ନୂଆଦିଲ୍ଲୀ: ବ୍ରିକ୍ସ ଶିଖର ସମ୍ମିଳନୀରେ ଯୋଗଦେବା ପାଇଁ ଦୀର୍ଘ ୭ ବର୍ଷ ପରେ ଭାରତ ଗସ୍ତରେ ଆସିଥିବା ଚୀନ୍ ରାଷ୍ଟ୍ରପତି ସି ଜିନ୍ପିଙ୍ଗଙ୍କ ସହ ଆସିଥିବା କାଇ କି’ ନାମକ ଜଣେ ବ୍ୟକ୍ତିଙ୍କୁ ନେଇ ଏବେ ସବୁଠି ପ୍ରବଳ ଚର୍ଚ୍ଚା ଆରମ୍ଭ ହୋଇଛି। କାଇ କି’ ହେଉଛନ୍ତି ଜିନ୍ପିଙ୍ଗଙ୍କ ଅତ୍ୟନ୍ତ ଘନିଷ୍ଠ ସହଯୋଗୀ, ଛାୟା ଏବଂ ବିଶ୍ୱସ୍ତ ପରାମର୍ଶଦାତା। ତାଙ୍କ ପରାମର୍ଶ ବିନା ଜିନ୍ପିଙ୍ଗ କୌଣସି ବି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଅନ୍ତି ନାହିଁ। ଏପରିକି ସମସ୍ତ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଆଲୋଚନା ସମୟରେ ମଧ୍ୟ ସେ ଜିନ୍ପିଙ୍ଗଙ୍କ ନିକଟରେ ବସିଥାନ୍ତି କିମ୍ବା ବୈଠକରେ ସାମିଲ ହୋଇଥାନ୍ତି। ବର୍ତ୍ତମାନ ସମୟରେ ସେ ଚୀନ୍ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ପାଲଟିଛନ୍ତି ଏବଂ ତାଙ୍କୁ ଚୀନ୍ର ଦ୍ୱିତୀୟ ସର୍ବାଧିକ ଶକ୍ତିଶାଳୀ ନେତା ଭାବେ ଚିହ୍ନଟ କରାଯାଉଛି। ଜିନ୍ପିଙ୍ଗଙ୍କ ଛାୟା ଭଳି ରହୁଥିବା ଏହି ନେତାଙ୍କ ଭାରତ ଆଗମନ ପଛରେ ଏକ ବଡ଼ କୂଟନୈତିକ ସଙ୍କେତ ରହିଥିବା ବିଶ୍ଳେଷକମାନେ ମତପ୍ରକାଶ କରିଛନ୍ତି।
ସୂଚନାଯୋଗ୍ୟ ଯେ, କାଇ କି’ କେବଳ ଜଣେ ନେତା ନୁହନ୍ତି, ସେ ଚୀନ୍ର କ୍ଷମତାସୀନ କମ୍ୟୁନିଷ୍ଟ ପାର୍ଟିର ପୋଲିଟବ୍ୟୁରୋ ଷ୍ଟାଣ୍ଡିଂ କମିଟିର ଜଣେ ପ୍ରମୁଖ ସଦସ୍ୟ। ସେ ଦେଶର ଶୀର୍ଷ ୭ ଜଣ ଶକ୍ତିଶାଳୀ ନେତାଙ୍କ ମଧ୍ୟରେ ସ୍ଥାନ ପାଇଛନ୍ତି। ଏହା ସହିତ ପାର୍ଟିର ଜେନେରାଲ ଅଫିସର ମୁଖ୍ୟ ଭାବେ ସେ ଜିନ୍ପିଙ୍ଗଙ୍କ କାର୍ଯ୍ୟନିର୍ବାହୀ ମୁଖ୍ୟ (ଡି-ଫ୍ୟାକ୍ଟୋ ଚିଫ୍ ଅଫ୍ ଷ୍ଟାଫ୍) ଭାବେ ମଧ୍ୟ କାର୍ଯ୍ୟ କରୁଛନ୍ତି।
କାଇ କି’ ଏବଂ ସି ଜିନ୍ପିଙ୍ଗ ଉଭୟ ସାଂସ୍କୃତିକ ବିପ୍ଳବ ସମୟରେ ଶ୍ରମିକ, କୃଷକ ଓ ସୈନିକ ଛାତ୍ର ଭାବେ ନିଜର ଜୀବନ ଆରମ୍ଭ କରିଥିଲେ। ପରବର୍ତ୍ତୀ ସମୟରେ ଫୁଜିଆନ୍ ଏବଂ ଝେଜିଆଙ୍ଗ ପ୍ରଦେଶରେ ଦୀର୍ଘ ସମୟ ଏକାଠି କାମ କରିବା ଅବସରରେ ଉଭୟ ନେତାଙ୍କ ମଧ୍ୟରେ ନିବିଡ଼ ବିଶ୍ୱାସର ସମ୍ପର୍କ ଗଢ଼ିଉଠିଥିଲା। ଆଜି ସେହି ସମ୍ପର୍କ ଚୀନ୍ର ସର୍ବୋଚ୍ଚ ଶକ୍ତିକେନ୍ଦ୍ର ପର୍ଯ୍ୟନ୍ତ ପହଞ୍ଚିଛି। ଆଜିର ଦିନରେ କାଇ କି’ ଚୀନ୍ର ନୀତି ନିର୍ଦ୍ଧାରଣ, ସାଇବର ସୁରକ୍ଷା ଏବଂ ଜାତୀୟ ସୁରକ୍ଷା ସମ୍ପର୍କିତ ଗୁରୁତ୍ୱପୂର୍ଣ୍ଣ ମାମଲାରେ ସବୁଠାରୁ ପ୍ରଭାବଶାଳୀ ଭୂମିକା ଗ୍ରହଣ କରୁଛନ୍ତି। ବିଶ୍ଳେଷକଙ୍କ ମତରେ, ରାଷ୍ଟ୍ରପତି ଜିନ୍ପିଙ୍ଗଙ୍କ ପକ୍ଷରୁ କଥା କହିବାର ଅଧିକାର ହେଉଛି କାଇ କି’ଙ୍କ ସବୁଠାରୁ ବଡ଼ ଶକ୍ତି।