ଭୁବନେଶ୍ବର: ନୂଆପଡା ଉପନିର୍ବାଚନ ପରେ ରାଜ୍ୟ କଂଗ୍ରେସ ଏକ ବଡ ନିଷ୍ପତି ଗ୍ରହଣ କରିଛି। ସେହି ଅନୁସାରେ ଆଜି କଂଗ୍ରେସ ନେତା ପଦ୍ମାକର ଗୁରୁଙ୍କୁ ଦଳ ବହିସ୍କାର କରିଛି। ତାଙ୍କୁ ଛଅ ବର୍ଷ ପାଇଁ ଦଳରୁ ବହିସ୍କାର କରାଯାଇଛି। ଏ ନେଇ ଦଳତରଫରୁ ଏକ ବିଜ୍ଞପ୍ତି ପ୍ରକାଶ କରି ସୂଚନା ଦିଆଯାଇଛି। ଜାତୀୟ କଂଗ୍ରେସର ସଚିବ ସଦସ୍ୟ ତାରିକ ଅନୱାରଙ୍କ ଦସ୍ତଖତରେ ଏହି ବିଜ୍ଞପ୍ତି ପ୍ରକାଶ ପାଇଛି।
ପଦ୍ମାକର ରାଜ୍ୟ କଂଗ୍ରେସର ମୁଖପାତ୍ର ଭାବେ କାର୍ଯ୍ୟ କରୁଥିଲେ। ସେ ନୂଆପଡା ଉପନିର୍ବାଚନ ପରେ ମୁଖପାତ୍ରରୁ ଇସ୍ତଫା ଦେଇଥିଲେ। ନୂଆପଡାରେ କଂଗ୍ରେସ ହାରିବା ନେଇ ସେ ସିଧା ସଭାପତି ଭକ୍ତ ଦାସଙ୍କୁ ଦୋଷାରୋପ କରିଥିଲେ। କଂଗ୍ରେସ ହାରିଥିବାରୁ ସଭାପତି ନୈତିକତା ଦୃଷ୍ଟିରୁ ଇସ୍ତଫା ଦେବା ଉଚିତ ବୋଲି ସେ କହିଥିଲେ। ଏହାକୁ ନେଇ କଂଗ୍ରେସ ଭିତର ଝଡ ସୃଷ୍ଟି ହୋଇଥିଲା। ଯାହାର ଫଳ ସ୍ବରୂପ ପଦ୍ମାକରଙ୍କୁ ଆଜି ଦଳରୁ ବହିସ୍କାର କରାଯାଇଛି।
