କୋଲକାତା: ବିବାଦୀୟ ଜମିରୁ ଶିବଲିଙ୍ଗ ହଟାଇବା ଉଚିତ ବୋଲି କଲିକତା ହାଇକୋର୍ଟର ବିଚାରପତି ଜଷ୍ଟିସ ଜୟ ସେନଗୁପ୍ତା ଏକ ମାମଲାରେ ରାୟ ଦେଇଛନ୍ତି। କିନ୍ତୁ ସେହି ଶିବଲିଙ୍ଗଙ୍କୁ ଉଚ୍ଛେଦ କରିବାକୁ ନିଷ୍ପତ୍ତି ନେବାବେଳେ ସହକାରୀ ରେଜିଷ୍ଟ୍ରାର ହଠାତ୍ ଚେତାଶୂନ୍ୟ ହୋଇପଡ଼ିଥିଲେ। ତାଙ୍କୁ କୋର୍ଟର ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ଅନ୍ୟପକ୍ଷରେ ଆସିଷ୍ଟାଣ୍ଟ ରେଜିଷ୍ଟ୍ରାରଙ୍କ ଅବସ୍ଥା ଦେଖି ବିଚାରପତି ମଧ୍ୟ ନିଜ ନିଷ୍ପତ୍ତି ବଦଳାଇଛନ୍ତି।
କୋର୍ଟ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ମୁର୍ଶିଦାବାଦର ବେଲଡଙ୍ଗାର ଖିଦିରପୁରର ବାସିନ୍ଦା ସୁଦୀପ ପାଲ ଓ ଗୋବିନ୍ଦ ମଣ୍ଡଳଙ୍କ ମଧ୍ୟରେ ଏକ ଜମିକୁ ନେଇ ଦୀର୍ଘଦିନ ଧରି ବିବାଦ ଲାଗି ରହିଥିଲା। ଗତ ବର୍ଷ ମେ’ ମାସରେ ଏହି ବିବାଦ ଗଣ୍ଡଗୋଳ ଚରମ ସୀମାରେ ପହଞ୍ଚିଥିଲା। ଏହାପରେ ଗୋବିନ୍ଦ ବିବାଦୀୟ ଜମିରେ ରାତାରାତି ଶିବଲିଙ୍ଗ ସ୍ଥାପନ କରିଥିବା ଜଣାପଡ଼ିଥିଲା। ଏନେଇ ସୁଦୀପ ଥାନାରେ ଅଭିଯୋଗ କରିବା ସହ ଘଟଣାର ତଦନ୍ତ କରାଯିବ ବୋଲି ପ୍ରତିଶ୍ରୁତି ଦେଇଥିଲେ। କିନ୍ତୁ ପୁଲିସ କୌଣସି କାର୍ଯ୍ୟାନୁଷ୍ଠାନ ନ ନେବାରୁ ସୁଦୀପ କଲିକତା ହାଇକୋର୍ଟରେ ମାମଲା ରୁଜୁ କରିଥିଲେ।
ଆବେଦନକାରୀ ସୁଦୀପ ପାଲଙ୍କ ଓକିଲ ତରୁଣଜ୍ୟୋତି ତିୱାରୀ ଅଦାଲତଙ୍କୁ କହିଛନ୍ତି ଯେ ଗୋବିନ୍ଦା ଜାଣିଶୁଣି ବିବାଦୀୟ ଜମିରେ ଶିବଲିଙ୍ଗ ସ୍ଥାପନ କରିଥିଲେ। ପୁଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନଥିବାରୁ କୋର୍ଟ ଏହି ମାମଲାରେ ହସ୍ତକ୍ଷେପ କରନ୍ତୁ।
ଗୋବିନ୍ଦାଙ୍କ ଓକିଲ ମୃତ୍ୟୁଞ୍ଜୟ ଚଟ୍ଟୋପାଧ୍ୟାୟ ବିଚାରପତିଙ୍କୁ କହିଛନ୍ତି, ମୋ କ୍ଲାଏଣ୍ଟ ଶିବଲିଙ୍ଗ ସ୍ଥାପନ କରିନଥିଲେ, କିନ୍ତୁ ଶିବଲିଙ୍ଗ ନିଜେ ମାଟିରୁ ବାହାରି ଆସିଥିଲେ। ଉଭୟ ପକ୍ଷର ଯୁକ୍ତି ଶୁଣିବା ପରେ ଜଷ୍ଟିସ ଜୟ ସେନଗୁପ୍ତା ଏହାକୁ ଜମିରୁ ହଟାଇବାକୁ ନିର୍ଦ୍ଦେଶ ଦେଇଥିଲେ। ବିଚାରପତିଙ୍କ ଏହି ନିଷ୍ପତ୍ତି ରେକର୍ଡ କରିବାବେଳେ ସହକାରୀ ରେଜିଷ୍ଟ୍ରାର ବିଶ୍ୱନାଥ ରାୟ ହଠାତ୍ ଚେତାଶୂନ୍ୟ ହୋଇପଡ଼ିଥିଲେ। ଏହା ଦେଖି ବିଚାରପତି ମଧ୍ୟ ନିଜ ନିଷ୍ପତ୍ତି ବଦଳାଇ ନିମ୍ନ ଅଦାଲତରେ ସିଭିଲ କେସ୍ ମାଧ୍ୟମରେ ଏହି ମାମଲା ଚଳାଇବାକୁ କହିଥିଲେ ।
ତେବେ ଶ୍ରବଣ ମାସରେ ଚାରିଆଡ଼େ ଶିବଙ୍କ ମୁଣ୍ଡରେ ଜଳ ଅର୍ପଣ କରିବାର ସମୟ ଆସିଥାଏ। ଏଭଳି ସମୟରେ କଲିକତା ହାଇକୋର୍ଟ ଶିବଲିଙ୍ଗ ଉଚ୍ଛେଦ ନିଷ୍ପତ୍ତି ରେକର୍ଡ କରିବାରେ ଅସୁବିଧାର ସମ୍ମୁଖୀନ ହେଉଥିବା ଦେଖି ସମସ୍ତେ ଆଶ୍ଚର୍ଯ୍ୟ ହୋଇଥିଲେ।