ବ୍ରହ୍ମପୁର: ମହାରାଜା କୃଷ୍ଣଚନ୍ଦ୍ର ଗଜପତି (ଏମ୍କେସିଜି) ମେଡିକାଲ କଲେଜ ଏବଂ ହସ୍ପିଟାଲର ଜଣେ ପ୍ରଥମ ବର୍ଷ ଡାକ୍ତରୀ ଛାତ୍ର ଦୁଇ ଦିନ ହେଲା ନିଖୋଜ ଥିବା ନେଇ ବୈଦ୍ୟନାଥପୁର ଥାନାରେ ଅଭିଯୋଗ ହୋଇଛି। ନିଖୋଜ ଛାତ୍ରଜଣକ ଯାଜପୁର ଜିଲ୍ଲାର ୨୦ ବର୍ଷୀୟ ସାଗର ସାହୁ ବୋଲି ଚିହ୍ନଟ କରାଯାଇଛି।
ମିଳିଥିବା ସୂଚନା ଅନୁସାରେ, ସାଗର ଗତ ଅଗଷ୍ଟ ୩୧ ତାରିଖରୁ ନିଖୋଜ ଅଛନ୍ତି। ତାଙ୍କୁ ଶେଷଥର ପାଇଁ ବ୍ରହ୍ମପୁର ରେଳ ଷ୍ଟେସନ ନିକଟରେ ଦେଖାଯାଇଥିଲା। ପୁଲିସ ତଦନ୍ତ ବେଳେ ରେଳ ଷ୍ଟେସନ ନିକଟସ୍ଥ ରେଳଲାଇନରୁ ତାଙ୍କର ମୋବାଇଲ ଫୋନଟିକୁ ଜବତ କରିଛି। ଛାତ୍ରଜଣକ ନିଖୋଜ ହେବା ପରେ ଏମ୍କେସିଜି ଛାତ୍ର ସଂଗଠନ ପକ୍ଷରୁ ଏକ ନୋଟିସ୍ ଜାରି କରାଯାଇଛି, ଯେଉଁଥିରେ ସାଗରଙ୍କ ସମ୍ପର୍କରେ କୌଣସି ସୂଚନା ମିଳିଲେ ତୁରନ୍ତ ଜଣାଇବାକୁ ଅନୁରୋଧ କରାଯାଇଛି।
ଏମ୍କେସିଜି ଡିନ୍ଙ୍କ ଅଭିଯୋଗ ଆଧାରରେ ବୈଦ୍ୟନାଥପୁର ଥାନାରେ ଏତଲା ରୁଜୁ ହୋଇଛି। ବ୍ରହ୍ମପୁର ଏସ୍ପି ଶ୍ରବଣ ବିବେକ ଏମ୍. କହିଛନ୍ତି ଯେ, ଘଟଣାର ଗାମ୍ଭୀର୍ଯ୍ୟକୁ ଦୃଷ୍ଟିରେ ରଖି ପୁଲିସର ଏକ ସ୍ୱତନ୍ତ୍ର ଟିମ୍ ଗଠନ କରାଯାଇ ଖୋଜାଖୋଜି ପ୍ରକ୍ରିୟା ଜାରି ରହିଛି। ସନ୍ଦିଗ୍ଧ ସ୍ଥାନଗୁଡ଼ିକର ସିସିଟିଭି ଫୁଟେଜ୍ ଯାଞ୍ଚ କରାଯିବା ସହ ଜବତ ମୋବାଇଲ୍କୁ ଫୋରେନ୍ସିକ୍ ତଦନ୍ତ ପାଇଁ ପଠାଯାଇଛି। ସାଗର କେଉଁ ପରିସ୍ଥିତିରେ ଏବଂ କୁଆଡ଼େ ଗଲେ ସେ ନେଇ ତାଙ୍କ ସାଙ୍ଗସାଥୀ ଓ ସହପାଠୀମାନଙ୍କୁ ପଚରାଉଚୁରା କରାଯାଉଛି। ତଦନ୍ତ ଶେଷ ହେବା ପରେ ବିସ୍ତୃତ ତଥ୍ୟ ସାମ୍ନାକୁ ଆସିବ ବୋଲି ପୁଲିସ ପକ୍ଷରୁ କୁହାଯାଇଛି।