ବାଣପୁର: ଆଜି ଖୋର୍ଦ୍ଧା ଜିଲ୍ଲା ବାଣପୁର ବଜାର ସାହି ସ୍ଥିତ ଶ୍ରୀ ଶ୍ରୀ ରଙ୍କନାଥ ଦେବଙ୍କ ପୀଠରେ ଅଷ୍ଟପ୍ରହର ନାମଯଜ୍ଞ ଗଙ୍ଗାଧରପୁର ବାବାଜୀ ପ୍ରଦୀପ କୁମାର ଶର୍ମାଙ୍କ ପୌରାହିତ୍ୟରେ ମହାସମାରୋହରେ ଅନୁଷ୍ଠିତ ହୋଇଯାଇଛି। ଶୁକ୍ରବାର ଅପରାହ୍ନରେ ଶ୍ରଦ୍ଧାଳୁମାନଙ୍କ ଦ୍ୱାରା ବିରାଟ ପଟୁଆର ସହ କଳସ ଶୋଭାଯାତ୍ରା ବାହାରି ନଗର ପରିକ୍ରମା କରାଯାଇଥିଲା।
ଦାଶରଥିପୁର ଗ୍ରାମସ୍ଥିତ ପବିତ୍ର ଶାଳିଆ ନଦୀରୁ ଭକ୍ତମାନଙ୍କ ଦ୍ୱାରା ଯମୁନା ନିମନ୍ତ୍ରଣ କରାଯାଇ କଳସ ଶୋଭାଯାତ୍ରା ଅଧିବାସ ସ୍ଥଳ ଶ୍ରୀ ଶ୍ରୀ ରଙ୍କନାଥ ମନ୍ଦିରରେ ପହଂଚିଥିଲା। ଶନିବାର ପ୍ରାତଃରୁ ଅଷ୍ଟ ପ୍ରହରବ୍ୟାପୀ ଆଧ୍ୟାତ୍ମିକ ପରିବେଶରେ ନାମଯଜ୍ଞ ଓ ସଂକୀର୍ତ୍ତନ ହେବା ସହ ରବିବାର ସକାଳେ ନଗରକୀର୍ତ୍ତନ, ନଗର ଭିକ୍ଷା ଓ ମଧ୍ୟାହ୍ନରେ ଭକ୍ତମାନେ କଳସ ବିସର୍ଜନ କରି ଯମୁନାସ୍ନାନ କରିଥିଲେ। ଅପରାହ୍ନରେ ବିରାଟ ଆନନ୍ଦ ବଜାର ମନ୍ଦିର ନିକଟରେ ଅନୁଷ୍ଠିତ ହୋଇଥିଲା ଯୋଉଥିରେ ହଜାର ହଜାର ଭକ୍ତ ପ୍ରସାଦ ସେବନ କରିଥିଲେ।
ଉକ୍ତ ନାମଯଜ୍ଞ ହୋମରେ କର୍ତ୍ତା ରୂପେ ଅଜିତ କୁମାର ଅଗ୍ରୱାଲ ଓ ରଶ୍ମିତା ଅଗ୍ରୱାଲ ଯୋଗଦେଇଥିବାବେଳେ ସମ୍ପୂର୍ଣ୍ଣ କାର୍ଯ୍ୟକ୍ରମକୁ ରାଧାମୋହନ ଅଗ୍ରୱାଲ, ଗିରିଧାରୀ ପାତ୍ର, ସୁନୀଲ କୁମାର ଅଗ୍ରୱାଲ, ଦେବଦତ୍ତ ପାତ୍ର, କୃଷ୍ଣଚନ୍ଦ୍ର ନାୟକ,ଅଶୋକ ପାତ୍ର , ଭବାନୀ ସୁପକାର,ଲଷ୍ମୀଧର ପାତ୍ର, ମାଗୁଣି ମହାରଣା, ବସନ୍ତ ସୁବୁଦ୍ଧି ପ୍ରମୁଖ ପରିଚାଳିତ କରିଥିଲେ।ପୂଜା କାର୍ଯ୍ୟରେ ବଜାର ସାହି ବାସିନ୍ଦା ସହଯୋଗ କରିଥିବାବେଳେ ପ୍ରସାଦ ବଣ୍ଟନ ସମୟରେ ସାହି ଲୋକମାନେ ତଥା ଏହାର ଆଖପାଖ ଅଞ୍ଚଳର ବହୁ ଶ୍ରଦ୍ଧାଳୁ ଓ ସ୍ବେଚ୍ଛସେବୀ ସଂଗଠନମାନେ ପୂର୍ଣ୍ଣ ସହଯୋଗ କରିଥଲେ।


