ନୂଆଦିଲ୍ଲୀ: ଇଣ୍ଡି ମେଣ୍ଟର ଦଳଗୁଡ଼ିକ ମଧ୍ୟରେ ଆସନ ବୁଝାମଣା ଆଲୋଚନା ଏପର୍ଯ୍ୟନ୍ତ କୌଣସି ସିଦ୍ଧାନ୍ତରେ ପହଞ୍ଚି ପାରିନାହିଁ। ବିରୋଧୀ ଇଣ୍ଡି ମେଣ୍ଟରେ ସବୁକିଛି ଠିକ୍ ଅଛି ବୋଲି ଏପର୍ଯ୍ୟନ୍ତ କୌଣସି ସଙ୍କେତ ମିଳିନାହିଁ। ବିଜେପି ବିରୋଧରେ ବିରୋଧୀ ଦଳଗୁଡ଼ିକୁ ଏକାଠି କରିଥିବା ନୀତୀଶ କୁମାରଙ୍କ ଦଳ ଜେଡିୟୁର ଆଭିମୁଖ୍ୟ କହୁଛି ଯେ ମେଣ୍ଟ ମାମଲା ଗୋଳମାଳିଆ ହେବାରେ ଲାଗିଛି।
ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ଜନତା ଦଳ (ୟୁନାଇଟେଡ୍) ନେତା ଗୋପାଳ ମଣ୍ଡଳ ପୁଣିଥରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେଙ୍କ ରାଜନୈତିକ ସ୍ଥିତିକୁ ନେଇ ପ୍ରଶ୍ନ ଉଠାଇଛନ୍ତି।
ଲୋକମାନେ ସମସ୍ତେ ନୀତୀଶ କୁମାରଙ୍କୁ ଜାଣନ୍ତି, ଖଡଗେଙ୍କୁ ନୁହେଁ ବୋଲି ଜେଡିୟୁ ନେତା ମଣ୍ଡଳ ପୁଣି ଥରେ କହିଛନ୍ତି। ଖଡଗେ କିଏ ?…….. ମୁଁ ତାଙ୍କୁ ଜାଣେ ନାହିଁ। ତାଙ୍କ ନାଁ କେହି ଜାଣନ୍ତି ନାହିଁ, ସମସ୍ତେ ଜାଣନ୍ତି ନୀତୀଶ କୁମାର କିଏ। ଇଏ ହେଉଛନ୍ତି ସେହି ଜେଡିୟୁ ବିଧାୟକ ଯିଏ କି ଗତ ମାସରେ କଂଗ୍ରେସ ଅଧ୍ୟକ୍ଷଙ୍କ ପାଇଁ ‘ଖଡଗେ-ଫଡଗେ’ କହିଥିଲେ ଏବଂ ଦାବି କରିଥିଲେ ଯେ ତାଙ୍କୁ କେହି ଜାଣନ୍ତି ନାହିଁ।
ଖଡଗେଙ୍କ ବୟାନ ପରିସ୍ଥିତିକୁ ଖରାପ କରିଛି କି ?
ଶନିବାର ଦିନ ଯେତେବେଳେ କଂଗ୍ରେସ ଅଧ୍ୟକ୍ଷ ଖଡଗେଙ୍କୁ ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ ଇଣ୍ଡି ମେଣ୍ଟର ଆବାହକ କରାଯାଇପାରିବ କି ନାହିଁ ସେ ବିଷୟରେ ପଚରାଯାଇଥିଲ। ଏହାର ଉତ୍ତରରେ ସେ କହିଥିଲେ, “ଏହି ପ୍ରଶ୍ନ (ଇଣ୍ଡିଆ ବ୍ଲକର ଆବାହକ କିଏ ହେବ) କୌନ ବନେଗା କରୋଡ଼ପତି ଭଳି ? ଆଗାମୀ ୧୦-୧୫ ଦିନ ମଧ୍ୟରେ ଆମର ପରବର୍ତ୍ତୀ ବୈଠକରେ ହେବ ତାହା ସ୍ଥିର ହେବ । ଏହା ବିଷୟରେ ଚିନ୍ତା କରନ୍ତୁ ନାହିଁ ।
ନୀତୀଶଙ୍କ ବ୍ୟତୀତ ଅନ୍ୟକେହି ପ୍ରଧାନମନ୍ତ୍ରୀ ହେବା ପାଇଁ ଯୋଗ୍ୟ ନୁହଁନ୍ତି
ଗୋଟିଏ ପଟେ ନୀତୀଶଙ୍କୁ ଇଣ୍ଡି ମେଣ୍ଟର ଆବାହକ କରାଯିବା ନେଇ ଖଡଗେ ସିଧାସଳଖ ଉତ୍ତର ଦେଇ ପାରିନଥିବାବେଳେ ଜେଡିୟୁ ନିଜ ନେତାଙ୍କୁ ଦେଶର ପରବର୍ତ୍ତୀ ପ୍ରଧାନମନ୍ତ୍ରୀ କରିବାକୁ ଲଗାତାର ଚେଷ୍ଟା କରୁଛି । ନୀତୀଶ କୁମାର ଦେଶର ପରବର୍ତ୍ତୀ ପ୍ରଧାନମନ୍ତ୍ରୀ ହେବା ଦରକାର । ସେ ସାରା ଦେଶ ଭ୍ରମଣ କରି ଇଣ୍ଡି ମେଣ୍ଟ ଗଠନ କରିଥିଲେ । ନୀତୀଶ କୁମାରଙ୍କ ବ୍ୟତୀତ ଅନ୍ୟକେହି ପ୍ରଧାନମନ୍ତ୍ରୀ ହେବା ପାଇଁ ଯୋଗ୍ୟ ନୁହଁନ୍ତି । ପ୍ରଶ୍ନ ଉଠୁଛି, ଜେଡିୟୁ ବିନା କୌଣସି ଇଙ୍ଗିତରେ ମଣ୍ଡଳ ଖଡଗେଙ୍କ ବିରୋଧରେ କ୍ରମାଗତଭାବେ ଏଭଳି ବୟାନ ଦେଇପାରିବ କି ?
ଖଡଗେଙ୍କ ଉତ୍ତର ଆମକୁ ପସନ୍ଦ ଆସିନଥିଲା- କେସି ତ୍ୟାଗୀ
ନୀତୀଶଙ୍କୁ ନେଇ ପଚରାଯାଇଥିବା ପ୍ରଶ୍ନର ଖଡଗେ ଯେଉଁଭଳି ଉତ୍ତର ଦେଇଥିଲେ ତାହା ଜେଡିୟୁକୁ ଉପରରୁ ତଳ ପର୍ଯ୍ୟନ୍ତ ଅସହଜ କରିଛି । ଦଳର ମୁଖପାତ୍ର କେସି ତ୍ୟାଗୀ କହିଛନ୍ତି ଯେ, ଶନିବାର ଏ ନେଇ ଗଣମାଧ୍ୟମରେ ଯେଉଁ ଭଳି ପ୍ରଶ୍ନ (ଆବାହକ ପଦକୁ ନେଇ ପଚରାଯାଇଥିବା ପ୍ରଶ୍ନ) ଉପରେ କଂଗ୍ରେସ ମୁଖ୍ୟ ଯେଉଁଭଳି ପ୍ରତିକ୍ରିୟା ରଖିଛନ୍ତି ତାହା ଆମକୁ ପସନ୍ଦ ଆସିନାହିଁ । ଆମ (ଇଣ୍ଡି ମେଣ୍ଟ) ପାଖରେ ସମୟ ଏବଂ ଚିନ୍ତାଧାରାର ଅଭାବ ରହିଛି । ଏବେବି ସମୟ ଅଛି ଯେ ଆମେ ବେଗ ବଢ଼ାଇ ପାରିବା । କିନ୍ତୁ ଭାଇବ୍ରେଣ୍ଟ ଇଣ୍ଡି ମେଣ୍ଟ ପାଇଁ କଂଗ୍ରେସକୁ ପ୍ରସ୍ତୁତି ଦେଖାଇବାକୁ ପଡ଼ିବ ।
ମେଣ୍ଟ ପଛର ଚେହେରା ହେଉଛନ୍ତି ନୀତୀଶ କୁମାର: ଜେଡିୟୁ
ତ୍ୟାଗୀ କହିଛନ୍ତି, ଆବାହକ ବିଷୟରେ ନିଷ୍ପତ୍ତି ନେବାକୁ କଂଗ୍ରେସ ସ୍ୱାଧୀନ । ସେମାନେ ସେମାନଙ୍କ ଦଳକୁ ନେଇ ଚିନ୍ତିତ ଏବଂ ଆମେ ମେଣ୍ଟକୁ ନେଇ ଚିନ୍ତିତ । ଖାଲି ସେତିକି ନୁହେଁ, ବିରୋଧୀ ମେଣ୍ଟର ପ୍ରଧାନମନ୍ତ୍ରୀ ଚେହେରା ବିଷୟରେ ସେ କହିଛନ୍ତି, ଜନତା ଦଳ-ୟୁନାଇଟେଡ୍ ହେଉଛି ସେହି ସଂଗଠନ ଯାହା ଇଣ୍ଡି ମେଣ୍ଟକୁ ଏକାଠି କରିଥାଏ । ମେଣ୍ଟ ଗଠନ ପଛରେ ନୀତୀଶ କୁମାର ଚେହେରା ଏବଂ ଏହି ପଦ ଆବାହକ ପଦଠାରୁ ବହୁତ ବଡ଼ । ଏହା ପୂର୍ବରୁ ଜେଡିୟୁ ନେତାମାନେ ବିହାର ମୁଖ୍ୟମନ୍ତ୍ରୀଙ୍କୁ ଇଣ୍ଡି ମେଣ୍ଟର ଆଦର୍ଶଗତ ସଂଯୋଜକ ଏବଂ ଆଦର୍ଶଗତ ପ୍ରଧାନମନ୍ତ୍ରୀ ବୋଲି ବର୍ଣ୍ଣନା କରିଥିଲେ । ଜେଡିୟୁ କହିଛି ଯେ ୨୦୨୪ ନିର୍ବାଚନ ପାଇଁ ବିଜେପି ଯେଉଁ ବେଗରେ ଆଗକୁ ବଢୁଛି ତାହାକୁ ନେଇ ସେମାନେ ଚିନ୍ତିତ ଅଛନ୍ତି । ତେବେ ଇଣ୍ଡି ମେଣ୍ଟରେ ନା ସାଂଗଠନିକ ସମସ୍ୟାର ସମାଧାନ ହୋଇଛି ନା ଆସନ ବଣ୍ଟନ ଚୂଡ଼ାନ୍ତ ହୋଇଛି ।
ଇଣ୍ଡି ମେଣ୍ଟର ଅନ୍ୟ ଏକ ସହଯୋଗୀ ଆରଜେଡି ମଧ୍ୟ ଜେଡିୟୁର ଚିନ୍ତାକୁ ସମର୍ଥନ କରିଛି । ଦଳୀୟ ନେତା ତଥା ସାଂସଦ ମନୋଜ ଝା କହନ୍ତି, ଜେଡିୟୁର ଚିନ୍ତା ମଧ୍ୟ ଆମର ଚିନ୍ତା ଏବଂ ଇଣ୍ଡି ମେଣ୍ଟର ପ୍ରତ୍ୟେକ ସଦସ୍ୟଙ୍କ ଚିନ୍ତା ।