ଭୁବନେଶ୍ବର, ଧିରେ ଧିରେ ସାମ୍ଭାବ୍ୟ ବାତ୍ୟା ‘ନିଭାର’ ଘନିଭୂତ ହେବାରେ ଲାଗିଛି । ଦକ୍ଷିଣପୂର୍ବ ବଙ୍ଗୋପ ସାଗରରେ ସୃଷ୍ଟି ହୋଇଥିବା ଏହି ଲଘୁଚାପ ଆସନ୍ତା 24 ଘଣ୍ଟା ମଧ୍ୟରେ ବାତ୍ୟା ରୂପ ନେବ ବୋଲି ପାଣିପାଗ ବିଭାଗ ତରଫରୁ କୁହାଯାଇଛି। ଅର୍ଥାତ ଆସନ୍ତା 24 ତାରିଖରେ ଏହା ବାତ୍ୟା ରୂପ ନେବ ଏବଂ 25 ତାରିଖରେ ଏହା ସ୍ଥଳ ଭାଗ ଛୁଇଁବ ବୋଲି ଜଣାପଡିଛି। ଏହା ତାମିଲନାଡୁ ଏବଂ ପୁଡିଚେରୀ ଉପକୂଳ ଆଡକୁ ମାଡି ଆସୁଥିବାର ସାଟାଲାଇଟ ଚିତ୍ରରୁ ସୂଚନା ମିଳିଛି।
ବର୍ତ୍ତମାନ ଏହା ପୂର୍ବ ଏବଂ ଦକ୍ଷିଣପୂର୍ବ ପୁଡୁଚେରୀ ଉପକୂଳରୁ 550 କିଲୋମିଟର ଏବଂ ଦକ୍ଷିଣପୂର୍ବ ଚେନ୍ନାଇ ଉପକୂଳଠାରୁ 590 କିଲୋମିଟର ଦୂରରେ ରହିଛି। ଏହା 25 ତାରିଖ ଅପରାହ୍ନରେ କାରାଇକାଲ୍ ଏବଂ ମାମଲାପୁରମ୍ ମଧ୍ୟରେ ସ୍ଥଳଭାଗକୁ ଛୁଇଁବ ବୋଲି ଜଣାପଡିଛି। ଏହି ସମୟରେ ଘଣ୍ଟାକୁ 100 ରୁ 110 କିଲୋମିଟର ବେଗରେ ପବନ ବହିବାର ସମ୍ଭାବନା ରହିଛି। ଏହି ସାମ୍ଭବ୍ୟ ବାତ୍ୟା ଯୋଗୁଁ ତାମିଲନାଡୁ ଏବଂ ପୁଡୁଚେରୀରେ ପବନ ସହିତ ପ୍ରବଳ ବର୍ଷା ହେବାର ମଧ୍ୟ ସମ୍ଭାବନା ରହିଛି। ସେଥିପାଇଁ ଉଭୟ ସରକାର ସାମ୍ଭବ୍ୟ ବାତ୍ୟା ମୁକାବିଲା ପାଇଁ ପ୍ରସ୍ତୁତି ଆରମ୍ଭ କରିଦେଇଛନ୍ତି।
ଓଡିଶାରେ 4ଟି ଜିଲ୍ଲାକୁ ଦିଆଗଲା ୱେଲୋ ୱାର୍ଣ୍ଣି, ସତର୍କ ରହିବାକୁ ଏସଆରସିଙ୍କ ଚିଠି
ସାମ୍ଭବ୍ୟ ବାତ୍ୟା ‘ନିଭାର’ ର ଜୋରଦାର ପ୍ରଭାବ ଓଡିଶାରେ ଅନୁଭୂତ ହେବାର ନାହିଁ। ହେଲେ ଦକ୍ଷିଣ ଓଡିଶାରେ ଏହାର ପ୍ରଭାବ ସାମାନ୍ୟ ରହିବ ବୋଲି ଜଣାପଡିଛି। ଏହି ବାତ୍ୟା 24 ତାରିଖ ଏବଂ 26 ତାରିଖ ପର୍ଯ୍ୟନ୍ତ ଦକ୍ଷିଣ ଭାରତରେ ତାଣ୍ଡବ ସୃଷ୍ଟି କରୁଥିବାରୁ ଓଡିଶାରେ ମଧ୍ୟ ଏହି ଦିନଗୁଡିକରେ ସାମାନ୍ୟ ପ୍ରଭାବ ରହିବ। ନଭେମ୍ବର 25 ତାରିଖରୁ 26 ତାରିଖ ପର୍ଯ୍ୟନ୍ତ ଓଡିଶାରେ ଏହାର ସ୍ବଳ୍ପ ପ୍ରଭାବ ଅନୁଭୂତ ହେବ। ସେଥିପାଇଁ 25 ତାରିଖରେ ରାଜ୍ୟର ଛଅଟି ଜିଲ୍ଲାର କେତେକ ସ୍ଥାନରେ ସାଧାରଣ ବର୍ଷା ହେବ ବୋଲି କୁହାଯାଇଛି। ସେଗୁଡିକ ହେଲା ମାଲକାନାଗିରି, ରାୟଗଡା, ଗଜପତି, କୋରାପୁଟ, ଗଂଜାମ ଏବଂ କନ୍ଧମାଳ ଜିଲ୍ଲାର କେତେକ ସ୍ଥାନରେ ବର୍ଷା ହେବାର ସମ୍ଭାବନା ରହିଛି।
