World Cup Final: ବର୍ତ୍ତମାନ ସାରା ବିଶ୍ବର ନଜର ଅହମଦାବାଦ ଉପରେ। କାରଣ ହେଲା ସେଠାରେ ନରେନ୍ଦ୍ରମୋଦୀ ଷ୍ଟାଡିୟମରେ ଖେଳାଯିବ ବିଶ୍ବକପ ଫାଇନାଲ ମ୍ୟାଚ। ସେଥିପାଇଁ ଅହମଦାବାଦ ଯିବା ପାଇଁ ସାରା ବିଶ୍ବର ଲୋକେ ବହୁ ଦିନର ଆଗ୍ରହ ସହକାରେ ଅପେକ୍ଷା କରି ରହିଛନ୍ତି।
ହେଲେ ଏହି ଆଗ୍ରହକୁ ଲକ୍ଷ୍ୟ କରି ସେଠାକାର ହୋଟେଲ ଏବଂ ବିମାନ କଂପାନୀ ସେମାନଙ୍କ ଭଡାକୁ ନାହିଁ ନ ଥିବା ବୃଦ୍ଧି କରିଦେଇଛନ୍ତି। ଏକ ପରିସଂଖ୍ୟାନରୁ ଜଣାପଡିଛି ଯେ, ପୂର୍ବରୁ ଅହମଦାବାଦ ହୋଟେଲ ରାତିକ ପାଇଁ 25 ହଜାର ଟଙ୍କା ନେଉଥିବା ବେଳେ ବର୍ତ୍ତମାନ ତାହା ଏକ ଲକ୍ଷ 25 ହଜାରକୁ ଛୁଇଁଛି। ଏତେ ଚଢା ରେଟ ହୋଇଥିଲେ ମଧ୍ୟ ଲୋକେ ରହିବାକୁ ବାଧ୍ୟ ହୋଇଛନ୍ତି।
ତେବେ ଯଦି କୌଣସି ବିଦେଶୀ ନାଗରିକ ରହିବା ପାଇଁ ହୋଟେଲ ବୁକ କରୁଛି ତେବେ ସେ ପୂର୍ବ ଅପେକ୍ଷା ଦଶ ଗୁଣା ଅଧିକ ଭଡା ଦେବାକୁ ପଡୁଛି। ମୁଖ୍ୟତଃ ଅଷ୍ଟ୍ରେଲିଆ ସେମି ଫାଇନାଲ ଖେଳିବା ପରେ ସେହି ଦେଶରୁ ଅଧିକ ପ୍ରଶଂସକ ଅହମଦାବାଦ ଆସି ଭିଡ ଜମାଇସାରିଲେଣି। ସେମାନଙ୍କ ଆଗ୍ରହକୁ ଲକ୍ଷ୍ୟ କରି ହୋଟେଲଗୁଡିକ ନାହିଁ ନ ଥିବା ଭଡା ଆଦାୟ କରିବାରେ ଲାଗିଛନ୍ତି।
କେବଳ ହୋଟେଲ ନୁହେଁ ବିମାନ ସେବା କଂପାନୀମାନେ ମଧ୍ୟ ସେମାନଙ୍କର ଭଡା ବୃଦ୍ଧି କରିଦେଇଛନ୍ତି। ଯେଉଁମାନେ ଜରୁରୀ ଟିକେଟ କାଟୁଛନ୍ତି ସେମାନେ ଏହି ଅଧିକ ଭଡାର ଶୀକାର ହେଉଛନ୍ତି। ପୂର୍ବେ ଚେନ୍ନାଇରୁ ଅହମଦାବାଦ ଅତିକମରେ 5 ହଜାର ଟଙ୍କା ପଡୁଥିବା ବେଳେ ତାହା ବର୍ତ୍ତମାନ 25 ହଜାର ଟଙ୍କାକୁ ଛୁଇଁଛି। ଫଳରେ ଯାତ୍ରୀମାନେ ବର୍ତ୍ତମାନ ବହୁ ଅସୁବିଧାର ସମ୍ମୁଖୀନ ହେବାରେ ଲାଗିଛନ୍ତି।
ପ୍ରକୃତରେ ଦେଖିବାକୁ ଗଲେ ଅହମଦାବାଦ ଷ୍ଟାଡିୟମର କ୍ଷମତା ହେଉଛି ଏକ ଲକ୍ଷ 25 ହଜାର। ତେଣୁ ଅହମଦାବାଦକୁ କ୍ରିକେଟ ପ୍ରଶଂସକ, ବ୍ୟବସାୟୀ ଏବଂ ଷ୍ଟାଡିୟମ ବାହାର ଦର୍ଶକ ଏହିପରି ରବିବାର ଦିନ ପ୍ରାୟ 3 ଲକ୍ଷ ଲୋକଙ୍କର ପ୍ରବେଶ ଘଟିବ। ସେମାନଙ୍କ ମଧ୍ୟରୁ ପ୍ରାୟ 30 ହଜାରରୁ 40 ହଜାର ବିଦେଶୀ ପ୍ରଶଂସକ ନିଶ୍ଚିତ ରହିବେ।
