ନୂଆଦିଲ୍ଲୀ: ଗତ ୨୨ ଦିନ ଧରି ଜନ୍ତର ମନ୍ତ୍ରରରେ ଧାରଣା ଉପରେ ବସିଥିବା କୁସ୍ତିଯୋଦ୍ଧାମାନେ କେନ୍ଦ୍ର ମନ୍ତ୍ରୀ ସ୍ମୃତି ଇରାନୀଙ୍କ ସମେତ ବିଜେପିର ମହିଳା ସାଂସଦମାନଙ୍କୁ ଏକ ଖୋଲା ଚିଠି ଲେଖିଛନ୍ତି। ଏହି ଚିଠି ମାଧ୍ୟମରେ କୁସ୍ତିଯୋଦ୍ଧା ମହିଳା ସାଂସଦଙ୍କ ସମର୍ଥନ ଲୋଡିଛନ୍ତି, ଯାହାଫଳରେ ବ୍ରିଜ ଭୂଷଣ ଶରଣ ସିଂଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରିବ।
କୁସ୍ତିଯୋଦ୍ଧାମାନେ କହିଛନ୍ତି ଯେ, “ବେଟି ବାଚାଓ, ବେଟି ପଢାଓ”ର ସ୍ଲୋଗାନ ଉଠାଇଥିବା ଏହି ମହିଳା ସାଂସଦମାନେ ମଧ୍ୟ ଆମର ଦୁଃଖରେ ଯୋଗଦେବା ଉଚିତ ଏବଂ ଆମକୁ ସମର୍ଥନ କରିବା ଉଚିତ। କେବଳ ଏତିକି ନୁହେଁ, ମେ ୧୬ ତାରିଖରେ ଦେଶର ଜିଲ୍ଲା ମୁଖ୍ୟାଳୟରେ ଏକ ଦିନିଆ ସତ୍ୟାଗ୍ରହ ଆୟୋଜନ କରିବାକୁ ମଧ୍ୟ ଦାବି କରାଯାଇଛି।
ଜନ୍ତର ମନ୍ତ୍ରରରେ ଗଣମାଧ୍ୟମକୁ ସମ୍ବୋଧିତ କରି ବିନେଶ ଫୋଗାଟ କହିଛନ୍ତି ଯେ, ଆମେ ଏଠାରେ ଧାରଣ ଉପରେ ବସିବାର ୨୨ ଦିନ ବିତିଗଲାଣି, କିନ୍ତୁ ଏପର୍ଯ୍ୟନ୍ତ ବିଜେପିରୁ କେହି ଆମ ପାଖକୁ ଆସିନାହାଁନ୍ତି। କୌଣସି ମହିଳା ସାଂସଦ ମଧ୍ୟ ଆସି ନାହାଁନ୍ତି। ଯେଉଁମାନେ ବେଟି ବାଚାଓ, ବେଟି ପଢାଓ ସ୍ଲୋଗାନ ଦିଅନ୍ତି, ସେମାନେ ଏହି ଦୁଃଖରେ ଆମ ସହ ଯୋଗ ଦେଇ ନାହାଁନ୍ତି। ସୋମବାର ଦିନ ଆମେ ବିଜେପିର ମହିଳା ସାଂସଦମାନଙ୍କୁ ସାହାଯ୍ୟ ମାଗିବା ପାଇଁ ଏକ ଖୋଲା ଚିଠି ଲେଖିବୁ। ଆମର କୁସ୍ତିଯୋଦ୍ଧାମାନେ ଏହି ପତ୍ରକୁ ସେମାନଙ୍କ ଘରେ ପହଞ୍ଚାଇବେ।