ହେଲେ 26 ତାରିଖରେ ଚାରୋଟି ଜିଲ୍ଲାକୁ ୱେଲୋ ୱାର୍ଣ୍ଣି ଜାରୀ କରିଛି ଭୁବନେଶ୍ବର ପାଣିପାଗ ବିଭାଗ । ସେହି ଜିଲ୍ଲାଗୁଡିକ ହେଲା ମାଲକାନାଗିରି, କୋରାପୁଟ, ରାୟଗଡା, ଗଜପତି ଜିଲ୍ଲା। ଏହି ସମୟରେ ଏସବୁ ଜିଲ୍ଲାରେ ଘଣ୍ଟାକୁ 45 ରୁ 55 କିଲୋମିଟର ବେଗରେ ପବନ ବହିବ ବୋଲି ଜଣାପଡିଛି। ଏସବୁ ଜିଲ୍ଲାରେ ଜିଲ୍ଲାପାଳମାନେ ସତର୍କ ରହିବା ପାଇଁ ସ୍ବତନ୍ତ୍ର ରିଲିଫ କମିଶନର ନିର୍ଦ୍ଦେଶ ଦେଇଛନ୍ତି।
ସାମ୍ଭବ୍ୟ ବାତ୍ୟା ପାଇଁ ବାତିଲ ହେଲା ପୂର୍ବତଟ ରେଳବାଇର କେତେକ ଟ୍ରେନ
ସାମ୍ଭବ୍ୟ ବାତ୍ୟା ‘ନିଭାର’କୁ ଦୃଷ୍ଟିରେ ରଖି ପୂର୍ବତଟ ରେଳପଥ ପକ୍ଷରୁ ଆଗୁଆ ପଦକ୍ଷେପ ଗ୍ରହଣ କରାଯାଇଛି। ସେହି ଅନୁସାରେ ଚେନ୍ନାଇ ଅଭିମୁଖେ ଯାଉଥିବା କେତେକ ଟ୍ରେନ ଚଳାଚଳକୁ ସାମୟିକ ବାତିଲ କରାଯାଇଛି। ମୁଖ୍ୟତଃ ଏହି ସାମ୍ଭବ୍ୟ ବାତ୍ୟା ଚେନ୍ନାଇ ଉପକୂଳରେ ତାଣ୍ଡବ ସୃଷ୍ଟି କରିବାର ସମ୍ଭାବନା ରହିଛି। ସେଥିପାଇଁ ପୂର୍ବତଟ ରେଳପଥ ଏହି ପଦକ୍ଷେପ ନେଇଛି। ବାତିଲ ହେବାକୁ ଥିବା ଟ୍ରେନଗୁଡିକର ସମସ୍ତ ବିବରଣୀ ତଳେ ଲିଙ୍କକୁ କ୍ଲିକ କରନ୍ତୁ।
ବାତ୍ୟା ପାଇଁ ବାତିଲ ହେଲା ଏ ସବୁ ଟ୍ରେନ
ସାମ୍ଭବ୍ୟ ବାତ୍ୟା ପାଇଁ ଚାଷୀମାନଙ୍କ ପାଇଁ ଜାରୀ ହେଲା ପରାମର୍ଶ
ସାମ୍ଭବ୍ୟ ବାତ୍ୟା ଯୋଗୁଁ ଦକ୍ଷିଣ ଓଡିଶାରେ ବର୍ଷା ହେବାର ସମ୍ଭାବନା ଥିବାରୁ ସେଠାକାର ଚାଷୀଙ୍କ ପାଇଁ କେତେକ ପରାମର୍ଶ ମଧ୍ୟ ସ୍ବତନ୍ତ୍ର ରିଲିଫ କମିଶନରଙ୍କ ତରଫରୁ ଜାରୀ କରାଯାଇଛି। ସେଗୁଡିକ ହେଲା
1-ବର୍ତ୍ତମାନ ଅମଳ ହୋଇଥିବା ଫସଲକୁ ସୁରକ୍ଷିତ ସ୍ଥାନକୁ ନେଇ ଆସନ୍ତୁ। ଏହାକୁ ଭଲ ଭାବରେ ଘୋଡାଇ ରଖନ୍ତୁ ଯେପରି ବର୍ଷା ପାଣିରେ ଏହା ନଷ୍ଟ ହେବ ନାହିଁ।
2-ଯେଉଁ ଫସଲ ଜମିରୁ ଖଳାକୁ ଆସିସାରିଛି ତାହାକୁ ଯଥାଶିଘ୍ର ଅମଳ କରି ଘରେ କିମ୍ବା ସୁରକ୍ଷିତ ସ୍ଥାନରେ ରଖନ୍ତୁ। ନଚେତ ଖଳାରେ ମଧ୍ୟ ଏହା ନଷ୍ଟ ହେବାର ସମ୍ଭାବନା ରହିଛି।
ସେହିପରି ମତ୍ସ୍ୟଜୀବୀମାନେ ମଧ୍ୟ ଏହି ସମୟରେ ଗଭୀର ସମୁଦ୍ରକୁ ନ ଯିବା ପାଇଁ ପାଣିପାଗ ବିଭାଗ ତରଫରୁ ସତର୍କ କରାଇ ଦିଆଯାଇଛି। ମୁଖ୍ୟତଃ 23 ରୁ 26 ତାରିଖ ପର୍ଯ୍ୟନ୍ତ ସତର୍କ ପୂର୍ବକ ଗଭୀର ସମୁଦ୍ରକୁ ନ ଯିବା ପାଇଁ କୁହାଯାଇଛି।