ସମୀକ୍ଷା ବ୍ୟୁରୋ
ପୁରୀ: ଜଣେ ଯୁବତୀଙ୍କୁ ଲିଫ୍ଟ ଦେବା ବାହନାରେ ପୁରୀରେ ଗଣଦୁଷ୍କର୍ମ ହୋଇଥିବାର ଅଭିଯୋଗ ହୋଇଛି। ଚାରି ଜଣ ଦୁର୍ବୃତ୍ତ ଲିଫ୍ଟ ଦେବା ବାହାନାରେ ଜଣେ ଯୁବତୀଙ୍କୁ ଏକ କାରରେ ନିମାପଡାରୁ ପୁରୀ ନେଇ ଯାଇଥିଲେ। ସେଠାରେ ଦୁର୍ବୃତ୍ତମାନେ ଏକ ପୋଲିସ କ୍ବାଟରରେ ଦୁଷ୍କର୍ମ କରିଛନ୍ତି ବୋଲି ପିଡିତା ପୁରୀ କୁମ୍ଭାରପଡା ଥାନାରେ ଏତଲା ଦେଇଛନ୍ତି। ଏହି ଘଟଣାରେ ଜଣେ ନିଳମ୍ବିତ ପୋଲିସ କନେଷ୍ଟବଳ ସଂପୃକ୍ତ ଅଛନ୍ତି ବୋଲି କୁହାଯାଇଛି।
ଘଟଣାରୁ ଜଣାପଡିଛି ଯେ, ଜଣେ ଯୁବତୀ କାକଟପୁର ଯିବା ପାଇଁ ନିମାପଡା ବସ ଷ୍ଟାଣ୍ଡରେ ଅପେକ୍ଷା କରିଥିଲେ। ହେଲେ ହଠାତ ବସଟି ଛାଡି ଦେବାରୁ ଯୁବତୀ ଜଣଙ୍କ ବସରେ ଚଢି ପାରି ନ ଥିଲେ। ଏହାର ସୁଯୋଗ ନେଇ 4ଜଣ ଦୁର୍ବୃତ୍ତ ଯୁବତୀଙ୍କୁ ପୋଲିସର ପରିଚୟ ଦେଇ କାରରେ ଛାଡିଦେବେ ବୋଲି କହିଥିଲେ। ପୋଲିସ ନା ଶୁଣି ଯୁବତୀ ଜଣଙ୍କ ତାଙ୍କ ସାଥୀରେ ଯିବା ପାଇଁ ରାଜି ହୋଇ କାରରେ ବସିଥିଲେ। ହେଲେ କାରଟି କାକଟପୁର ନ ଯାଇ ପୁରୀ ଆଡକୁ ଯିବାରୁ ପାଟି କରିଥିଲେ। ହେଲେ ଦୁର୍ବୃତ୍ତମାନେ ତାଙ୍କୁ ଦୁବ୍ୟବହାର କରି ଚୁପ କରାଇ ଦେଇ ପୁରୀ ନେଇ ଯାଇଥିଲେ। ସେଠାରେ ଝାଡେଶ୍ବରୀ କ୍ଲବ ନିକଟରେ ଥିବା ଏକ ପୋଲିସ କ୍ବାଟରରେ ଗଣ ଦୁଷ୍କର୍ମ କରାଯାଇଛି ବୋଲି ପିଡିତା ଲିଖିତ ଅଭିଯୋଗ କରିଛନ୍ତି।
ଖବର ପାଇ ପୁରୀ ଏସପି କୁମ୍ଭାରପଡା ଥାନାରେ ପହଁଚି ପିଡିତାଙ୍କୁ ପଚାରାଉଚୁରା କରି 4 ଜଣକୁ ଅଟକ ରଖିଛନ୍ତି। ଅଟକଙ୍କୁ ଅଧିକ ଜେରା କରିବା ପାଇଁ ପୋଲିସ ତାଙ୍କୁ ଅଜଣା ସ୍ଥାନକୁ ନେଇଯାଇଥିବାର ଜଣାପଡିଛି। ଖବର ପ୍ରଚାର ପରେ ପୁରୀ ଯୁବ କଂଗ୍ରେସ ତରଫରୁ ଥାନା ଆଗରେ ବିକ୍ଷୋଭ ପ୍ରଦର୍ଶନ କରାଯାଇଛି। ଆଇନ ଶୃଙ୍ଖଳା ପରିସ୍ଥିତକୁ ନଜରରେ ରଖି ସେଠାରେ 2 ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଛି। ତେବେ ଏହି ଘଟଣା ପଛରେ ପୋଲିସ କିମ୍ବା ଯେ କୌଣସି ବ୍ୟକ୍ତି ହୁଅନ୍ତୁ ନା କାହିଁକି, ତାଙ୍କୁ ଛଡା ଯିବ ନାହିଁ ବୋଲି ପୁରୀ ଏସପି କହିଛନ୍ତି।
ଏହି ଖବର ପ୍ରଚାର ହେବା ପରେ ଭୁବନେଶ୍ବରରେ ଯୁବ କଂଗ୍ରେସ ତରଫରୁ ମଧ୍ୟ ନବୀନ ନିବାସ ଘେରାଉ କରିବା ପାଇଁ ଉଦ୍ୟମ କରାଯାଇଥିଲା। ଯୁବ କଂଗ୍ରେସ କର୍ମିମାନେ କଂଗ୍ରେସ ଭବନରୁ ବାହାରି ନବୀନ ନିବାସ ଆଡକୁ ମାଡି ଆସିଥିଲେ। ହେଲେ ପୋଲିସ ବାଟରେ ଅଟକାଇବାରୁ ସେମାନେ ରୋଡ ଉପରେ ବସି ବିକ୍ଷୋଭ କରିଥିଲେ। ଏହି ଘଟଣା ପରବର୍ତ୍ତି ସମୟରେ ଭିନ୍ନ ରୂପ ନେବାର ସମ୍ଭାବନା ସୃଷ୍ଟି ହୋଇଥିବାରୁ ପୁରୀ ଓ ଭୁବନେଶ୍ବରରେ ପୋଲିସକୁ ସଜାଗ ରହିବାକୁ କୁହାଯାଇଛି।