ସମୀକ୍ଷା ବ୍ୟୁରୋ
ସୃଜନ ଅନୁଷ୍ଠାନ ଦ୍ୱାରା ଆୟୋଜିତ ଓ.ଏମ୍.ସି. ଗୁରୁ କେଳୁଚରଣ ମହାପାତ୍ର ପୁରସ୍କାର ଉତ୍ସବର ପଞ୍ଚମ ସଂଧ୍ୟାର ପ୍ରଥମ କାର୍ଯ୍ୟକ୍ରମ ଆରମ୍ଭ ହୋଇଥିଲା ପ୍ରଖ୍ୟାତ ସରୋଦ ବାଦିକା ଶ୍ରୀମତୀ ଦେବଶ୍ମିତା ଭଟ୍ଟାଚାର୍ଯ୍ୟଙ୍କ ସରୋଦ ବାଦନରୁ। ସେ ପ୍ରଥମେ ଶରତ ଋତୁ ଉପରେ ଆଧାରିତ ରାଗ ଦୁର୍ଗା ପରେ ପରେ ଆଳାପ ଯାହା ବିଲମ୍ବିତ ତିନ୍ ତାଳରେ ୧୬ ମାତ୍ରା ଓ ଏକତାଳ ଏବଂ ଶେଷରେ ଆସୁଥିବା ଦୁର୍ଗାପୂଜା ଉପଲକ୍ଷେ ଗୋଟିଏ ସୁନ୍ଦର ବନ୍ଦିସ ଜୟ ଦୁର୍ଗା ମା ପରିବେଷଣ କରି ଦର୍ଶକମାନଙ୍କୁ ସେ ବିମୋହିତ କରିଥିଲେ। ତାଙ୍କୁ ତବଲାରେ ସହଯୋଗ କରିଥିଲେ ସନ୍ଦିପ ଘୋଷ। ନିଜସ୍ୱ ଶୈଳୀରେ ସର୍ଜନାତ୍ମକ ସରୋଦ ବାଦନ ତାଙ୍କୁ ଦେଶ ତଥା ଦେଶ ବାହାର ସଙ୍ଗୀତ ଦୁନିଆରେ ନୂଆ ଦିଗନ୍ତ ପ୍ରଦାନ କରିଛି
ଏହି ସଂଧ୍ୟାର ପରବର୍ତ୍ତୀ ପ୍ରସ୍ତୁତିଟି ଥିଲା ଗୁରୁ ନିରଞ୍ଜନ ରାଉତଙ୍କ ନୂପୂର ଅନୁଷ୍ଠାନର କଳାକାରମାନଙ୍କ ଦ୍ୱାରା ଦଳଗତ ଓଡ଼ିଶୀ ନୃତ୍ୟ ପରିବେଷଣ। ସେମାନଙ୍କର ପ୍ରଥମ ପ୍ରସ୍ତୁତିରେ ଥିଲା ଶୁଦ୍ଧ ନୃତ୍ୟରେ ଖମାଜ ପଲ୍ଲବୀ ଯାହା ରାଗ ଖମାଜ ଓ ତାଳ ତ୍ରୀପଟା ଉପରେ ପର୍ଯ୍ୟବେସିତ ଥିଲା ପରେ ପରେ ଭଗବାନ ଶିବଙ୍କ ତାଣ୍ଡବ ନୃତ୍ୟ ଉପରେ ଆଧାରିତ ଅଭିନୟ ଶିବସ୍ତୋତ୍ରମ ଯାହାର ନୃତ୍ୟ ସଂରଚନା କରିଥିଲେ ଗୁରୁ ନିରଞ୍ଜନ ରାଉତ, ସଙ୍ଗୀତ ସଂଯୋଜନା କରିଥିଲେ କେ. ରାମାରାଓ ପାତ୍ର ଓ ତାଳ ସଂଯୋଜନା କରିଥିଲେ ଗୁରୁ ଧନେଶ୍ୱର ସ୍ୱାଇଁ। ନୂପୂର ଅନୁଷ୍ଠାନର ଶିଳ୍ପୀମାନଙ୍କ ଦ୍ୱାରା ଏକ ହୃଦୟସ୍ପର୍ଶୀ ଓ କର୍ମଠ ଦଳଗତ ଓଡ଼ିଶୀ ନୃତ୍ୟ ଦେଖିବାକୁ ମିଳିଥିଲା ମଞ୍ଚ ଉପରେ ।
