ନୂଆଦିଲ୍ଲୀ: ବର୍ତ୍ତମାନ ସାମାଜିକ ଗଣମାଧ୍ୟମରେ ଏକ ଫଟୋ ବେଶ ଭାଇରାଲ ହେବାରେ ଲାଗିଛି। ତାହା ହେଉଛି କଂଗ୍ରେସ ନେତା ରାହୁଳ ଗାନ୍ଧୀ, ଭଉଣୀ ପ୍ରିୟଙ୍କା ଗାନ୍ଧୀଙ୍କୁ ଚୁମ୍ବନ ଦେଉଥିବାର ଫଟୋ। ଗତକାଲି ରାହୁଳ ପୁଣିଥରେ ଆରମ୍ଭ କରିଥିବା ଭାରତ ଯୋଡ ଯାତ୍ରା ମଞ୍ଚ ଉପରେ ରାହୁଳ ପ୍ରିୟଙ୍କାକୁ ଏପରି ସ୍ନେହ କରୁଥିବାର ଦେଖିବାକୁ ମିଳିଥିଲା।
ସେହି ମଞ୍ଚ ଉପରେ ପାଖରେ ବସିଥିବା ପ୍ରିୟଙ୍କା କାନ ପାଖକୁ ଯାଇ ରାହୁଳ କିଛି କହିଥିଲେ। ଏହା ଶୁଣିବା ପରେ ପ୍ରିୟଙ୍କା ଜୋରରେ ହସିଥିଲେ। ଏହାପରେ ରାହୁଳ ପ୍ରିୟଙ୍କାଙ୍କ କାନ୍ଧରେ ହାତ ପକାଇ ନିଜ ଆଡକୁ ଟାଣି ଆଣିଲେ। ପ୍ରଥମେ ସେ ତାଙ୍କ ମୁଣ୍ଡକୁ ଚୁମ୍ବନ ଦେଇଥିଲେ। ଯାହାକୁ ନେଇ ପ୍ରିୟଙ୍କା ଖୁସିରେ ହସିବାକୁ ଲାଗିଥିଲେ।
ପୁଣି କିଛି ସମୟ ପରେ ପ୍ରିୟଙ୍କାକୁ ନିଜ ଆଡକୁ ଟାଣି ଆଣି ରାହୁଳ ତାଙ୍କ ଗାଲରେ ଚୁମ୍ବନ ଦେଇଥିଲେ। ଏଥିରେ ପ୍ରିୟଙ୍କା ଜୋରରେ ହସୁଥିବାର ପରିଲକ୍ଷିତ ହୋଇଥିଲା। ମଞ୍ଚ ଉପରେ ଥିବା ଅତିଥୀ ଏବଂ ମଞ୍ଚ ତଳେ ବସିଥିବା କର୍ମିମାନେ ଏହାକୁ ତାଳିମାରି ସ୍ବାଗତ କରିଥିଲେ।
ଏହି ଫଟୋ ଏବଂ ଭିଡିଓ ସାମାଜିକ ଗଣମାଧ୍ୟମରେ ପ୍ରକାଶ ପାଇବା ପରେ ତାହାକୁ ବହୁ ସଂଖ୍ୟାରେ ସ୍ବାଗତ କରାଯାଇଛି। ପ୍ରଥମେ ଏହାକୁ ଯୁବ କଂଗ୍ରେସର ଫେସବୁକ ପେଜରେ ସେୟାର କରାଯାଇଥିଲା। ପରେ ପରେ ବିଭିନ୍ନ କଂଗ୍ରେସର ସାମାଜିକ ଗଣମାଧ୍ୟମରେ ଏହି ଫଟୋ ଅଳ୍ପ ସମୟ ମଧ୍ୟରେ ଭାଇରାଲ ହେବାରେ ଲାଗିଲା।
କିଛିଦିନ ବିଶ୍ରାମ ପରେ ରାହୁଳ ପୁଣି ଥରେ ଭାରତ ଯୋଡ ଯାତ୍ରା ଆରମ୍ଭ କରିଛନ୍ତି। ଗତକାଲି ସେ ଦିଲ୍ଲୀ ସୀମାରୁ ଉତ୍ତର ପ୍ରଦେଶ ମଧ୍ୟକୁ ପ୍ରବେଶ କରିଥିଲେ। ସେଠାରେ ପ୍ରିୟଙ୍କା ଗାନ୍ଧୀ ରାହୁଳ ସ୍ବାଗତ କରିଥିଲେ। ଏହି ସ୍ବାଗତ ସଭାରେ ପ୍ରିୟଙ୍କା କେନ୍ଦ୍ର ସରକାରଙ୍କ ଉପରେ ଖୁବ ବର୍ଷିଥିଲେ।
ସେ କହିଥିଲେ ଯେ, ଦେଶରେ ଆଦାନୀ ଆମ୍ବାନୀ ସବୁ ବଡବଡ ନେତାଙ୍କୁ କିଣି ନେଲେ, ସବୁ ପିଏସୟୁ କିଣି ନେଲେ, ମିଡିଆକୁ ମଧ୍ୟ କିଣି ନେଲେ। ହେଲେ ମୋର ଭାଇକୁ ସେମାନେ କିଣିପାରିଲେ ନାହିଁ। ରାହୁଳ ବିରୋଧରେ ଏକ ଏଜେନ୍ସିକୁ ଲଗାଇଥିଲେ, ହେଲେ ମୋ ଭାଇ ତାହାକୁ ଖାତିର କଲା ନାହିଁ।
ରାହୁଳ ଗାନ୍ଧୀଙ୍କ ଭାରତ ଯୋଡ ଯାତ୍ରା ପ୍ରଥମ ପର୍ଯ୍ୟାୟରେ 12 ଟି ରାଜ୍ୟ ଏବଂ 3570 କିଲୋମିଟର ପଦଯାତ୍ରା କରିବା ପରେ ଏବଂ ପୁଣି ଦ୍ବିତୀୟ ପର୍ଯ୍ୟାୟ ଆରମ୍ଭ କରିଛନ୍ତି।