ସମୀକ୍ଷା ବ୍ୟୁରୋ
ରାଜ୍ୟ ରାଜନୀତିକୁ ଯଦି ନିରିଖେଇ ଦେଖାଯାଏ ତେବେ ସ୍ପଷ୍ଟ ହେବ ଯେ, ରାଜ୍ୟର ପ୍ରମୁଖ ତିନୋଟି ଦଳର ଅନେକ ନେତା ଅଛନ୍ତି ଯେଉଁମାନେ ଭବିଷ୍ୟତରେ ମୁଖ୍ୟମନ୍ତ୍ରୀ ହେବାକୁ ମନେ ମନେ ସ୍ୱପ୍ନ ଦେଖୁଛନ୍ତି ଓ ପାଗ ଭିଡି ବସିଛନ୍ତି । ସ୍ୱପ୍ନ ଦେଖିବାରେ କାହାର ଆପତ୍ତି ନାହିଁ । ହେଲେ ସ୍ୱପ୍ନକୁ ସାକାର କରିବା ପାଇଁ କିଛି ନେତା ଯେପରି କୌଶଳ ଅବଲମ୍ବନ କରୁଛନ୍ତି ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ସାଧାରଣତଃ ଯିଏ ଚାହିଁବ ସେ ନେତା ହୋଇଯିବ ବା ମୁଖ୍ୟମନ୍ତ୍ରୀ ହୋଇଯିବ ତାହା ନୁହେଁ। ଏପରିକି କଳବଳ କୌଶଳଠାରୁ ଆରମ୍ଭ କରି କୋଟି କୋଟି ଟଙ୍କା ଖର୍ଚ୍ଚ କଲେ ମଧ୍ୟ ଜଣେ ବିଧାୟକ କିମ୍ବା ସାଂସଦ ହେବା ସମ୍ଭବ ହୋଇପାରିବ ନାହିଁ। ତାହା ଯଦି ହୋଇଥାନ୍ତା ତାହାହେଲେ ଦେଶର ଧନୀ ସେଠ ଆଜି ସାଂସଦ କିମ୍ବା ବିଧାୟକ ହୋଇଯାଇଥାନ୍ତେ। ହେଲେ ବର୍ତ୍ତମାନ ଯେଉଁମାନେ ନେତା ହୋଇ ସାଂସଦ କିମ୍ବା ବିଧାୟକ ହୋଇଛନ୍ତି, ସେମାନଙ୍କ ମନରେ କେଉଁଠି ନା କେଉଁଠି ମୁଖ୍ୟମନ୍ତ୍ରୀ ହେବାର ଲୋଭଟା ବାହାରକୁ ବାହାରିଯାଉଛି। କେବଳ ସେତିକି ନୁହେଁ ମନେ ମନେ ନିଜକୁ ମୁଖ୍ୟମନ୍ତ୍ରୀ ଭାବି ସେମାନଙ୍କ ଆଚାର ବ୍ୟବହାରରେ ମୁଖ୍ୟମନ୍ତ୍ରୀ ହେବାର ମିଛ ଅହଂକାର ଦିଶି ଯାଉଛି।
ସତ ମୁଖ୍ୟମନ୍ତ୍ରୀଙ୍କ ପରି ମନେମନେ ମୁଖ୍ୟମନ୍ତ୍ରୀ ହୋଇ ଯାଇଥିବା ଏହି ଉଚ୍ଚାଭିଳାଷୀ ନେତାମାନେ ଲୋକଙ୍କଠାରୁ, ଏପରିକି ସାମ୍ବାଦିକଙ୍କଠାରୁ ମଧ୍ୟ କର ଛଡା ଦେଇ ରହୁଛନ୍ତି । ଚାଲିଚଳନରେ ବେଶ୍ ପରିବର୍ତ୍ତନ ଆସିଯାଉଛି। ଏପରି ମୁଖ୍ୟମନ୍ତ୍ରୀ ହେବାର ସ୍ୱପ୍ନ ଦେଖି ହାବଭାବରେ ପରିବର୍ତ୍ତନ କରୁଥିବା ଓଡିଶାରେ ପାଞ୍ଚ ଜଣ ନେତା ଅଛନ୍ତି ବୋଲି କୁହାଯାଇପାରେ। ସେହି “ମନେମନେ ମୁଖ୍ୟମନ୍ତ୍ରୀ” ନେତାଙ୍କ ବିଷୟରେ ଆସନ୍ତୁ ଜାଣି ନେବା।
1-ଧର୍ମେନ୍ଦ୍ର ପ୍ରଧାନ(ବିଜେପି)-ଦିନ ନାହିଁ ରାତି ନାହିଁ, ସବୁବେଳେ ମୁଖ୍ୟମନ୍ତ୍ରୀ ହେବାର ସ୍ୱପ୍ନ ଦେଖୁଛନ୍ତି ବିଜେପିର ମଙ୍ଗୁଆଳ କେନ୍ଦ୍ରମନ୍ତ୍ରୀ ଧମେନ୍ଦ୍ର ପ୍ରଧାନ। ମୁଖ୍ୟମନ୍ତ୍ରୀ ହେବାର ନିଶା ତାଙ୍କୁ ଏପରି ଘାରିଛି ଯେ, ସେ ଓଡିଶାର ଲୋକଙ୍କ ଆଚାର, ଚାଲିଚଳନ କଣ ତାହା ଭୁଲି ଯାଉଛନ୍ତି। ଧର୍ମେନ୍ଦ୍ର ମୁଖ୍ୟମନ୍ତ୍ରୀ ହେବାର ଗୋଟିଏ ମନ୍ତ୍ର ଶିଖିଛନ୍ତି ତାହା ହେଉଛି ବର୍ତ୍ତମାନର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଯେନତେନ ପ୍ରକାରେଣ ବଦନାମ କରିବା। ଧର୍ମେନ୍ଦ୍ରଙ୍କ ପରାମର୍ଶଦାତାମାନେ ତାଙ୍କୁ ବୁଝାଇ ଦେଇଛନ୍ତି ଯେ, ନବୀନଙ୍କ ଭଲ ଇମେଜକୁ ଯଦି କଳଙ୍କ ଲଗାଇ ଦିଆଯାଏ ତେବେ ସେ ହଟିଯିବେ। ଆଉ ସେ ନ ହଟିବା ପର୍ଯ୍ୟନ୍ତ ଓଡିଶାରେ ଆଉ କେହି ମୁଖ୍ୟମନ୍ତ୍ରୀ ହୋଇପାରିବେ ନାହିଁ। ଏହି ମନ୍ତ୍ରକୁ ସାକାର କରିବା ପାଇଁ ଧର୍ମେନ୍ଦ୍ର ତାଙ୍କର ବାହିନୀକୁ କାମରେ ଲଗାଇ ଦେଇଛନ୍ତି। ସେମାନେ ନବୀନ ପଟ୍ଟନାୟକଙ୍କୁ ବଦନାମ କରିବାକୁ ଦିନରାତି ଚେଷ୍ଟା ଚଳାଇଛନ୍ତି। ଦଳ ବାରମ୍ବାର ଛୋଟବଡ ନିର୍ବାଚନରେ ହାରୁଥିଲେ ମଧ୍ୟ ତାଙ୍କର ମୁଖ୍ୟମନ୍ତ୍ରୀ ହେବା ନିଶା ଏପରି ଧରିଛି ଯେ, ସେଥିରୁ ସେ ହଟି ନୂଆ କୌଶଳ ଅବଲମ୍ବନ କରିବାର