କେଦାର ମିଶ୍ର
ବ୍ରିଟିଶ ସରକାର ଅମଳରେ ଯେଉଁ ସାମ୍ବାଦିକମାନେ ସରକାର ବିରୋଧରେ ଲେଖୁଥିଲେ, ସେମାନଙ୍କୁ ଜେଲକୁ ପଠାଇ ଦିଆ ଯାଉଥିଲା। ସ୍ଵାଧୀନତା ପରେ ସେ ଚିତ୍ର ବଦଳିଯିବ ବୋଲି ଆମେ ଆଶା କରୁଥିଲୁ। ତେବେ ଗତ ସତୁରୀ ବର୍ଷ ଭିତରେ ଏମିତି ଅନେକ ଉଦାହରଣ ରହିଛି,ଯେଉଁଠି ନିଜର ଦାୟିତ୍ଵ ନିର୍ବାହ କରିବାକୁ ଯାଇ ସମ୍ବାଦିକମାନେ ଲାଞ୍ଛିତ ହୋଇଛନ୍ତି। ଅନେକ ସମୟରେ ସାମ୍ବାଦିକଙ୍କ ପ୍ରାଣହାନୀ ମଧ୍ୟ ଘଟିଛି। ୧୯୭୫ ମସିହାରେ ଯେତେବେଳେ ଶ୍ରୀମତୀ ଇନ୍ଦିରା ଗାନ୍ଧୀ ଜରୁରୀ କାଳୀନ ପରିସ୍ଥିତି ଜାରି କରିଥିଲେ, ତା ବିରୋଧରେ ଲେଖିଥିବା ଅନେକ ସାମ୍ବାଦିକଙ୍କୁ ଜେଲରେ ଦିନ କାଟିବାକୁ ପଡିଥିଲା। ତେବେ ସରକାର ବିରୋଧରେ ଲେଖାଲେଖି କରି ଜେଲ ଭୋଗିଥିବା ସେ ସାମ୍ବାଦିକମାନେ ଥିଲେ ଆମ ପାଇଁ ମହାନାୟକ। ଆମେ କୁଲଦୀପ ନାୟାର କିମ୍ବା ପ୍ରଭାସ ଯୋଷିଙ୍କୁ ସାମ୍ବାଦିକତାର ମହାନାୟକ ବୋଲି କହିଆସିଛୁ କାରଣ ସେମାନେ ସରକାର ଓ ସତ୍ତା ବିରୋଧରେ ଲେଖିପାରିବାର ଅଦମ୍ୟ ସାହସ ପ୍ରଦର୍ଶନ କରିଥିଲେ। ଯେତେବେଳେ ରାଜୀବ ଗାନ୍ଧୀ ସରକାର ଗଣମାଧ୍ୟମର ସ୍ଵାଧୀନତା କ୍ଷୁଣ୍ଣ କଲାଭଳି ଏକ ଆଇନ ଆଣିଥିଲେ, ତାରି ବିରୋଧରେ ସାରା ଦେଶର ସାମ୍ବାଦିକ ଏକାଠି ହୋଇ ସେହି ଆଇନର ବିରୋଧ କରିଥିଲେ।
ରାଜୀବ ଗାନ୍ଧି ଏ ଦେଶର ସବୁଠୁ ବୃହତ୍ତମ ଜନମତ ପାଇ ପ୍ରଧାନମନ୍ତ୍ରୀ ହୋଇଥିଲେ ମଧ୍ୟ ଭାରତୀୟ ସାମ୍ବାଦିକମାନେ ତାଙ୍କୁ ପ୍ରତି ପାଦରେ ସମାଲୋଚନା କରିଛନ୍ତି। ରାଜୀବ ଗାନ୍ଧୀ ସରକାର ବିରୋଧରେ ବୋଫୋର୍ସ ଦୁର୍ନୀତି ମାମଲାକୁ ନେଇ ଅରୁଣ ଶୌରୀଙ୍କ ଲେଖା ସେତେବେଳେ ପ୍ରବଳ ମାନ୍ୟତା ପାଇଥିଲା। ବୋଫୋର୍ସ ଦୁର୍ନୀତି କେବେହେଲେ ଅଦାଲତରେ ପ୍ରମାଣିତ ହୋଇନଥିଲା। ହେଲେ ଆମେ ଏଥିଲାଗି ଅରୁଣ ଶୌରୀ ବା ଚିତ୍ରା ସୁବ୍ରମନ୍ୟମଙ୍କ ସାମ୍ବାଦିକତା ଉପରେ କେବେ ପ୍ରଶ୍ନଚିହ୍ନ ଲଗାଇନାହୁଁ। ଆଜି ହଠାତ ସାମ୍ବାଦିକତା ଏତେ ବଡ ଅପରାଧ ପାଲଟି ଯାଇଛି କେମିତି? ସରକାରକୁ ସମାଲୋଚନା କରୁଥିବା ସାମ୍ବାଦିକଙ୍କୁ ଅପରାଧୀ ଭଳି ବ୍ୟବହାର କରିବାର ଏ ଅଶ୍ଳୀଳତା କୁ ଶାସକ ବିଜେପି ଦଳ ସର୍ବାଧିକ ପ୍ରୋତ୍ସାହନ ଦେଉଛି କେମିତି ଓ କାହିଁକି?
