ଭୁବନେଶ୍ବର: ସାଧାରଣ ନିର୍ବାଚନ ସରିବାର ଦେଢ ବର୍ଷ ହୋଇଗଲାଣି। ହେଲେ ଏତେ ଦିନ ପରେ ମାହାଙ୍ଗାରେ ବିଜେଡି କାହିଁକି ହାରିଲା ବୋଲି କାରଣ କହିଛନ୍ତି ବିଜେଡିର ବରିଷ୍ଠ ନେତା ପ୍ରତାପ ଜେନା। ଗତ ନିର୍ବାଚନରେ ମାହାଙ୍ଗାରେ ବିଜେଡି ତରଫରୁ ପ୍ରତାପଙ୍କ ପୁଅ ଅଙ୍କିତ ଜେନା ପ୍ରାର୍ଥୀ ହୋଇଥିଲେ। ତାଙ୍କ ପାଇଁ ପ୍ରତାପ ଜେନା ବହୁ ପରିଶ୍ରମ ମଧ୍ୟ କରିଥିଲେ। ହେଲେ ସେ ସ୍ବାଧୀନ ପ୍ରାର୍ଥୀ ସାରଦା ପ୍ରଧାନଙ୍କଠାରୁ ସାତ ହଜାର ଭୋଟରେ ହାରି ଯାଇଥିଲେ।
ତେବେ ଏହାକୁ ନେଇ ସେତେବେଳେ ପ୍ରତାପ ଜେନା କିଛି କହି ନ ଥିଲେ। ହେଲେ ଏବେ ଏକ ବନ୍ଧୁ ମିଳନରେ ସେ ହାରିବାର କାରଣ କହିଦେଲେ। ସେ କହିଲେ ଯେ ମାହାଙ୍ଗାରେ ମୋ ପୁଅ ହାରିବାର କାରଣ ହେଲା ମୁଁ କେତେକଙ୍କ ଉପରେ ପୁରା ବିଶ୍ବାସ କରିଦେଲି। ହେଲେ ପରେ ସେମାନେ ଅନ୍ୟଠାରୁ ପଇସା ପକାଇ ମୋ ବିରୋଧରେ ଷଢଯନ୍ତ୍ର କରି ହରାଇ ଦେଲେ। ମୁଁ କ୍ଷମତାରେ ଥିବା ବେଳେ ସେମାନଙ୍କୁ ଅଖଣ୍ଡ କ୍ଷମତା ଦେଲି। ଆଜି ସେମାନଙ୍କ ଷଢଯନ୍ତ୍ରର ଶିକାର ହେଲି ବୋଲି ପ୍ରତାପ ଜେନା କହିଛନ୍ତି। ତେବେ ସେହି ଷଢଯନ୍ତ୍ରକାରୀ କିଏ ସେ ନେଇ ମାହାଙ୍ଗା ରାଜନୀତିରେ ଚର୍ଚ୍ଚା ଚାଲିଛି।
