ଭୁବନେଶ୍ୱର: କେନ୍ଦ୍ର ସରକାରଙ୍କ ଭାରତୀୟ ଦକ୍ଷତା ବିକାଶ ସେବା (ଆଇଏସ୍ଡିଏସ୍)ର ଚାଳିଶ ଜଣିଆ ଶିକ୍ଷାନବୀଶ ଅଧିକାରୀ ଓଡିଶା ଗସ୍ତରେ ଆସି ରାଜୀବ ଭବନଠାରେ ଓଡିଶା ଦକ୍ଷତା ବିକାଶ ପ୍ରାଧିକରଣର ଅଧ୍ୟକ୍ଷ ଶ୍ରୀ ସୁବ୍ରତ ବାଗ୍ଚୀଙ୍କ ସହ ସାକ୍ଷାତ ଆଲୋଚନା କରିଛନ୍ତି। ଏହି ଅବସରରେ ଶ୍ରୀ ବାଗ୍ଚୀ ରାଜ୍ୟ ସରକାରଙ୍କ ଦ୍ୱାରା ନିଆଯାଇଥିବା ଦକ୍ଷତା ବିକାଶ କାର୍ଯ୍ୟକ୍ରମ ସଂପର୍କରେ ସେମାନଙ୍କୁ ଅବଗତ କରାଇଥିଲେ।
ଏହି ଅବସରରେ ଓଡିଶା ଦକ୍ଷତା ବିକାଶ ପ୍ରାଧିକରଣର ଅଧ୍ୟକ୍ଷ ଶ୍ରୀ ବାଗ୍ଚୀ କହିଥିଲେ ଯେ ସେମାନେ ନିଜର ପ୍ରତିଭା ଏବଂ ନୂତନ ଚିନ୍ତାଧାରା ମାଧ୍ୟମରେ ସ୍କିଲ ଇକୋ ସିଷ୍ଟମକୁ ଆହୁରି ସୁଦୃଢ କରିବେ। ସେ ଆହୁରି ମଧ୍ୟ କହିଥିଲେ ଯେ ରାଜ୍ୟ ସରକାର ଆଇଟିଆଇ ଏବଂ ପଲିଟେକନିକମାନଙ୍କୁ ସ୍ୱତନ୍ତ୍ର ପ୍ରାଧାନ୍ୟତା ଦେଉଛନ୍ତି। କାରଣ ଦକ୍ଷତା ବିକାଶର ମୂଳଦୁଆ ହେଉଛି ଆଇଟିଆଇ ଏବଂ ପଲିଟେକନିକ। ଦକ୍ଷତା ବିକାଶରେ ମହିଳାଙ୍କ ସଂଖ୍ୟା ବୃଦ୍ଧି କରିବା ପାଇଁ ମଧ୍ୟ ରାଜ୍ୟ ସରକାର ପ୍ରୟାସ ଜାରି ରଖିଛନ୍ତି ବୋଲି ସେ ପ୍ରକାଶ କରିଥିଲେ।
ସେହିପରି ତୃଣମୂଳ ସ୍ତରରେ ଦକ୍ଷତା ବିକାଶ କରିବା ନିମନ୍ତେ ରାଜ୍ୟ ସରକାର ବିଭିନ୍ନ ପଦକ୍ଷେପ ନେଇଛନ୍ତି। ବିଦ୍ୟାଳୟ ସ୍ତରରେ ସ୍କିଲ ଭିତ୍ତିଭୂମି ସୁଦୃଢ କରିବା ପାଇଁ ରାଜ୍ୟ ସରକାରଙ୍କ ୫-‘ଟି’ ରୂପାନ୍ତରଣ କାର୍ଯ୍ୟକ୍ରମ ଅଧୀନରେ ‘ମୋ ସ୍କୁଲ ଅଭିଯାନ’ରେ ରାଜ୍ୟର ପାଖାପାଖି ୫୬,୦୦୦ ସରକାରୀ ବିଦ୍ୟାଳୟର ରୂପାନ୍ତରଣ କରିବା ପାଇଁ ପଦକ୍ଷେପ ନିଆଯାଇଛି ବୋଲି ଶ୍ରୀ ବାଗ୍ଚୀ ଉଲ୍ଲେଖ କରିଥିଲେ।
ସୂଚନାଯୋଗ୍ୟ ଯେ ଦକ୍ଷତା ବିକାଶ ଏବଂ ଉଦ୍ୟୋଗ ମନ୍ତ୍ରଣାଳୟର ତାଲିମ ନିର୍ଦ୍ଦେଶାଳୟ ପାଇଁ ଏହି ସେବା ସ୍ୱତନ୍ତ୍ର ଭାବରେ ସୃଷ୍ଟି କରାଯାଇଛି ଏବଂ ଏହା ଗ୍ରୁପ୍ ’ଏ’ ସେବା ଅଟେ। ସଂଘ ଲୋକ ସେବା ଆୟୋଗ(ୟୁପିଏସ୍ସି) ଦ୍ୱାରା ପରିଚାଳିତ ଭାରତୀୟ ଇଞ୍ଜିନିୟରିଂ ସେବା ପରୀକ୍ଷା ମାଧ୍ୟମରେ ଆଇଏସ୍ଡିଏସ୍ କ୍ୟାଡରର ଅଧିକାରୀଙ୍କୁ ଚୟନ କରାଯାଇଥାଏ ଏହି ଆଇଏସ୍ଡିଏସ୍ ଅଧିକାରୀମାନେ ଦେଶର ସ୍କିଲ ଇକୋ ସିଷ୍ଟମକୁ ସୁଦୃଢ କରିବାରେ ପ୍ରମୁଖ ଭୂମିକା ଗ୍ରହଣ କରିବେ। ଏହି ଅବସରରେ ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗ ଅତିରିକ୍ତ ସଚିବ ଶ୍ରୀ ପିନାକୀ ପଟ୍ଟନାୟକ ମଧ୍ୟ ଉପସ୍ଥିତ ଥିଲେ।