ସରକାର ବିରୋଧରେ ସତର୍କ ରହିବା ଓ ସମାଲୋଚନା କରିବା ସାମ୍ବାଦିକତାର ମୌଳିକ କର୍ତ୍ତବ୍ୟ। ସରକାରଙ୍କ ପ୍ରଚାର କରିବା ଲାଗି ସରକାରୀ ବ୍ୟବସ୍ଥା ରହିଛି। ସାମ୍ବାଦିକ ସରକାରର ଆଲୋଚକ, ସ୍ତାବକ ନୁହେଁ। ବିଜେପି ସରକାର ବୋଧହୁଏ ଚାହୁଁଛନ୍ତି, ଭାରତୀୟ ସାମ୍ବାଦିକତା ତାଙ୍କର ଭାଟଗିରି ଓ ଗୋଲାମଗିରି କରୁ। କିଛି ଗଣମାଧ୍ୟମ ସରକାରୀ ଦଳର ଭାଟ ତଥା ଗୋଲାମ ହେବାକୁ ପସନ୍ଦ କରିଛନ୍ତି। ସେଥିପାଇଁ ସେମାନଙ୍କୁ ଆମର କିଛି କହିବାର ନାହିଁ। ହେଲେ ଯେଉଁ ସାମ୍ବାଦିକମାନେ ସରକାରର ସମାଲୋଚକ ସେମାନଙ୍କ ଉପରେ ଲାଞ୍ଛନା ଲଗାଇବା ଓ ସେମାନଙ୍କ ଜୀବନକୁ ବିପନ୍ନ କଲାଭଳି ପରିସ୍ଥିତି ବିଜେପି ସୃଷ୍ଟି କରୁଛି। ସରକାର ବିରୋଧୀ ସାମ୍ବାଦିକମାନଙ୍କୁ ଦେଶଦ୍ରୋହୀ ଓ ସନ୍ତ୍ରାସବାଦୀ ବୋଲି କହିବାର ଅତ୍ୟନ୍ତ ନୀଚ ଉଦ୍ୟମ ବିଜେପି କରୁଛି।
ଏହାର ଶେଷତମ ଉଦାହରଣ ହେଉଛି, ବରିଷ୍ଠ ସାମ୍ବାଦିକ ରାଜଦୀପ ସରଦେସାଇଙ୍କ ବିଷୟରେ ବିଜେପି ଆଇଟି ସେଲର ମୁଖ୍ୟ ଅମିତ ମାଲବ୍ୟ ଦେଇଥିବା ଅରୁଚିକର ,ମନ୍ତବ୍ୟ। ରାଜଦୀପ ସନ୍ତ୍ରାସବାଦୀ ସଂଗଠନ ଆଇଏସଆଇଏସର ମୁଖପାତ୍ର ହେବାକୁ ଯୋଗ୍ୟ କି ବୋଲି କହି ଏକ ସୋସିଆଲ ମିଡିଆ ସର୍ଭେ କରାଯାଇଛି। ଏହା କେବଳ ଅଶ୍ଳୀଳ ନୁହେଁ, ମାନବତା ବିରୋଧୀ ମଧ୍ୟ। ଦାୟିତ୍ଵ ନିର୍ବାହ କରୁଥିବା ଜଣେ ସାମ୍ବାଦିକଙ୍କୁ ସନ୍ତ୍ରାସବାଦୀ ବୋଲି କହି ତାଙ୍କ ବିରୋଧରେ ଘୃଣା ଓ ହିଂସା ସୃଷ୍ଟି କରିବାକୁ ଶାସକ ଦଳ ଖୋଲାଖୋଲି ଉଦ୍ୟମ କରିଛି। ରାଜଦୀପ ଓ ତାଙ୍କ ପତ୍ନୀ ସାଗରିକା ଘୋଷଙ୍କ ବିରୋଧରେ ବିଜେପିର ଆଇଟି ସେଲ ଗତ ପାଞ୍ଚ ବର୍ଷ ଧରି ଏ ପ୍ରକାର ଘୃଣା ସୃଷ୍ଟି କରିଚାଲିଛି। ହେଲେ ଦଳୀୟ କର୍ମକର୍ତ୍ତା ଭାବରେ ଅମିତ ମାଲବ୍ୟଙ୍କ ଏହି କୁତ୍ସିତ କାମ ବିଜେପିର ବିଧିବଦ୍ଧ ସ୍ଵୀକୃତି ପାଇଛି ବୋଲି ଆମକୁ କହିବାକୁ ପଡିବ। ଅମିତ ମାଲବ୍ୟ ନିୟମିତ ଭାବରେ ନିଜର ବିରୋଧୀଙ୍କ ପ୍ରତି କଦର୍ୟ ବ୍ୟବହାର ଓ ମିଛ ପ୍ରଚାର ପାଇଁ ବେଶ କୁଖ୍ୟାତ। ତେବେ ଖୋଲାଖୋଲି ଜଣେ ସାମ୍ବାଦିକଙ୍କ ଜୀବନ ପ୍ରତି ବିପଦ ସୃଷ୍ଟି କରିଥିବା ଏ ମହାଶୟଙ୍କ ବିରୋଧରେ କିଛି କାର୍ୟାନୁଷ୍ଠାନ ହେବ କି?
ଆମେ କାଣିଛୁ, ଅମିତ ମାଲବ୍ୟଙ୍କ ବିରୋଧରେ କିଛି ବି କାର୍ୟାନୁଷ୍ଠାନ ହେବନାହିଁ। ସରକାର ବିରୋଧୀ ପ୍ରତ୍ୟେକ ସ୍ଵରକୁ ଦବାଇ ଦେବାର ଉଦ୍ୟମ ଯୋଗୁଁ ଅମିତଙ୍କୁ ଓଲଟି ପୁରସ୍କାର ମିଳିପାରେ। ତେବେ ରାଜଦୀପ ଓ ତାଙ୍କ ପରି ସରକାର ବିରୋଧୀ ସାମ୍ବାଦିକଙ୍କ ଉପରେ ହେଉଥିବା ବିଜେପିର ଏହି ଆକ୍ରମଣ ବିରୋଧରେ ସାମ୍ବାଦିକମାନେ ଠିଆ ହେବେ ନା ନାହିଁ? ଏହାର ଉତ୍ତର ମଧ୍ୟ ଅତି ସହଜ। ସମାଜର ସବୁ ବର୍ଗଙ୍କୁ ତୀବ୍ର ଭାବରେ ବିଭାଜିତ କରିଥିବା ବିଜେପି, ସାମ୍ବାଦିକତାକୁ ମଧ୍ୟ ବିଭାଜିତ କରି ସାରିଛି। ସରକାରୀ ଦଳର ଚାମଚାଗିରିକୁ ନିଜର ଧର୍ମ ମନେ କରୁଥିବା କିଛି ସାମ୍ବାଦିକ ଓ ତାଙ୍କର ପୋଷା ଟ୍ରୋଲ ବାହିନୀ, ଏଥିପାଇଁ ନୀରବ ରହିବେ କିମ୍ବା ଅମିତ ମାଲବ୍ୟଙ୍କ ସହ ସ୍ଵର ମିଳାଇବେ। ବାକି ଯେଉଁମାନେ ରାଜାଦୀପଙ୍କ ସହ ରହିବେ, ସେମାନଙ୍କୁ ଦେଶଦ୍ରୋହୀର ସାର୍ଟିଫିକେଟ ବିଜେପି ଅଫିସ ତରଫରୁ ପଠାଇ ଦିଆଯିବ। ବିଜେପିର ଗଣତନ୍ତ୍ର ଓ ସମ୍ବିଧାନ ବିରୋଧୀ ଏ ପ୍ରକାର ପଦକ୍ଷେପ ବିରୋଧରେ ଯଦି ତୀବ୍ର ପ୍ରତିବାଦ ନ ହୁଏ, ତାହେଲେ ଏ ଦେଶ ନିଜର ଗଣତନ୍ତ୍ରକୁ ବଞ୍ଚାଇ ରଖିବା ସମ୍ଭବ ହେବନାହିଁ ।
