ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଦିନକୁ ଦିନ ଗଞ୍ଜାମ ଜିଲ୍ଲାରେ କରୋନା ଜଟିଳ ଓ ଭୟଙ୍କର ରୂପ ଧାରଣ କରୁଛି । ସେଠାରେ ସ୍ବାସ୍ଥ୍ୟସେବା ସମ୍ପୂର୍ଣ୍ଣ ରୂପେ ଭୁଷୁଡି ଗଲାଣି । ମଣିଷମାନଙ୍କ ଜୀବନ ପୋକ ମାଛି ପରି ଝଡ଼ି ପଡ଼ୁଥିବା ବେଳେ ସ୍ୱାସ୍ଥ୍ୟସେବାରୁ ବଂଚିତ ଲୋକଙ୍କ ଜୀବନର ଆର୍ତ୍ତନାଦ ଶୁଣିବାକୁ ସତେ ଯେପରି କେହିନାହାନ୍ତି । କରୋନାର ବିକଟାଳ ସ୍ୱରରେ ସମଗ୍ର ଗଂଜାମର ଛାତି ଥରି ଉଠୁଥିବା ବେଳେ ପ୍ରଶାସନର ଦୁର୍ବଳ ବ୍ୟବସ୍ଥାର ଗୋଟିଏ ଗୋଟିଏ ରୁଗଣ୍ ଚିତ୍ର ବୟାନ କରୁଛି ଗଂଜାମ ଜିଲ୍ଲାର ସ୍ଥିତି କେତେ ସଂଗୀନ ।
ଦକ୍ଷିଣ ଓଡ଼ିଶାର ବଡ଼ ମେଡ଼ିକାଲ୍ ଏମ୍କେସଜିର ଭିତର କୋଠାର ଅଭାବନୀୟ ଚିତ୍ର ଆଜି ଆମେ କେଡ଼େ ଭୟଙ୍କର ସମୟ ଦେଇ ଗତି କରୁଛୁ ତାହା ବୟାନ କରୁଛି । ତେବେ ଏଠି ପ୍ରଶ୍ନ ଉଠୁଛି, ଗଂଜାମ ଜିଲ୍ଲାରେ ମାଳ ମାଳ ବାବୁ ଓ ହଜାର ହଜାର ସ୍ୱାସ୍ଥ୍ୟକର୍ମୀ ଡ଼ାକ୍ତର ଦିନରାତି କାହା ପାଇଁ ଖଟୁଛନ୍ତି ? ଏଠାରେ ପ୍ରାୟ ପ୍ରତ୍ୟେକ ଦିନ ରୋଗୀଙ୍କ ମୃତ୍ୟୁ ହେଉଛି । ତାହା ପୁଣି କରୋନାରେ ନଚେତ୍ ଅମ୍ଳଜାନ ଅଭାବରେ। ଏଥିପାଇଁ ଦାୟୀ କିଏ ?
ସରକାର ଗଞ୍ଜାମ ଜିଲ୍ଲାକୁ ଅଧିକ ପ୍ରାଥମିକତା ଦେଇ ବାହାର ଜିଲ୍ଲାର 5 ଜଣ ପ୍ରାଶାସନିକ ଅଧିକାରୀଙ୍କ ସମେତ 32 ଜଣ ଓଆରଏସ୍ ଅଫିସର, 130 ଜଣ ଡାକ୍ତରଙ୍କୁ ପଠାଇଛନ୍ତି । କିନ୍ତୁ ସେଠାରେ ସ୍ଥିତି ଦିନକୁ ଦିନ ବିଗିଡିବାରେ ଲାଗିଛି । କରୋନା ଯୋଦ୍ଧାମାନେ କରୋନାରେ ଆକ୍ରାନ୍ତ ହେବା ପରେ ସେଠାକାର ସ୍ଥିତି ଭୟଙ୍କର ହୋଇଛି । ପରିସ୍ଥିତିକୁ ଦେଖି ବ୍ୟବସ୍ଥା କରିବା ଏବେ ସରକାରଙ୍କ ପ୍ରଥମ କର୍ତ୍ତବ୍ୟ ହୋଇପଡିଛି ।
ବଡ ମେଡ଼ିକାଲରେ ରୋଗୀଙ୍କ ମୃତଦେହ ପଡିରହିଥିବା ବେଳେ ଏଠାରେ ଶବ ଉଠାଇବାକୁ କେହି ନାହିଁ । ଅଧିକାଂଶ ମୃତ୍ୟୁର କାରଣ ପୁଣି ଅସ୍ପଷ୍ଟ ରହୁଛି । ଗଞ୍ଜାମ ଜିଲ୍ଲାରେ କରୋନା ସ୍ଥିତି ବିସ୍ଫୋରକ ସ୍ଥିତି ଧାରଣ କରିଥିଲେ ସୁଦ୍ଧା ବହୁ ରୋଗୀଙ୍କ ମୃତ୍ୟୁ ହେବା ପରେ ମଧ୍ୟ ସେମାନଙ୍କର କରୋନା ଟେଷ୍ଟ କରା ନ ଯାଇ ପରିବାର ବର୍ଗଙ୍କୁ ହସ୍ତାନ୍ତର କରାଯାଉଥିବା ଭଳି ସଙ୍ଗୀନ ଅଭିଯୋଗ ହେଉଛି । ମୃତଦେହ ଗୁଡିକ କରୋନା ସଂକ୍ରମଣର ବାହକ ସାଜିଥିବା ବେଳେ ଜିଲ୍ଲାର ପ୍ରତ୍ୟେକ ଶ୍ମଶାନ ହିଁ ଗଞ୍ଜାମ ଜିଲ୍ଲାର ପ୍ରକୃତ ସ୍ବାସ୍ଥ୍ୟବସ୍ଥାର ଚିତ୍ର ପ୍ରଦାନ କରୁଛି ।
