ମୁମ୍ବାଇ: ରାଷ୍ଟ୍ରବାଦୀ କଂଗ୍ରେସ ପାର୍ଟିରେ ଚାଲିଥିବା ଅସ୍ଥିରତା ବନ୍ଦ ହେବାର ନାମ ନେଉନାହିଁ। ଅଜିତ ପାୱାର ଏବଂ ଶରଦ ପାୱାର ଦଳରେ ବିଧାୟକଙ୍କ ଆସିବା ଯିବା ଲାଗିରହିଛି। ବର୍ତ୍ତମାନ ଆଉ ଜଣେ ବିଧାୟକ ଅଜିତ ପାୱାରଙ୍କ ଦଳରୁ ସିନିୟର ପାୱାରଙ୍କ ଦଳକୁ ଫେରିଛନ୍ତି। ମରକନ୍ଦ ଯାଦବ ପାଟିଲ ହେଉଛନ୍ତି ତୃତୀୟ ବିଧାୟକ ଯିଏକି ଏକ ସପ୍ତାହ ମଧ୍ୟରେ ଅଜିତ ପାୱାରଙ୍କ ଦଳ ଛାଡିଛନ୍ତି। ତାଙ୍କ ପୂର୍ବରୁ ପୁତୁରା ଦଳ ଛାଡି ଦଦାଙ୍କ କ୍ୟାମ୍ପକୁ ରାମରାଜେ ନାୟକ-ନିମ୍ବଲକର ଏବଂ ଦୀପକ ଚହ୍ଵାନ ଫେରିଛନ୍ତି।
ମରକନ୍ଦ ଯାଦବ ପାଟିଲ ମହାରାଷ୍ଟ୍ରର ସତରା ଜିଲ୍ଲାର ୱାଇ ବିଧାନସଭା ଆସନରୁ ବିଧାୟକ ଅଟନ୍ତି। ତାଙ୍କ ପଥ ଅନୁସରଣ କରି ଶତାଧିକ ମରକନ୍ଦଙ୍କ ସମର୍ଥକ ମଧ୍ୟ ଶରଦ କ୍ୟାମ୍ପକୁ ଫେରିଛନ୍ତି। ଯାଦବଙ୍କ ପୂର୍ବରୁ ରାମରାଜେ ନାୟକ-ନିମ୍ବଲକର ଏବଂ ଦୀପକ ଚହ୍ଵାନ ଶୁକ୍ରବାର ଦିନ ଶରଦ ପାୱାର ଗୋଷ୍ଠୀକୁ ଫେରିବାକୁ ନିଷ୍ପତ୍ତି ନେଇଥିଲେ।
ଅନ୍ୟପକ୍ଷରେ ଶରଦ ପାୱାର ଦଳର କିରଣ ଲାମହାଟେ ଅଜିତଙ୍କ କ୍ୟାମ୍ପକୁ ଆସିଛନ୍ତି। କିରଣ ତୃତୀୟ ଥର ପାଇଁ ପ୍ରତ୍ୟାବର୍ତ୍ତନ କରି ଅଜିତଙ୍କ ଦଳରେ ଯୋଗ ଦେଇଛନ୍ତି। ପ୍ରଥମେ ପୁତୁରାଙ୍କ ଗୋଷ୍ଠୀରେ ଯୋଗ ଦେଇଥିଲେ, ଦୁଇ ଦିନ ପରେ ଦାଦାଙ୍କ ପାର୍ଶ୍ୱରେ ଯୋଗ ଦେଇଥିଲେ ଏବଂ ପରେ ପୁତୁରାଙ୍କ ନିକଟକୁ ଫେରିଆସିଲେ। ଜୁଲାଇ ୨ ତାରିଖରେ ଅଜିତଙ୍କ ଶପଥ ଗ୍ରହଣ ପରେ ଶରଦଙ୍କ ଦଳକୁ କିରଣ ଯାଇଥିଲେ। ବର୍ତ୍ତମାନ ଅଜିତଙ୍କ କ୍ୟାମ୍ପକୁ ଫେରିଛନ୍ତି। ଅଜିତଙ୍କ ଶପଥ ଗ୍ରହଣ ସମୟରେ ସେ ସେଠାରେ ଉପସ୍ଥିତ ଥିଲେ।