୟାସର ଏକ ଅଂଶ ଭାବରେ କେସିଆର ମଧ୍ୟ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଭେଟିବାକୁ ଯୋଜନା କରିଛନ୍ତି। କେସିଆରଙ୍କ ଏହି ପଦକ୍ଷେପକୁ ପୂର୍ବତନ ପ୍ରଧାନମନ୍ତ୍ରୀ ଏଚଡି ଦେବଗୌଡା ସମର୍ଥନ କରିଥିଲେ।
ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ ଏହା ମଧ୍ୟ କହିଛନ୍ତି ଯେ, ଅଣ ଏନଡିଏ ଶାସିତ ରାଜ୍ୟଗୁଡିକର ମୁଖ୍ୟମନ୍ତ୍ରୀମାନେ ଖୁବ ଶୀଘ୍ର ଦିଲ୍ଲୀରେ ଏକ ସମ୍ମିଳନୀ କରିବେ।