ପଞ୍ଚମ ସଂଧ୍ୟାର ଶେଷ ପରିବେଷଣଟି ଥିଲା ଡ଼ଃ ଇଲିଆନା ସିତାରିଷ୍ଟଙ୍କ ଆର୍ଟ ଭିଜନ ଅନୁଷ୍ଠାନର ଶିଳ୍ପୀମାନଙ୍କ ଦ୍ୱାରା ଓଡ଼ିଶୀ ନୃତ୍ୟ। ସେମାନଙ୍କର ପ୍ରସ୍ତୁତିରେ ଥିଲା ଓଡ଼ିଆ ବର୍ଣ୍ଣମାଳା ଉପରେ ନିବଦ୍ଧ ଓଡ଼ିଶୀ ନତ୍ୟାଭିନୟ ଅକ୍ଷର ଯାହା ଏକ ସମୃଦ୍ଧ ଓ ପ୍ରାଚୀନ ଓଡ଼ିଆ ଭାଷା ପ୍ରତି ଶ୍ରଦ୍ଧାଞ୍ଜଳୀ ସ୍ୱରୂପ। ଓଡ଼ିଶାର ଗାଁମାନଙ୍କରେ ଖଡ଼ି ସାହାଯ୍ୟରେ ତିନିଗୋଟି ବୃତ୍ତ ଚିହ୍ନିତ ଅକାର (ଶୁନ)ରୁ ଭାଷାର ସୃଷ୍ଟି ହୋଇଥାଏ । ଯାହାର ସଂଳାପ ପ୍ରସ୍ତୁତ କରିଥିଲେ ଦେବଦାସ ଛୋଟରାୟ, ସଙ୍ଗୀତ ସଂଯୋଜନା କରିଥିଲେ ଲକ୍ଷ୍ମୀକାନ୍ତ ପାଳିତ, ନୃତ୍ୟ ସଂରଚନା କରିଥିଲେ ଗୁରୁ ଇଲିଆନା ସିତାରିଷ୍ଟ ଏବଂ ଯାହାକୁ ବାଲୁକା କଳାରେ ଏନିମେସନ ମାଧ୍ୟମରେ ଦର୍ଶକଙ୍କ ସାମ୍ନାରେ ଉପସ୍ଥାପିତ କରିଥିଲେ ଆନ୍ତର୍ଜାତିୟ କ୍ଷାତିସମ୍ପର୍ଣ୍ଣ ବାଲୁକା କଳା ଶିଳ୍ପୀ ଶ୍ରୀ ସୁଦର୍ଶନ ପଟ୍ଟନାୟକ। ଓଡ଼ିଶୀ ନୃତ୍ୟର ଏକ ଅଭିନବ ପ୍ରୟାସ ସାଙ୍ଗକୁ ଆର୍ଟ ଭିଜନ ଅନୁଷ୍ଠାନର ଶିଳ୍ପୀମାନଙ୍କର ପାଦର ଛନ୍ଦ ଓ ତାଳରେ ଦର୍ଶକ ବିମୋହିତ ହୋଇଥିଲେ।
ଏହି ଉତ୍ସବର ଅତିଥି ଥିଲେ ଓଡ଼ିଶୀ ସଙ୍ଗୀତ କଣ୍ଠଶିଳ୍ପୀ ତଥା ଓଡ଼ିଶୀ ସଙ୍ଗୀତ ବିଶାରଦ ଗୁରୁ ରାମହରି ଦାସ, ପ୍ରସିଦ୍ଧ ସରୋଦ ବାଦିକା ଶ୍ରୀମତୀ ଦେବଶ୍ମିତା ଭଟ୍ଟାଚାର୍ଯ୍ୟ ଏବଂ ସୃଜନର ନିର୍ଦ୍ଦେଶକ ଗୁରୁ ଶ୍ରୀ ରତିକାନ୍ତ ମହାପାତ୍ର। କାର୍ଯ୍ୟକ୍ରମଟିକୁ ପରିଚାଳନା କରିଥିଲେ ଡ଼ଃ ଶ୍ରୀନୀବାସ ଘଟୁଆରୀ ଏବଂ ଆଲୋକ ସଂଚାଳନ କରିଥିଲେ ଶ୍ରୀ ଦେବୀପ୍ରସାଦ ମିଶ୍ର।
