ପୁରୀ: ଆଜି ଅପରାହ୍ନରେ ଶ୍ରୀମନ୍ଦିରରେ ଜଗନ୍ନାଥଙ୍କ ଦର୍ଶନ କରିଛନ୍ତି ପଶ୍ଚିମବଂଗ ମୁଖ୍ୟମନ୍ତ୍ରୀ ମମତା ବାନାର୍ଜୀ। ଆଜି ମନ୍ଦିର ନିକଟରେ ପହଞ୍ଚିବା ପରେ ସିଂହଦ୍ବାରରେ ତାଙ୍କୁ ସେବାୟତ ତଥା ପୁରୀ ପ୍ରଶାସନ ତରଫରୁ ସ୍ଗାଗତ କରାଯାଇଥିଲା। ତାଙ୍କୁ ଜଗନ୍ନାଥଙ୍କ ପାଟବସ୍ତ୍ର ଉପହାର ଦେଇ ମନ୍ଦିର ଭିତରକୁ ପାଛୋଟି ନିଆଯାଇଥିଲା।
ସେ ମନ୍ଦିର ଭିତରେ ପ୍ରାୟ ଏକ ଘଣ୍ଟା ଧରି ରହିଥିଲେ। ସେ ରତ୍ନସିଂହାସନ ନିକଟରେ ରହି ଶ୍ରୀଜୀୟୁଙ୍କ ଦର୍ଶନ କରିବା ସହିତ ପୂଜାପାଠ କରିଥିଲେ। ଏହାପରେ ସେ ମନ୍ଦିର ଭିତରେ ଥିବା ପାର୍ଶ ଦେବାଦେବୀଙ୍କୁ ମଧ୍ୟ ଦର୍ଶନ କରିଥିଲେ। ମମତାଙ୍କ ନାମରେ ବାରହାତର ଏକ ପତକା ଶ୍ରୀମନ୍ଦିର ନୀଳଚକ୍ରରେ ବନ୍ଧା ଯାଇଥିଲା।
ଖୋଦ ମମତା ନିଜେ କୀର୍ତ୍ତନ ଚକଡାରେ ରହି ପତାକା ବନ୍ଧା ପର୍ବ ଦର୍ଶନ କରି ଭାବବିହ୍ବଳ ହୋଇପଡିଥିଲେ। ତାଙ୍କ ସହିତ ତାଙ୍କର କୂଳପୁରୋହିତ ସେବାୟତ ସମସ୍ତେ ମନ୍ଦିର ଦର୍ଶନ କରାଇଥିଲେ। ଏହାପରେ ମମତା ମନ୍ଦିର ମଧ୍ୟରେ ବ୍ରାହ୍ମଣମାନଙ୍କୁ ପ୍ରସାଦ ଖାଇବାକୁ ଦେବା ସହିତ ନିଜେ ମଧ୍ୟ ତାଙ୍କ ସହିତ ବସି ଖାଇଥିଲେ। ଶେଷରେ ବ୍ରାହ୍ମଣ ଏବଂ ସେବାୟତମାନଙ୍କୁ ଦକ୍ଷିଣା ପ୍ରଦାନ କରିଥିଲେ।
ସେ ମନ୍ଦିରରୁ ପ୍ରତ୍ୟାବର୍ତ୍ତ କରିବା ବେଳେ ତାଙ୍କୁ ଏକ ଜଗନ୍ନାଥ ମୂର୍ତ୍ତି ଏବଂ ଫଟୋଚିତ୍ର ସେବାୟତଙ୍କ ତରଫରୁ ପ୍ରଦାନ କରାଯାଇଥିଲା। ମମତା ମନ୍ଦିର ପ୍ରବେଶ ପୂର୍ବରୁ କିଛି ବାଟ ସେବାୟତଙ୍କ ଗହଣରେ ଚାଲିଚାଲି ସିଂହଦ୍ବାର ନିକଟକୁ ଆସିଥିଲେ। ତାଙ୍କର ଗସ୍ତକୁ ଦୃଷ୍ଟିରେ ରଖି ସୁରକ୍ଷା ବ୍ୟବସ୍ଥା କଡାକଡି କରାଯାଇଥିଲା।
ଏହା ପୂର୍ବରୁ ଆଜି ମମତା ପୂର୍ବାହ୍ନରେ ପୁରୀରେ ହେବାକୁ ଥିବା ପଶ୍ଚିମବଂଗ ସରକାରଙ୍କ ଅତିଥୀ ଭବନ ଜାଗା ବୁଲି ଦେଖିଥିଲେ। ଏହି ଅତିଥୀ ଭବନ ସିପସରୁବାଲି ନିକଟସ୍ଥ ମଙ୍ଗଳା ମୁହାଣରେ କରାଯିବ ବୋଲି ନିଷ୍ପତି ହୋଇଛି। ଏହି ସମୟରେ ମୁଖ୍ୟଶାସନ ସଚିବ ପ୍ରଦୀପ ଜେନାଙ୍କ ସହିତ ପୁରୀ ଜିଲ୍ଲାପାଳ ସହିତ ବହୁ ଅଧିକାରୀ ଉପସ୍ଥିତ ଥିଲେ।
ଆସନ୍ତାକାଲି ସେ ଭୁବନେଶ୍ବର ଫେରି ନବୀନ ନିବାସରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସାକ୍ଷାତ କରିବେ। ତେବେ ଏହି ସାକ୍ଷାତ ସଂପୂର୍ଣ୍ଣ ସୌଜନ୍ୟ ମୂଳକ। ଏଥିରେ କୌଣସି ରାଜନୈତିକ ଆଲୋଚନା ନାହିଁ ବୋଲି ମମତା ପୁରୀ ସାମ୍ବାଦିକମାନଙ୍କୁ କହିଛନ୍ତି। ନବୀନଙ୍କ ସହିତ ଆଲୋଚନା ପରେ ସେ କୋଲକାତା ଫେରିଯିବେ।
