ପୁରୀ: ଆଜି ହେଉଛି ବିଶ୍ବ ପ୍ରସିଦ୍ଧ ରଥଯାତ୍ରା। ଗତ ଦୀର୍ଘ ଦୁଇ ବର୍ଷ ଧରି ତିନିଠାକୁରଙ୍କୁ ତିନି ରଥରେ ଦେଖିବା ଭକ୍ତଙ୍କ ସୌଭାଗ୍ୟରେ ନ ଥିଲା। ହେଲେ ଆଜି ତିନିଠାକୁର ସିଧା ରଥ ଉପରେ ଭକ୍ତଙ୍କୁ ଦେବେ ଦର୍ଶନ। ସେଥିପାଇଁ ପୋଲିସ ପ୍ରଶାସନ ତରଫରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି।
ଶ୍ରୀମନ୍ଦିର ପ୍ରଶାସନର ନିଷ୍ପତି ଅନୁସାରେ ଆଜି ସକାଳ ୬ଟାରେ ମଙ୍ଗଳ ଆଳତୀ କରାଯିବ।ସେହିପରି ୬ ଟା ୧୦ ରେ ମଇଲମ ଲାଗି ହେବ। ୬.୩୦ ରେ ତଡପ ଲାଗି, ରୋଷ ହୋମ, ୭ ଟା ରେ ଅବକାଶ, ୭.୧୦ ରେ ସୂର୍ଯ୍ୟ ପୂଜା, ୭.୩୦ ରେ ଦ୍ବାରପାଳ ପୂଜା ଏବଂ ବେଶ ଶେଷ ହେବ।
କାର୍ଯ୍ୟ ନିର୍ଘଣ୍ଟ ଅନୁସାରେ ସକାଳ ୮ଟା ରୁ ୯ଟା ପର୍ଯ୍ୟନ୍ତ ଗୋପାଳ ବଲ୍ଲଭ ଓ ସକାଳ ଧୂପ ଏବଂ ରଥ ପ୍ରତିଷ୍ଠା ହେବ। ୯.୧୫ ରେ ମଙ୍ଗଳାର୍ପଣ କରାଯିବ। ପ୍ରଭୁଙ୍କ ପହଁଣ୍ଡି ବିଜେ ସକାଳ ୯.୩୦ ଆରମ୍ଭ କରାଯାଇ ୧୨.୩୦ ରେ ଶେଷ ହେବ ବୋଲି ନିଷ୍ପତି ନିଆଯାଇଛି।
ସେହିପରି ୧୨. ୩୦ରୁ ଦିନ ଗୋଟାଏ ପର୍ଯ୍ୟନ୍ତ ଶ୍ରୀମଦନ ମୋହନ, ଶ୍ରୀରାମ ଓ ଶ୍ରୀକୃଷ୍ଣ ବିଜେ ନିତି କରାଯିବ। ସେହିପରି ଦିନ ୧.୩୦ ରୁ ୨.୦୦ ପର୍ଯ୍ୟନ୍ତ ଚିତା ଲାଗି ବେଶ ଶେଷ ହେବ। ଅପରାହ୍ନ ୨.୩୦ ରୁ ୪ ପର୍ଯ୍ୟନ୍ତ ଗଜପତି ମହାରାଜା ଛେରା ପହଁରା କରିବେ।
ଏହାପରେ ଚାରମାଳ ଫିଟା, ଘୋଡା ଓ ସାରଥୀ ଲାଗି କରାଯିବ। ଏହାପରେ ଦିନ ୪ଟାରୁ ରଥଟଣା ଆରମ୍ଭ ହେବ। ରଥଟଣା ସରିବା ପରେ ଅନ୍ୟାନ୍ୟ ନୀତି ରଥ ଉପରେ ହେବ।
