ଭୁବନେଶ୍ବର, ରାଜନୀତି କରିବାରେ ପୂର୍ବରୁ କେବେ ଆଗ୍ରହ ନ ଥିଲା କି ବର୍ତ୍ତମାନ ମଧ୍ୟ ନାହିଁ। ଯଦି ରାଜନୀତି କରିବାର ଥିଲା ତେବେ ବହୁ ବର୍ଷ ପୂର୍ବରୁ କରିପାରିଥାନ୍ତି। ଏହା କହିଛନ୍ତି ସମ ହସପିଟାଲ, ସମ ଅଲଟିମେଟ ଏବଂ ଶିକ୍ଷା ଓ ଅନୁସନ୍ଧାନ ଡିମଡ ବିଶ୍ବବିଦ୍ୟାଳୟର ପ୍ରତିଷ୍ଠାତା ମନୋରଂଜନ ନାୟକ। କେତେକ ସାମାଜିକ ଗଣମାଧ୍ୟମରେ ପ୍ରକାଶ ପାଇଥିଲା ଯେ, ମନୋଜ ନାୟକ ରାଜ୍ୟସଭାକୁ ଯିବା ପାଇଁ କୁଆଡେ ଆଗ୍ରହୀ। ତାଙ୍କୁ ଉଭୟ ବିଜେଡି ଓ ବିଜେପି ପ୍ରାର୍ଥୀ କରିବ।
ଏ ସଂପର୍କରେ ମନୋଜ ନାୟକଙ୍କୁ ସମୀକ୍ଷା ଡଟ କମ ତରଫରୁ ଫୋନ ଯୋଗେ ଯୋଗାଯୋଗ କରାଯାଇଥିଲା। ଏହାର ଉତ୍ତରରେ ସେ କହିଥିଲେ ଯେ, କେତେକ ସାମାଜିକ ଗଣମାଧ୍ୟମରେ ଯାହା ପ୍ରକାଶ ପାଇଛି ତାହା ସଂପୂର୍ଣ୍ଣ ମିଥ୍ୟା। ମୋର ରାଜନୀତି କରିବାରେ କୌଣସି ଆଗ୍ରହ ନାହିଁ। ମୋର ମୁଖ୍ୟ ଆଗ୍ରହ ବା ଲକ୍ଷ୍ୟ ରହିଛି କିପରି ବିଶ୍ବବିଦ୍ୟାଳୟରେ ଛାତ୍ରଛାତ୍ରୀମାନେ ଭଲ କ୍ୟାରିୟର କରିବେ। ସମ ହସପିଟାଲରେ କିପରି ରୋଗୀମାନେ ଭଲରେ ଚିକିତ୍ସିତ ହେବେ। ଏହାଛଡା ମୋର ଆଉ କୈଣସି ଲକ୍ଷ୍ୟ ନାହିଁ ବୋଲି ମନୋଜ କହିଛନ୍ତି।
ନିକଟରେ ମନୋଜ ନାୟକ ସମ ଅଲଟିମେଟ ନାମିତ ଏକ ଅତ୍ୟାଧୁନିକ ହସପିଟାଲ ଉଦଘାଟନ କରିଥିଲେ। ଏହି ଉଦଘାଟନ ଉତ୍ସବରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଯୋଗ ଦେଇଥିଲେ। ଦୁଇ ମୁଖ୍ୟ ବିରୋଧୀଙ୍କୁ ମନୋଜ ନାୟକ ଗୋଟିଏ ମଞ୍ଚରେ ଏକାଠି ବସାଇବାର ସକ୍ଷମ ହୋଇଥିଲେ। ଫଳରେ ମନୋଜ ଉଭୟ ବିଜେପି ଓ ବିଜେଡି ତରଫରୁ ରାଜ୍ୟସଭା ପ୍ରାର୍ଥୀ ହେବେ ବୋଲି କେତେକ ଗଣମାଧ୍ୟମରେ ପ୍ରକାଶ କରିଥିଲେ। ଯାହାକୁ ସିଧାସିଧା ମନୋଜ ନାୟକ ଖଣ୍ଡନ କରିଛନ୍ତି।