ଏପରି ଏକ ଦୁର୍ଭାଗ୍ୟପୂର୍ଣ୍ଣ ସମୟରେ ଜିଲ୍ଲାର ଏପରି ଅଭାବନୀୟ ଚିତ୍ରକୁ ମଧ୍ୟ ଗଣମାଧ୍ୟମ ସାମ୍ନାକୁ ଆଣିପାରୁନାହିଁ । କିନ୍ତୁ ଗଞ୍ଜାମ ଜିଲ୍ଲାର ତଥାକଥିତ ଚିତ୍ର ଅସଲ ଚିତ୍ରଠାରୁ କିଛି ଭିନ୍ନ ବର୍ଣ୍ଣନା କରୁଛି । ଜିଲ୍ଲାରେ କରୋନାର ଚିତ୍ରଠୁ ଭୟଙ୍କର ରୂପ ଧାରଣ କରିଛି ହାକିମ୍ ବାବୁ ଓ ନେତାମାନଙ୍କର ଆଚରଣ, ବିଚାର ଓ ତାଙ୍କ ପ୍ରଯୋଜିତ ବ୍ୟବସ୍ଥା। ଯେଉଁ ଡ଼ାକ୍ତରମାନଙ୍କୁ ନେଇ ସ୍ୱତନ୍ତ୍ର ଦାୟିତ୍ୱ ଦେଇଛନ୍ତି ସେମାନଙ୍କ ମଧ୍ୟରୁ ୮୦ ପ୍ରତିଶତ ଡ଼ାକ୍ତର ହୋମ୍ କ୍ୱାରେଣ୍ଟାଇନ୍ରେ। ଅନ୍ଲାଇନ୍ ସ୍ୱାସ୍ଥ୍ୟସେବା ଏବେ କେବଳ ନାମକୁ ମାତ୍ର । କାରଣ ଏଠାରେ ଅଧିକାଂଶ ରୋଗୀ ଅନଲାଇନ୍ ସେବାର ଅର୍ଥ ବି ବୁଝିନାହାନ୍ତି ।
ଅପରପକ୍ଷରେ ଏଠାକାର କୋଭିଡ଼୍ ହସ୍ପିଟାଲ୍ର ଅବ୍ୟବସ୍ଥା ମଧ୍ୟ କାହାକୁ ଅଗୋଚର ନାହିଁ । ବ୍ରହ୍ମପୁର ତଥା ଗଂଜାମକୁ ରାଜଧାନୀ ବାରଣ କରିବା ପରେ ଯେଉଁ ଅସନ୍ତୋଷ ଦାନା ବାନ୍ଧିଥିଲା ତା’ର କ୍ଷୋଭ ଦିନକୁ ଦିନ ଉଗ୍ର ରୂପ ଧାରଣ କରୁଛି । କୋଭିଡ଼୍ ହସ୍ପିଟାଲ୍ରେ ସେବା ଠିକ୍ ନାହିଁ । ପ୍ରଶାସନ କେବଳ ଟ୍ୱିଟର ହେଣ୍ଡଲ ଖେଳରେ ମତୁଆଲା ହୋଇଛି। ଏଠାରେ ରୋଗୀକୁ ସ୍ୱାସ୍ଥ୍ୟସେବା ନାହିଁ କି ଔଷଧ ନାହିଁ । ଡ଼ାକ୍ତରମାନେ ଲକ୍ଷାଧିକ ଟଙ୍କାର କୋଭିଡ଼୍ ଯୋଦ୍ଧା ମାନ୍ୟତା ପାଇଥିଲେ ବି ସେମାନଙ୍କୁ ଆଜି ଜୀବନ ଭୟ ଘାରିଛି । ପୋଲିସ୍ ବାବୁମାନଙ୍କ ଅବସ୍ଥା ମଧ୍ୟ ଶୋଚନୀୟ । ଏସବୁ ଭିତରେ କରୋନାର ଗଡ଼ ଗଂଜାମର ବିପର୍ଯ୍ୟସ୍ତ ସ୍ୱାସ୍ଥ୍ୟସେବାର ବିପର୍ଯ୍ୟୟ ଚିତ୍ର ପାଇଁ ସରକାର ମୁଖ୍ୟତଃ ଦାୟୀ ନ ରହିବେ କାହିଁକି ବୋଲି ପ୍ରଶ୍ନ ଉଠୁଛି । ଆଜିର ସମୟରେ ଗଞ୍ଜାମ ଜିଲ୍ଲାର କରୋନା ହଟସ୍ପଟ ହେବା ସହିତ ଦିନକୁ ଦିନକୁ ଚିନ୍ତା ବଢାଇ ଚାଲିଛି । ଏଠାରେ ସାଧାରଣ ଜନତା କେବଳ ଈଶ୍ବରଙ୍କୁ ଡାକି ଘରେ ରହିବା ଛଡା ତାଙ୍କ ପାଖରେ ଆଉ କୌଣସି ଉପାୟ ନାହିଁ ।