ସତସାହସ ଜୁଟାଇ ପାରୁ ନାହାଁନ୍ତି। ନିର୍ବାଚନ ଯେତିକି ପାଖେଇ ଆସୁଛି ତାଙ୍କର ମୁଖ୍ୟମନ୍ତ୍ରୀ ହେବାର ନିଶା ସେତିକି ବଢୁଛି। ସେଥିପାଇଁ ମୁଖ୍ୟମନ୍ତ୍ରୀ ସ୍ୱପ୍ନ ଦେଖୁଥିବା ଓଡିଆ ନେତାଙ୍କ ତାଲିକାରେ ଧର୍ମେନ୍ଦ୍ର ପ୍ରଧାନ ପ୍ରଥମ ହେବେ।
2-ବୈଜୟନ୍ତ ପଣ୍ଡା (ନୋ ପାର୍ଟି) – ବର୍ତ୍ତମାନ ନୁହେଁ ଦୀର୍ଘ ବର୍ଷ ଧରି ମୁଖ୍ୟମନ୍ତ୍ରୀ ହେବାର ସ୍ୱପ୍ନରେ ଭାସୁଛନ୍ତି ବିଜେଡିରୁ ବହିସ୍କୃତ ନେତା ବୈଜୟନ୍ତ ପଣ୍ଡା ଓରଫ ଜୟ ପଣ୍ଡା। ସ୍ୱପ୍ନ ନୁହେଁ ଜୟ ମନେ ମନେ ମୁଖ୍ୟମନ୍ତ୍ରୀ ହୋଇସାରିଲେଣି ବୋଲି କହିଲେ ଅତ୍ୟୁକ୍ତି ହେବ ନାହିଁ। ତାଙ୍କର ମୁଖ୍ୟମନ୍ତ୍ରୀ ସ୍ୱପ୍ନ ଦେଖିବାର କାରଣ ହେଉଛି ତାଙ୍କ ପାଖରେ ରହିଛି ଟଙ୍କା, ମିଡିଆ ଆଉ ପଇସାଦିଆ ଲୋକଶକ୍ତି। ତାଙ୍କର ଚାଲିଚଳନ ଆଚାର ବ୍ୟବହାରକୁ ଅନୁଧ୍ୟାନ କଲେ ପ୍ରାୟତଃ ଅନୁଭବ କରିହେଉଛି ଯେ, ଜୟ ପଣ୍ଡା ଜଣେ ମନେମନେ ମୁଖ୍ୟମନ୍ତ୍ରୀ। ସେ କେବେବି ଓଡିଆ ମିଡିଆକୁ ସାକ୍ଷାତକାର ଦେବେ ନାହିଁ । ସାକ୍ଷାତକାର ଦୂରେଥାଉ ଓଡିଶାର କୌଣସି ପ୍ରତିଷ୍ଠିତ ସାମ୍ବାଦିକ କିମ୍ବା ସଂପାଦକଙ୍କ ଫୋନ ମଧ୍ୟ ସେ ଉଠାନ୍ତି ନାହିଁ। ତାଙ୍କ ପ୍ରେସ୍ ବିଜ୍ଞପ୍ତି ତାଙ୍କର ପ୍ରାଇଭେଟ ସେକ୍ରେଟାରୀ ଦିଅନ୍ତି। ଯାହା ମୁଖ୍ୟମନ୍ତ୍ରୀଙ୍କ ଦପ୍ତର କରିଥାନ୍ତି। ବିଜେଡିରେ ଥିବା ବେଳେ ତାଙ୍କର ଏପରି ଆଚାର ବ୍ୟବହାର ତୀବ୍ରତର ଥିଲା। ଏପରିକି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜନୀତିରୁ ଅବସର ନେବା ପରେ ସେ ବିଜେଡିର ମଙ୍ଗ ଧରି ମୁଖ୍ୟମନ୍ତ୍ରୀ ହେବାର ଏକ ବଡ ଆଶା ରଖିଥିଲେ। ହେଲେ ଏ କଥା ମୁଖ୍ୟମନ୍ତ୍ରୀ ଜାଣିବା ପରେ ତାଙ୍କୁ ଦଳରୁ ବହିସ୍କାର କରିଥିବା ଚର୍ଚ୍ଚା ଚାଲିଛି। ତେଣୁ ଓଡିଶାର ରାଜନୀତିରେ ମୁଖ୍ୟମନ୍ତ୍ରୀ ହେବାର ସ୍ୱପ୍ନ ଦେଖୁଥିବା ବ୍ୟକ୍ତିଙ୍କ ମଧ୍ୟରୁ ଦ୍ୱିତୀୟରେ ରହିବେ ଜୟ ପଣ୍ଡା।
3-ଭର୍ତ୍ତୃହରି ମହତାବ(ବିଜେଡି) ଏହି ତାଲିକାରେ ତୃତୀୟରେ ଆସିବେ ବିଜେଡି ସାଂସଦ ଭର୍ତ୍ତୃହରି ମହତାବ। ଏହାର କାରଣ ହେଲା ସେ ହେଉଛନ୍ତି ପୂର୍ବତନ ମୁଖ୍ୟମନ୍ତ୍ରୀଙ୍କ ପୁଅ ଏବଂ ତାଙ୍କ ହାତରେ ମଧ୍ୟ ଏକ ଖବରକାଗଜ ରହିଛି। ତେବେ ସେ କଣ ପାଇଁ ମୁଖ୍ୟମନ୍ତ୍ରୀ ହେବାର ସ୍ୱପ୍ନ ଦେଖୁଛନ୍ତି ବୋଲି ଯଦି ପଚରାଯାଏ ତେବେ ଏହାର ଏକମାତ୍ର ଉତ୍ତର ହେଉଛି ତାଙ୍କର ଚାଲିଚଳନ। ସେ ଜଣେ ସାଂସଦ ମାତ୍ର ହେଲେ ତାଙ୍କର କଥା କହିବାର ଶୈଳୀ, ଲୋକଙ୍କଠାରୁ ଦୂରେଇ ରହି ନିଜକୁ ଏକ ବଡ଼ ଭାବିବାର କାଇଦା ହିଁ ସେ ମନେ ମନେ ନିଜକୁ ମୁଖ୍ୟମନ୍ତ୍ରୀ ଭାବୁଛନ୍ତି ବୋଲି କହିଲେ ଅତ୍ୟୁକ୍ତି ହେବ ନାହିଁ। ଜୟ ପଣ୍ଡାଙ୍କ ପରି ସେ ମଧ୍ୟ କୌଣସି ସାମ୍ବାଦିକଙ୍କ ଫୋନ ଉଠାନ୍ତି ନାହିଁ। କେବେ କୌଣସି ସମୟରେ ତାଙ୍କ ସହ କଥା ହେଲେ ସେ ଯେପରି ଉତ୍ତର ରଖନ୍ତି ତାହା ହିଁ ପ୍ରମାଣିତ କରିଦିଏ ଯେ, ସେ ମନେ ମନେ ମୁଖ୍ୟମନ୍ତ୍ରୀ।
4- ନିରଞ୍ଜନ ପଟ୍ଟନାୟକ(କଂଗ୍ରେସ) କେତେବେଳେ ମୁଖ୍ୟମନ୍ତ୍ରୀ ହେବା କେତେବେଳେ ନ ହେବାର ସ୍ୱପ୍ନ ଦେଖୁଥିବା ବ୍ୟକ୍ତିଟିଏ ହେଉଛନ୍ତି ନିରଞ୍ଜନ ପଟ୍ଟନାୟକ। ହେଲେ ଅନ୍ୟମାନଙ୍କ ପରି ନିରଞ୍ଜନ ସବୁବେଳେ ମୁଖ୍ୟମନ୍ତ୍ରୀ ହେବାର ସ୍ୱପ୍ନ ଦେଖିପାରନ୍ତି ନାହିଁ। କାରଣ ତାଙ୍କର ସ୍ଥିତି ମଜବୁତ ନ ଥିବାରୁ ତାଙ୍କୁ ଅଧା ସ୍ୱପ୍ନରେ ବିଭୋର ହେବାକୁ ପଡିଥାଏ। ସେ ଯେତେବେଳେ ମୁଖ୍ୟମନ୍ତ୍ରୀ ହେବାର ସ୍ୱପ୍ନରେ ମସଗୁଲ ରହନ୍ତି ସେତେବେଳେ ତାଙ୍କର ଚାଲିଚଳନ ପୁରା ମୁଖ୍ୟମନ୍ତ୍ରୀଆ ହୋଇଯାଏ। ମୁଖ୍ୟତଃ ତାଙ୍କ ପାଖରେ ପଇସା ଅଛି ଆଉ ପଦବୀ ବି ଅଛି, ହେଲେ ମୁଖ୍ୟମନ୍ତ୍ରୀ ହେବାର ପୁରା ସ୍ୱପ୍ନ ଦେଖିବାରେ ଭାଗ୍ୟ ତାଙ୍କର ସାଥ ଦେଉ ନାହିଁ।
5- ଶ୍ରୀକାନ୍ତ ଜେନା(ବହିସ୍କୃତ କଂଗ୍ରେସ)- ମୁଖ୍ୟମନ୍ତ୍ରୀ କାହିଁକି ପ୍ରଧାନମନ୍ତ୍ରୀ ହେବାର ସ୍ପପ୍ନ ଦେଖୁଥିବାର କେହି ଯଦି ଓଡିଶାରେ ଅଛନ୍ତି ତେବେ ସେ ହେଉଛନ୍ତି ଶ୍ରୀକାନ୍ତ ଜେନା। ସେ ମୁଖ୍ୟମନ୍ତ୍ରୀ ହେବା ପାଇଁ ଆପ୍ରାଣ ଉଦ୍ୟମ ଜାରି ରଖିଛନ୍ତି। ତାଙ୍କୁ ମୁଖ୍ୟମନ୍ତ୍ରୀ ନିଶା ଏତେ ଘାରିଛି ଯେ, ନିଜେ ମୁଖ୍ୟମନ୍ତ୍ରୀ ହୋଇ ପାରୁ ନ ଥିବାରୁ ବେଳେବେଳେ ଓଡିଶାର ପୂର୍ବତନ ମୁଖ୍ୟମନ୍ତ୍ରୀମାନଙ୍କୁ ରାଗରେ ଗାଳି କରିପକାନ୍ତି। ବର୍ତ୍ତମାନ ଅନ୍ୟାନ୍ୟ ରାଜ୍ୟରେ କଂଗ୍ରେସ ପୁଣି ଥରେ ଲେଉଟିଥିବାରୁ ଶ୍ରୀକାନ୍ତଙ୍କୁ ଓଡିଶାର ମୁଖ୍ୟମନ୍ତ୍ରୀ ହେବାର ନିଶା ବଢିଯାଇଥିଲା। ଏପରିକି ନିଜ ନାଁ ନ କହି ଜଣେ ଓବିସି ଜାତିର ଲୋକ ମୁଖ୍ୟମନ୍ତ୍ରୀ ହେବା ଉଚିତ ବୋଲି ଶ୍ରୀକାନ୍ତ ମତ ଦେଇଥିଲେ।
ତେବେ ଏମାନଙ୍କୁ ଛାଡିଦେଲେ ମନେମନେ ମୁଖ୍ୟମନ୍ତ୍ରୀ ଭାବେ ଆଉ କେତେକ ନେତାଙ୍କ ନାମ ମଧ୍ୟ ଚର୍ଚ୍ଚାକୁ ଆସୁଛି। ସେମାନେ ହେଲେ ବିଜେଡି ସାଂସଦ ସୌମ୍ୟରଂଜନ ପଟ୍ଟନାୟକ, ବିଜେଡି ସାଂସଦ ଅଚ୍ୟୁତ ସାମନ୍ତ ମଧ୍ୟ ଅଛନ୍ତି।