ଭୁବନେଶ୍ବର: ଆଜି ହେଉଛି ପବିତ୍ର ମହାଶିବରାତ୍ରି। ଏହି ଉପଲକ୍ଷେ ଆଜି ସମସ୍ତ ଶିବ ମନ୍ଦିରରେ ଭକ୍ତଙ୍କର ଭିଡ ପରିଲକ୍ଷିତ ହୋଇଛି। ସେହିପରି ଓଡିଶାର ପ୍ରସିଦ୍ଧ ଶୈବପିଠ ପ୍ରଭୃ ଲିଙ୍ଗରାଜଙ୍କ ମନ୍ଦିରରେ ମଧ୍ୟ ଭିଡ ପରିଲକ୍ଷିତ ହୋଇଛି। ଭକ୍ତମାନେ ଧାଡିବାନ୍ଧି ମନ୍ଦିରରେ ପ୍ରଭୃଙ୍କ ଦର୍ଶନ କରିବାରେ ଲାଗିଛନ୍ତି।
ତେବେ ଶିବରାତ୍ରିକୁ ଦୃଷ୍ଟିରେ ରଖି ପ୍ରଭୃ ଲିଙ୍ଗରାଜ ମନ୍ଦିରକୁ ବିଭିନ୍ନ ଫୁଲରେ ସଜା ଯାଇଛି। ସେହିପରି ମନ୍ଦିର ବାହାରେ ମଧ୍ୟ ବିଭିନ୍ନ ରଂଗବେରଂଗର ଝୋଟି ଚିତା ଅଙ୍କନ କରାଯାଇଛି। ଫଳରେ ଯେଉଁ ଭକ୍ତ ମନ୍ଦିର ଆସୁଛନ୍ତି ସେମାନଙ୍କ ପାଇଁ ଏହା ବେଶ ଆକର୍ଷଣର କେନ୍ଦ୍ର ବିନ୍ଦୁ ପାଲଟିଛି।
ଏଥର ୧୦ଟାରେ ଉଠିବ ମହାଦ୍ବୀପ। ଆଜି ଭୋର ୩ ଟାରୁ ଦିନ ୧୧ ଟା ପର୍ଯ୍ୟନ୍ତ ସାହାଣମେଲା ଦର୍ଶନ କରାଯାଇଥିଲା। ଏହାପରେ ବିଭିନ୍ନ ନୀତିକାନ୍ତି କରାଯାଇଥିଲା। ସେହିପରି ରାତିରେ ମହାଦ୍ବୀପ ଉଠି ସାରିବା ପରେ ଭୋର ୩ ଟା ୪୫ ରେ ହରିହର ଭେଟ କାର୍ଯ୍ୟକ୍ରମ ରହିଛି।
ସେହିପରି ଭକ୍ତମାନେ ଶାନ୍ତି ଶୃଙ୍ଖଳାରେ ପ୍ରଭୃଙ୍କ ଦର୍ଶନ ପାଇଁ ମନ୍ଦିର ପ୍ରଶାସନ ତଥା ପୋଲିସ ପ୍ରଶାସନ ତରଫରୁ ବ୍ୟାପକ ବନ୍ଦୋବସ୍ତ କରାଯାଇଛି। ସେଠାରେ ୩୨ ପ୍ଲାଟୁନ୍ ଫୋର୍ସ ମୁତୟନ କରାଯାଇଛି। ସେହିପରି ଯେଉଁମାନେ ଗାଡି ନେଇ ଆସିବେ ସେମାନଙ୍କ ପାଇଁ ୧୩ଟି ପାର୍କିଂ ସ୍ଥାନ ଚିହ୍ନଟ କରାଯାଇଛି।