ନୂଆଦିଲ୍ଲୀ: କେନ୍ଦ୍ର ସରକାରଙ୍କ ପକ୍ଷରୁ ମେ ୩୧ ପର୍ଯ୍ୟନ୍ତ ଲକ୍ଡାଉନ୍ ଅବଧିକୁ ବଢାଯାଇଥିବା ବେଳେ ଗୃହ ମନ୍ତ୍ରାଳୟ ପକ୍ଷରୁ ଏକ ଗାଇଡ୍ଲାଇନ୍ ଜାରି କରାଯାଇଛି। ନୂତନ ଗାଇଡ୍ଲାଇନ୍ ଅନୁଯାୟୀ କରୋନା ହଟ୍ସ୍ପଟ ଗୁଡିକରେ ପୂର୍ବବତ ନିୟମ କଡାକଡି ରହିବ। ଏହି ସମୟରେ ସମସ୍ତ ଘରୋଇ ଏବଂ ଅନ୍ତର୍ଜାତୀୟ ବିମାନ ଚଳାଚଳକୁ ବନ୍ଦ ରଖାଯାଇଛି। ସେହିଭଳି ମେଟ୍ରୋ ସେବାକୁ ମଧ୍ୟ ବନ୍ଦ ରଖିବା ପାଇଁ କୁହାଯାଇଛି। ତେବେ ବସ୍ ସେବା ଚାଲୁ କରିବା ପାଇଁ ନିର୍ଦ୍ଦେଶନାମା ଜାରି କରାଯାଇଛି। ତେବେ ଏହା ରାଜ୍ୟର ଇଚ୍ଛାଧୀନ ବ୍ୟାପାର ରହିବ ବୋଲି ସ୍ପଷ୍ଟ କରାଯାଇଛି। ହୋଟେଲ ଏବଂ ରେଷ୍ଟୁରାଣ୍ଟ ଗୁଡିକୁ ବନ୍ଦ ରଖିବା ପାଇଁ ନିର୍ଦ୍ଦେଶନାମା ଜାରି କରାଯାଇଥିବା ବେଳେ ଘରକୁ ପାର୍ସଲ୍ ଏବଂ ହୋମ୍ ଡେଲିଭରୀ ଜାରି ରହିବ।
ଏହି ସମୟରେ ସମସ୍ତ ସ୍କୁଲ୍, କଲେଜ୍, ଜିମ୍, ସ୍ବିମିଂପୁଲ୍, ସପିଂ ମଲ୍ ଏବଂ ସିନେମା ହଲ୍କୁ ବନ୍ଦ ରଖିବା ପାଇଁ ନିର୍ଦ୍ଦେଶ ଦିଆଯାଇଛି। ସମସ୍ତ ଧାର୍ମିକ ଏବଂ ରାଜନୈତିକ ଏକତ୍ରୀକରଣକୁ ବନ୍ଦ ରଖାଯାଇଛି। ରେଡ୍, ଗ୍ରୀନ୍ ଏବଂ ଅରେଞ୍ଜ ଜୋନ୍ ସହିତ ଆହୁରି ଦୁଇଟି ନୂତନ ଜୋନ୍ ଯୋଗ କରାଯାଇଛି।ବଫର୍ ଏବଂ କଣ୍ଟେନମେଣ୍ଟ ଜୋନ୍ ନାମକ ଦୁଇଟି ନୂତନ ଜୋନ୍ ଜାରି କରାଯାଇଥିବା ବେଳେ ଜୋନ୍ ନିର୍ଦ୍ଧାରଣ ଦାୟିତ୍ବ ରାଜ୍ୟ ସରକାରଙ୍କୁ ପ୍ରଦାନ କରାଯାଇଛି । ଏହା ସହିତ ବିଭିନ୍ନ ଷ୍ଟାଡିୟମ୍କୁ ଖୋଲାଯିବ ମାତ୍ର ଦର୍ଶକଙ୍କୁ ପ୍ରବେଶର ଅନୁମତି ପ୍ରଦାନ କରାଯିବ ନାହିଁ। ଦୋକାନ ଗୁଡିକରେ ସାମାଜିକ ଦୂରତ୍ବ ପାଳନ କରିବା ପାଇଁ ନିୟମ କରାଯିବ ଏବଂ ଦୋକାନରେ 5 ଜଣରୁ ଅଧିକ ଗ୍ରାହକ ଛିଡା ହୋଇପାରିବେ ନାହିଁ। (ଏଜେନ୍ସି)
