ସମୀକ୍ଷା ବ୍ୟୁରୋ
କଂଗ୍ରେସର ମନ୍ତ୍ରଣା ଚାଲିଛି ଯେ ଚାଲିଛି। ଗୋଟେ ପରେ ଗୋଟେ ବୈଠକ ବସୁଛି, ହେଲେ ନିଷ୍ପତ୍ତି ହୋଇପାରୁନି। ଏହାହିଁ କଂଗ୍ରେସର ସଂସ୍କୃତି। ଯେ କୌଣସି ପ୍ରସଙ୍ଗରେ ନିଷ୍ପତ୍ତି ନେବାକୁ କଂଗ୍ରେସ ନେତୃତ୍ଵ ସମୟର ଅପଚୟ କରିବା ଫଳରେ କଂଗ୍ରେସ ବାରମ୍ବାର କ୍ଷତିଗ୍ରସ୍ତ ହୋଇଛି। ପୂର୍ବରୁ ଗୋଆ ଏବଂ ମଣିପୁରରେ କଂଗ୍ରେସ ଏକକ ସଂଖ୍ୟା ଗରିଷ୍ଠ ଦଳ ହୋଇ ମଧ୍ୟ ସରକାର ଗଠନ କରି ନ ପାରିବା ତାର ଉଦାହରଣ। ସମ୍ପ୍ରତି ମହାରାଷ୍ଟ୍ରରେ କଂଗ୍ରେସ ହାତରେ ପରବର୍ତ୍ତୀ ସରକାର ଗଠନର ଚାବିକାଠି ରହିଛି। ଉଭୟ ହରିଆଣା ଓ ମହାରାଷ୍ଟ୍ରରେ କଂଗ୍ରେସ ଭଲ ପ୍ରଦର୍ଶନ କରିବା ବୋଲି ଦଳର ଆତ୍ମବିଶ୍ଵାସ ନଥିଲା। ତେବେ ଘଟଣାକ୍ରମେ ଦୁଇଟି ଯାକ ରାଜ୍ୟରେ କଂଗ୍ରେସକୁ ଆଶାତୀତ ସଫଳତା ମିଳିଛି। ତେବେ ମହାରାଷ୍ଟ୍ରରେ ସରକାର ଗଠନ ପ୍ରକ୍ରିୟାକୁ କଂଗ୍ରେସ ନେତୃତ୍ଵ ଝୁଲାଇ ରଖିବାର ପରିଣତି, ଦଳ ଲାଗି କ୍ଷତିକାରକ ହୋଇପାରେ।
ମହାରାଷ୍ଟ୍ରରେ ଆଜିର ରାଜନୈତିକ ବାସ୍ତବତା ହେଉଛି, ବିଜେପିର ବିକଳ୍ପ ସରକାର ଗଠନ। ବିଜେପି ଓ ଶିବସେନା ଭିତରେ ନିର୍ବାଚନ ପରବର୍ତ୍ତୀ ମତଭେଦ କଂଗ୍ରେସ ଓ ଏହାର ସହଯୋଗୀ ରାଷ୍ଟ୍ରବାଦୀ କଂଗ୍ରେସ ପାର୍ଟିକୁ ଏକ ବିରଳ ସୁଯୋଗ ଦେଇଛି। ତାହାକୁ ଝୁଲାଇ ରଖିଲେ, ମହାରାଷ୍ଟ୍ରରେ ରାଷ୍ଟ୍ରପତି ଶାସନ ଜାରିହେବ ଓ ଆଗାମୀ ଦିନରେ ପୁଣିଥରେ ବିଜେପି-ଶିବସେନା ମେଣ୍ଟ ଲାଗି ବାଟ ଫିଟିବ। ବିଜେପି ସହିତ ଶିବସେନାର ମେଣ୍ଟରେ ଯେଉଁ ଫାଟ ସୃଷ୍ଟି ହୋଇଛି ତାର ଭରପୂର ଫାଇଦା ଉଠାଇବା ପରିବର୍ତ୍ତେ କଂଗ୍ରେସର ପୁରୁଣା ରୋଗ ଏହାକୁ ଗ୍ରାସ କରିଛି। ଏବେ ତିନୋଟି ଯାକ ଦଳ ପାଖରେ ବିକଳ୍ପ ସରକାର ଗଠନ ଲାଗି ମାତ୍ର ଅଳ୍ପ କେଇ ଘଣ୍ଟା ବାକି ଅଛି। ତେଣୁ କଂଗ୍ରେସର ତୁରନ୍ତ ନିଷ୍ପତ୍ତି ଏ କ୍ଷେତ୍ରରେ ନିତାନ୍ତ ଜରୁରୀ।
କଂଗ୍ରେସ ନିଷ୍ପତ୍ତି ନେବାରେ ଯେତିକି ପଛୁଆ, ବିଜେପି ନିଷ୍ପତ୍ତି ନେବାରେ ସେତିକି କ୍ଷୀପ୍ର। ଯେ କୌଣସି ରାଜନୈତିକ ନିଷ୍ପତ୍ତିକୁ ତୁରନ୍ତ ଗ୍ରହଣ କରି ତାକୁ କାର୍ୟକାରୀ କରାଇବାର ସୂତ୍ର ଅମିତ ଶାହ ସଭାପତି ହେଲାପରେ ବିଜେପିକୁ ଆସିଛି। ବିଚାର ଆଲୋଚନା ଓ ବୈଠକ ରାଜନୀତିଠୁ ଅଲଗା ହୋଇ ତୁରନ୍ତ ନିଷ୍ପତ୍ତି ନେବା ଆଜିର ସମୟରେ ରାଜନୈତିକ ଆବଶ୍ୟକତା। ବିଜେପି ତତ୍ପରତାର ସହ ଯେଉଁ ପ୍ରକାର ରାଜନୈତିକ ନିଷ୍ପତ୍ତି ନେଇ ପାରୁଛି, କଂଗ୍ରେସ ସେହି ତୁଳନାରେ ପ୍ରବଳ ଅଳସୁଆ। କଂଗ୍ରେସ ଓ ବିଜେପି ଭିତରେ ଏହି ଗୋଟିଏ ପାର୍ଥକ୍ୟ ସବୁବେଳେ ବିଜେପିକୁ ଆଗୁଆ ରଖିବାରେ ସହାୟକ ହେଉଛି।
ଆଗାମୀ ତିନି ଘଣ୍ଟା ଭିତରେ ଯଦି କଂଗ୍ରେସ ନିଷ୍ପତ୍ତି ନେବାରେ ବିଫଳ ହୁଏ, ତାହେଲେ ହୁଏତ, କଂଗ୍ରେସ ନିଜର ପୁରୁଣା ସହଯୋଗୀ ଏନସିପିର ସହଯୋଗ ମଧ୍ୟ ହରାଇପାରେ। ମଉକାର ଫାଇଦା ଉଠାଇ ବିଜେପି ଯେ ଏନସିପିର ସହାୟତା ନ ନେବ, ଏକଥା କହି ହେବନାହିଁ।