ଭୁବନେଶ୍ବର: ସ୍ୱାସ୍ଥ୍ୟସେବା ମାନଦଣ୍ଡ ଉଲ୍ଲଂଘନ କରିଥିବାରୁ ମହାରାଷ୍ଟ୍ର ୨୫୮ ଟି ଘରୋଇ ହସ୍ପିଟାଲର ଲାଇସେନ୍ସ ବାତିଲ କରିଛନ୍ତି ରାଜ୍ୟ ସରକାର। ସେହିପରି ‘୫,୧୩୪ ଟି ହସ୍ପିଟାଲକୁ ନୋଟିସ ପଠାଯାଇଛି। ତ୍ରୁଟିପୂର୍ଣ୍ଣ ସ୍ୱାସ୍ଥ୍ୟସେବା ପ୍ରଦାନକାରୀଙ୍କ ଉପରେ ଏକ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରି, ମହାରାଷ୍ଟ୍ର ସରକାର ବମ୍ବେ ନର୍ସିଂ ହୋମ୍ ପଞ୍ଜିକରଣ ଆଇନ, ୧୯୪୯ ଅନୁଯାୟୀ ନିର୍ଦ୍ଧାରିତ ମାନଦଣ୍ଡ ଉଲ୍ଲଂଘନ କରିଥିବାରୁ ୨୫୮ ଟି ଘରୋଇ ହସ୍ପିଟାଲର ପଞ୍ଜିକରଣ ବାତିଲ କରିଛନ୍ତି। ରାଜ୍ୟ ସ୍ୱାସ୍ଥ୍ୟମନ୍ତ୍ରୀ ପ୍ରକାଶ ଆବିତକର ରାଜ୍ୟ ବିଧାନସଭାରେ ପ୍ରଶ୍ନକାଳ ସମୟରେ ଏହି ଘୋଷଣା କରିଛନ୍ତି।
ସେ କହିିଛନ୍ତି ଯେ, ରାଜ୍ୟ ସ୍ୱାସ୍ଥ୍ୟ ବିଭାଗ ଦ୍ୱାରା ଚଳିତ ବର୍ଷ ଆରମ୍ଭରେ କରାଯାଇଥିବା ଦୁଇଟି ବ୍ୟାପକ ଯାଞ୍ଚ ସମୟରେ ଏହି ଉଲ୍ଲଂଘନ ସାମ୍ନାକୁ ଆସିଥିଲା। ରାଜ୍ୟ ସାରା ଯାଞ୍ଚ କରାଯାଇଥିବା ୨୩,୩୫୪ ଟି ଘରୋଇ ହସ୍ପିଟାଲ ମଧ୍ୟରୁ ୫,୧୩୪ ଟି ଆଇନର ବିଭିନ୍ନ ବ୍ୟବସ୍ଥାର ଉଲ୍ଲଂଘନ କରିଥିବା ଜଣାପଡିଛି। ଯାହା ଭିତ୍ତିଭୂମି ମାନଦଣ୍ଡ, ଉପଯୁକ୍ତ କର୍ମଚାରୀ ନିଯୁକ୍ତି, ପରିଷ୍କାର ପରିଚ୍ଛନ୍ନତା, ଅଗ୍ନି ନିରାପତ୍ତା, ଜୈବ ଚିକିତ୍ସା ବର୍ଜ୍ୟବସ୍ତୁ ନିଷ୍କାସନ, ସ୍ୱଚ୍ଛ ବିଲିଂ ଏବଂ ଅଭିଯୋଗ ସମାଧାନ ବ୍ୟବସ୍ଥାକୁ ବାଧ୍ୟତାମୂଳକ କରିବା ଅଭାବ ରହିଥିଲା।
ସମସ୍ତ ୫,୧୩୪ ଟି ହସ୍ପିଟାଲକୁ ଆଇନ ପାଳନ କରିବାକୁ ନିର୍ଦ୍ଦେଶ ଦେଇ ନୋଟିସ୍ ଦିଆଯାଇଛି ବୋଲି ସେ କହିଥିଲେ। ତଥାପି, ପରବର୍ତ୍ତୀ ପୁନଃନିରୀକ୍ଷଣ ସମୟରେ, ଏଥିମଧ୍ୟରୁ ୨୫୮ ଟି ନିୟମ ଉଲ୍ଲଂଘନ ହୋଇଥିବା ଜଣାପଡ଼ିଥିଲା। ଫଳସ୍ୱରୂପ, ରାଜ୍ୟ ସେମାନଙ୍କର ପଞ୍ଜିକରଣ ବାତିଲ କରିବାକୁ ପଦକ୍ଷେପ ନେଇଛି। ଅବିତକର ଏହା ମଧ୍ୟ କହିଛନ୍ତି ଯେ, ଯାହା ଘରୋଇ ସ୍ୱାସ୍ଥ୍ୟସେବା କ୍ଷେତ୍ରରେ ଅବହେଳା ବିରୁଦ୍ଧରେ ଏହା ଏକ କଠୋର ପଦକ୍ଷେପ।
ସ୍ୱାସ୍ଥ୍ୟମନ୍ତ୍ରୀ ସ୍ପଷ୍ଟ କରିଛନ୍ତି ଯେ ଏହା ପ୍ରଥମ ଥର ପାଇଁ ଏପରି ଏକ ବ୍ୟାପକ ଅଭିଯାନ କରାଯାଇଥିଲା ଏବଂ ସରକାର ଏହାକୁ ପ୍ରତି ବର୍ଷ ଯାଞ୍ଚ କରିବାକୁ ଚାହୁଁଛନ୍ତି। ଏହା ସମଗ୍ର ମହାରାଷ୍ଟ୍ରରେ ପ୍ରଥମ ଥର ପାଇଁ ଏପରି ଅଭିଯାନ କରାଯାଇଛି। ଆଗକୁ ଏହା ଉପରେ ଦୃଢ ପଦକ୍ଷେପ ଗ୍ରହଣ କରାଯିବା ବୋଲି ସେ ସୂଚନା ଦେଇଛନ୍ତି। ଡାକ୍ତରଖାନାଗୁଡ଼ିକ ଆଇନଗତ ଏବଂ ନୈତିକ ସୀମା ମଧ୍ୟରେ କାର୍ଯ୍ୟ କରିବା ନିଶ୍ଚିତ କରିବା ପାଇଁ ପ୍ରତିବର୍ଷ ଏହାକୁ କାର୍ଯ୍ୟକାରୀ କରାଯିବ ବୋଲି ସେ କହିଛନ୍ତି।