ନୂଆଦିଲ୍ଲୀ: କଂଗ୍ରେସ ସଭାପତି ମଲ୍ଲିକାର୍ଜୁନ ଖଗଡେ ଆଜି ସ୍ୱାଧୀନତା ଦିବସ ପାଳନ ଅବସରରେ ଲାଲ କିଲାକୁ ନ ଯିବା ବିଷୟରେ କହିଥିଲେ ଯେ, ତାଙ୍କ ଆଖିରେ କିଛି ସମସ୍ୟା ଥିବାରୁ ସେ ଏଥିରେ ଯୋଗ ଦେଇ ପାରିବେ ନାହିଁ। ଏହି ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପରେ ଖଡଗେ ଆକ୍ରମଣ କରି କହିଥିଲେ ଯେ, ସେ ଆସନ୍ତା ବର୍ଷ ତାଙ୍କ ବାସଭବନରୁ ପତାକା ଉତ୍ତୋଳନ କରିବେ। ଏହାକୁ ନେଇ ବିଜେପି ପାଲଟା ଆକ୍ରମଣ କରିଛି।
କେନ୍ଦ୍ର ମନ୍ତ୍ରୀ ତଥା ବିଜେପି ନେତା ହରଦୀପ ସିଂ ପୁରୀ କହିଛନ୍ତି ଯେ, ବୋଧହୁଏ ଖଡଗେ ସାହାବଙ୍କ ଆଖିରେ ସମସ୍ୟା ରହିଛି। ସେ ଲାଲକିଲାକୁ ଆସିନାହାଁନ୍ତି, କିନ୍ତୁ ପରିବାର ସଦସ୍ୟ କିଛି କାର୍ଯ୍ୟକ୍ରମକୁ ଯାଇଛନ୍ତି। ଆମକୁ କହିବାକୁ ପଡିବ ଯେ, ପିଏମ ମୋଦୀ ଆସନ୍ତା ବର୍ଷ ପୁଣିଥରେ ଲାଲକିଲାରୁ ଦେଶର ଲୋକଙ୍କୁ ସମ୍ବୋଧିତ କରିବେ।
ବାସ୍ତବରେ ଆସନ୍ତା ବର୍ଷ ଲୋକସଭା ନିର୍ବାଚନ ହେବାକୁ ଯାଉଛି। ଏଭଳି ପରିସ୍ଥିତିରେ ଯଦି ବିଜେପି ନେତୃତ୍ୱାଧୀନ ନ୍ୟାସନାଲ ଡେମୋକ୍ରାଟିକ୍ ଆଲାଇନ୍ସ (ଏନଡିଏ) ସଂଖ୍ୟାଗରିଷ୍ଠତା ହାସଲ କରେ, ତେବେ ପ୍ରଧାନମନ୍ତ୍ରୀ ମୋଦୀ ପୁଣିଥରେ ଲାଲ କିଲାରୁ ସ୍ୱାଧୀନତା ଦିବସ ଅବସରରେ ଲୋକଙ୍କୁ ସମ୍ବୋଧିତ କରିବେ, କିନ୍ତୁ ଯଦି ବିରୋଧୀ ଦଳ ‘ଇଣ୍ଡିଆ’ ବିଜୟୀ ହୁଏ , ତେବେ ଏହା ଘଟିବ ନାହିଁ।’
ମଲ୍ଲିକାର୍ଜୁନ ଖଡଗେ କ’ଣ କହିଥିଲେ?:
ନ୍ୟୁଜ୍ ଏଜେନ୍ସି ପିଟିଆଇ ଅନୁଯାୟୀ, ଲାଲ କିଲା ସ୍ୱାଧୀନତା ଦିବସ କାର୍ଯ୍ୟକ୍ରମରୁ ଦୂରେଇ ଯିବା କାରଣ ବିଷୟରେ ପଚରାଯିବାରୁ ଖଡଗେ କହିଥିଲେ ଯେ, ମୋର ଆଖିରେ କିଛି ସମସ୍ୟା ଅଛି। ପ୍ରୋଟୋକଲ୍ ଅନୁଯାୟୀ, ମୁଁ ସକାଳେ ମୋ ବାସଭବନରେ ପତାକା ଉତ୍ତୋଳନ କରିଲି। ଏହା ପରେ ମୋତେ କଂଗ୍ରେସ ମୁଖ୍ୟାଳୟରେ ପତାକା ଉତ୍ତୋଳନ କରିବାକୁ ପଡିଲା।
ଖଡଗେ ଆହୁରି କହିଛନ୍ତି ଯେ, ‘ସୁରକ୍ଷା ଏତେ କଠୋର ଯେ ପ୍ରଧାନମନ୍ତ୍ରୀ ଯିବା ପୂର୍ବରୁ କାହାକୁ ଯିବାକୁ ଅନୁମତି ନାହିଁ। ଯଦି ମୁଁ ସେଠାକୁ ଯାଇଥା’ନ୍ତି, ତେବେ ମୁଁ ଏଠାରେ କାର୍ଯ୍ୟକ୍ରମରେ ଯୋଗ ଦେଇ ନ ଥା’ନ୍ତି। ”ସ୍ୱାଧୀନତା ଦିବସରେ ସେ ଏକ ବାର୍ତ୍ତାରେ ମଧ୍ୟ କହିଛନ୍ତି ଯେ, ବିରୋଧୀ ଦଳ ‘ଇଣ୍ଡିଆନ୍ ନ୍ୟାସନାଲ ଡେଭଲପମେଣ୍ଟାଲ୍ ଇନକ୍ଲୁସିଭ୍ ଆଲାଏନ୍ସ’ (ଇଣ୍ଡିଆ) ଅନ୍ୟାୟ ବିରୁଦ୍ଧରେ ଠିଆ ହେବ ଏବଂ ଜିତିବ।
